ដោយ: ពៅនិមល/ភ្នំពេញៈ រោងចក្រកាត់ដេរ ហេន សេវេន (Hand Seven (H7) Apparel Co.,Ltd)ដែលស្ថិតនៅម្តុំ ផ្សារព្រៃទា សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញគិតមកដល់ថ្ងៃទី២៦ខែឧសភានេះបានរកឃើញ ករណីវិជ្ជមានកូវីដ១៩ របស់កម្មករ និយោជិតចំនួន២១៤នាក់ ក្នុងចំណោមកម្មករនិយោជិតសរុបជាងមួយពាន់នាក់។
លោកស្រី សុខ លីដា ប្រធានរដ្ឋបាលនៃរោងចក្រ ហេន សេវិន បានឲ្យដឹងនៅព្រឹកថ្ងៃទី២៦ ខែឧសភានេះថា ក្រោយផ្ទុះរាលដាលជំងឺឆ្លងកូវីដ១៩ រោងចក្រសម្រេចបិទទ្វារផ្អាកបណ្តោះអាសន្នចាប់តាំងពីថ្ងៃទី២៣ ខែឧសភាមកម្ល៉េះ និងតម្រូវឲ្យកម្មករ កម្មការនី ក៏ដូចជាអ្នកពាក់ព័ន្ធទាំងអស់មកធ្វើតេស្តសំណាកគ្រប់ៗគ្នា និងធ្វើចត្តាឡីស័កនៅតាមផ្ទះ និងបន្ទប់ជួលរៀងៗខ្លួនដើម្បីតាមដានសុខភាពនិងរងចាំការឆ្លើយតបអំពីការបើកដំណើរការឡើងវិញរបស់រោងចក្រនាពេលខាងមុខ។
ទាក់ទងករណីនេះ អាជ្ញាធររាជធានីភ្នំពេញ និងស្នងការដ្ឋាននគរបាលរាជធានីភ្នំពេញបានប្រកាសហាមឃាត់មិន ឱ្យប្រជាពលរដ្ឋនៅក្នុងភូមិសាស្ត្រខាងលើធ្វើដំណើរចេញ-ចូលនិងមិនអនុញ្ញាតឱ្យប្រជាពលរដ្ឋនៅខាងក្រៅធ្វើដំណើរចូលក្នុងតំបន់នេះទេ ដើម្បីបង្ការទប់ស្កាត់កុំឲ្យមានការឆ្លងរីករាលដាលជំងឺកូវីដ១៩ ទៅតំបន់ផ្សេងទៀត៕សរន
