ដោយ: ភ្នំខៀវ / បាត់ដំបង: ចម្ការទុរេនស្រុកសំឡូត ខេត្តបាត់ដំបងរដូវផ្លែទុំកំពុងទាញការចាប់អារម្មណ៍ពីអ្នកទេសចរណ៍ក្នុងតំបន់។
ក្នុងដំណើរកម្សាន្តនៅថ្ងៃទី១៥ ខែមិថុនា ឆ្នាំ២០២១កន្លងមកនេះ អ្នកស្រី ទៀង វល័ក្ខ រស់នៅក្នុងក្រុងបាត់ដំបង បានលើកឡើងថា ដំណើរទេសចរណ៍ក្នុងតំបន់ជាលក្ខណៈគ្រួសារមានគ្នាចំនួនជាង ១០នាក់នេះ លោកស្រី និងក្រុមគ្រួសារបានឈរនៅលើចម្ការទុរេនជាច្រើន និងធំល្វឹងល្វើយ ធ្វើឲ្យអារម្មណ៍គ្រប់គ្នារំភើប និងសប្បាយរីករាយជាខ្លាំង។ ពិសេសនូវទិដ្ឋភាពដើមទុរេន ដើមសាវម៉ាវ និងដើមឈើហូបផ្លែជាច្រើនមុខទៀតចេញផ្កាផ្លែស្អេកស្កះមិនធ្លាប់ជួប។ ម្យ៉ាងទៀត ក៏ជាឱកាសមួយផងដែរក្នុងការជ្រើសរើសទិញផ្លែុរេន ឬសាវម៉ាវធម្មជាតិផ្ទាល់របស់ប្រជាពលរដ្ឋខ្មែរ ហូបដោយមិនបារម្ភថា ផ្លែឈើទាំងនេះនាំចូលមកពីក្រៅប្រទេសមានសារធាតុគីមីនោះឡើយ។
ចំណែកលោក ហ៊ឹម សារិន វ័យជាង ៦០ឆ្នាំ ជាម្ចាស់ចម្ការធុរេននៅក្នុងស្រុកសំឡូត ខេត្តបាត់ដំបងបានប្រាប់ឲ្យដឹងដែរថា ចំពោះមុខនេះក្នុងចម្ការរបស់លោកមានដើមទុរេនជាង ២០០ដើម ឆ្នាំនេះទុរេនកាន់ផ្លែបានច្រើនគួរសមហើយចាប់ផ្តើមពេញចំណាស់ និងទុំជាបណ្តើរៗហើយដែរ ចាប់តាំងពីពាក់កណ្តាលខែឧសភាមក។ ទុរេនដែលដាំដុះនៅលើដែនដីស្រុកសំឡូតមានក្លិនក្រអូប និងរស់ជាតិផ្អែមខ្ទិះឆ្ងាញ់។ គុណភាពដំណាំទុរេន និងឈើហូបផ្លែចម្រុះដទៃទៀតនេះ បានបើកទីផ្សារយ៉ាងទូលាយសម្រាប់គ្រួសាររបស់លោក ក៏ដូចជាកសិករផ្សេងទៀត ទាំងតាមរយ:ការចូលមកទិញផ្ទាល់ដល់ចម្ការ និងទាំងតាមការបញ្ជាទិញតាមប្រព័ន្ធអនឡាញជាដើម ។ក្នុងមួយថ្ងៃលោកលក់ធុរេនបានមិនតិចជាង ៣០០គីឡូក្រាមឡើយដែលទីផ្សាររួមមាន ខេត្តបាត់ដំបង សៀមរាប ខេត្តបន្ទាយមានជ័យ ពោធិ៍សាត់ ខេត្តកំពង់ឆ្នាំង និងទីក្រុងភ្នំពេញ។
លោកបន្តថា បច្ចុប្បន្នទុរេនទុំលក់ក្នុងតម្លៃ ២៥.០០០រៀលក្នុងមួយគីឡូក្រាម ។តែបើទុរេនបេះចាស់ដើមរយ:ពេល ៣ថ្ងៃទុំលក់បានក្នុងមួយគីឡូក្រាមតម្លៃពី ២២។០០០-២៣.០០០រៀល ។ទុរេនក្នុងភូមិសាស្ត្រស្រុកសំឡូតភាគច្រើនពេញចំណាស់ទុំនៅរវាងខែឧសភា និងស្បើយអស់ផ្លែនៅអំឡុងខែសីហា ក្រៅពីនេះអាចមិនមែនជាផលិតផលទុរេនសំឡូតឡើយ៕
