ដោយៈសុផល/ភ្នំពេញ៖ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួង សាធារណការ និងដឹកជញ្ជូនបានជួបពិភាក្សាការងារជាមួយ គណៈប្រតិភូសភា ពាណិជ្ជកម្មសហរដ្ឋអាមេរិក នៅកម្ពុជា(AmCham) ដឹកនាំដោយលោក អេនថូនី ហ្គាលីយ៉ាណូ ( Anthony Galliano) ប្រធានសភាពាណិជ្ជកម្មសហរដ្ឋអាមេរិក នៅកម្ពុជានិងជា នាយកប្រតិបត្តិនៃក្រុមហ៊ុន Cambodia Investment Management កាលពីថ្ងៃទី១៥ខែមិថុនានៅទីស្តីការក្រសួង។
លោកទេសរដ្ឋមន្ត្រី ស៊ុន ចាន់ថុល បានជម្រាបជូនគណៈប្រតិភូអំពីការតភ្ជាប់ បណ្តាញផ្លូវថ្នល់នៅទូទាំងប្រទេស ជាពិសេសការកសាងហេដ្ឋារចនាសម្ព័ន្ធពីផ្លូវ កៅស៊ូពីរស្រទាប់ស្តើង (DBST) ទៅផ្លូវបេតុងកៅស៊ូ (AC) និងការតភ្ជាប់នៅគ្រប់ ច្រកល្ហកទាំងអស់ ដើម្បីពង្រីកទំនាក់ទំនង និងពង្រីកវិសាលភាពសេដ្ឋកិច្ច របស់កម្ពុជា។
លោកទេសរដ្ឋមន្ត្រី បានធ្វើបច្ចុប្បន្នភាពអំពីវឌ្ឍនភាពនៃគម្រោងសាងសង់ហេដ្ឋា រចនាសម្ព័ន្ធ ដែល សម្រេចបាន គម្រោងកំពុងអនុវត្តបន្ត និងគម្រោងសាងសង់ នាពេលអនាគតដែលក្នុង នោះរួមមាន៖ គម្រោងធ្វើឱ្យប្រសើរឡើងផ្លូវជាតិលេខ១ លេខ២ លេខ២២ លេខ៣ លេខ៤ លេខ៥ ផ្លូវជាតិលេខ៦ លេខ៧ លេខ៨ លេខ៤៨ លេខ១០ លេខ១១ លេខ៥៦ លេខ៥៨ និងផ្លូវជាតិលេខ៧៦ ដែលត្រូវបានបញ្ចប់ ការសាងសង់រួចរាល់ និងគម្រោងលើកកម្ពស់ផ្លូវជាតិលេខ ៣១ ៣៣ ៤១ ពីផ្លូវកៅស៊ូ ពីរស្រទាប់ស្តើង (DBST) ទៅជាផ្លូវបេតុងកៅស៊ូ (AC)គម្រោងសាងសង់ ផ្លូវជាតិលេខ៧១c កំពង់ចាម-ត្បូងឃ្មុំ និងគម្រោងសាងសង់ស្ពានឆ្លងកាត់ ទន្លេមេគង្គខេត្តក្រចេះផងដែរ។
លោកទេសរដ្ឋមន្ត្រីក៏បានលើកឡើងផងដែរអំពី គម្រោងសាងសង់ផ្លូវល្បឿនលឿន ពីភ្នំពេញទៅក្រុង ព្រះសីហនុគិតរហូតមកទល់ពេលនេះសម្រេចបានជាង៥០% ហើយ ផ្លូវក្រវ៉ាត់ក្រុងទី២បញ្ចប់រួចរាល់ គម្រោងសាងសង់ផ្លូវក្រវ៉ាត់ក្រុងទី៣ កំពុងដំណើរការ សាងសង់ និងគម្រោងសាងសង់ផ្លូវក្រវ៉ាត់ក្រុងទី៤ដើម្បីកាត់បន្ថយ ការកកស្ទះចរាចរណ៍ក្នុងទីក្រុង ភ្នំពេញ។
លោកទេសរដ្ឋមន្ត្រី បានសង្កត់ធ្ងន់ថា ទោះបីជាមានការរាតត្បាតពីជំងឺកូវីដ-១៩ នៅកម្ពុជា ក៏ដូចជា នៅទូទាំងពិភពលោកក៏ដោយក៏គម្រោងអភិវឌ្ឍន៍ហេដ្ឋារចនា សម្ព័ន្ធនៅកម្ពុជានៅតែបន្តដំណើរការ របស់ខ្លួនឥតឈប់ឈរមិនទាន់ឃើញមាន គម្រោងណាមួយត្រូវបានរងផលប៉ះពាល់ដោយការរាតត្បាតពីជំងឺដ៏កាចសាហាវនេះ នៅឡើយទេ។
ទាក់ទងនឹងការដឹកជញ្ជូន លោកទេសរដ្ឋមន្ត្រីបានជម្រាបជូនផងដែរថា៖ ក្រសួងបានប្រើប្រាស់ប្រព័ន្ធបច្ចេកវិទ្យាសម័យទំនើបដើម្បីគាំទ្រដល់ផ្តល់ សេវាសាធារណៈប្រកបដោយប្រសិទ្ធភាព ចំណេញពេល វេលាកាត់ចំណាយក្រៅ ផ្លូវការ ដែលក្នុងនោះរួមមាន៖ ប្រព័ន្ធស្វ័យប្រវត្តិកម្មចុះបញ្ជីយានជំនិះ ប្រព័ន្ធ ស្វ័យប្រវត្តិកម្មលក់លេខពិសេសផ្ទាល់ខ្លួន ការបើកដំណើរការមណ្ឌលប្ដូរ និងពន្យារបណ្ណបើកបរនៅផ្សារ ទំនើបអ៊ីអនម៉ល១ អ៊ីអនម៉ល២ និងផ្សារទំនើប ជីបម៉ុង និងការបង្កើតទីតាំងត្រួតពិនិត្យលក្ខណៈបច្ចេក ទេសយានយន្ត និងការប្រើប្រាស់កម្មវិធីថែទាំផ្លូវ (ROAD CARE Mobile App)ដើម្បីឱ្យប្រជាពលរដ្ឋ ចូលរួមរាយការណ៍អំពីផ្លូវខូច សំដៅថែទាំផ្លូវឱ្យបានយូរអង្វែង។
ជាងនេះទៅទៀត គណៈកម្មាធិការជាតិសុវត្ថិភាពចរាចរណ៍ផ្លូវគោក(NRSC) កំពុងអភិវឌ្ឍគម្រោងដ៏ថ្មី ស្រឡាងមួយទៀតគឺកម្មវិធីកាត់ពិន្ទុបណ្ណបើកបរ ដែលអនុញ្ញាតឱ្យសមត្ថកិច្ចនគរបាលចរាចរណ៍ធ្វើការដកពិន្ទុបណ្ណបើកបរដោយ ស្វ័យប្រវត្តិ និងជូនដំណឹងទៅកាន់ស្ថាប័នចេញបណ្ណបើកបរ និងម្ចាស់បណ្ណ ដែលប្រព្រឹត្តខុសនឹងច្បាប់ចរាចរណ៍ផ្លូវគោក និងកម្មវិធីព័ត៌មានវិទ្យាជាច្រើនទៀត ដើម្បីផ្ដល់សេវា សាធារណៈជូនប្រជាពលរដ្ឋឱ្យបានលឿន ប្រកបដោយប្រសិទ្ធភាព និងតម្លាភាពផងដែរ។
ឆ្លៀតក្នុងឱកាសនោះ ទេសរដ្ឋមន្ត្រី ក៏បានធ្វើកត់សម្គាល់ផងដែរថា៖ កម្ពុជាកំពុងគិត គូរអំពី គោលនយោបាយ និងយុទ្ធសាស្ត្រសម្រាប់ការដឹកជញ្ជូនបៃតង ដើម្បី សម្របខ្លួនទៅតាមការរីកចម្រើននៃ សាកលភាវូបនីយកម្ម ជាពិសេសការប្រើប្រាស់ យានយន្តដែលដើរដោយថាមពលអគ្គិសនីជំនួសវិញដើម្បីអាចកាត់បន្ថយថ្លៃដើម ប្រតិបត្តិការ និងជៀសវាងការបំភាយឧស្ម័នផ្ទះកញ្ចក់នៅពេលដែលយានយន្ត អគ្គិសនីសាកភ្លើងដោយថាមពលកកើតឡើងវិញ។
ទាក់ទងនឹងការអភិវឌ្ឍធនធានមនុស្ស លោកទេសរដ្ឋមន្ត្រីបានជម្រាបជូនគណៈ ប្រតិភូអំពីការបង្កើត វិទ្យាស្ថានតេជោសែន សាធារណការ និងដឹកជញ្ជូន ដើម្បី អភិវឌ្ឍធនធានមនុស្សសម្រាប់ក្មេងជំនាន់ ក្រោយ ជាពិសេស បណ្តុះបណ្តាល វិស្វករកម្ពុជាឱ្យចេះធ្វើផ្លូវ អាចសាងសង់ស្ពានឆ្លងទន្លេមេគង្គបាន និងប្រព័ន្ធហេដ្ឋា រចនាសម្ព័ន្ធជាច្រើនទៀតប្រកបដោយគុណភាពរឹងមាំឱ្យដូនតាជំនាន់មុនដែលបានកសាង អង្គរវត្តទុកឱ្យ។
គណៈប្រតិភូសភាពាណិជ្ជកម្មសហរដ្ឋអាមេរិក បានសម្តែងនូវការកោតសរសើរ យ៉ាងជ្រាលជ្រៅចំពោះកិច្ចខិតខំប្រឹងប្រែង របស់ក្រសួងសាធារណការ និងដឹក ជញ្ជូន ក៏ដូចជារាជរដ្ឋាភិបាលក្រោមការដឹកនាំប្រកបដោយគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រ កម្ពុជា ក្នុងការប្ដេជ្ញាចិត្តខ្ពស់ប្រកបដោយការទទួលខុសត្រូវដើម្បីបន្តជំរុញ អភិវឌ្ឍហេដ្ឋារចនាសម្ព័ន្ធឱ្យមាន ការរីកចម្រើនយ៉ាងរហ័ស៕/PC
