ដោយៈមុនរ័ត្ន/ភ្នំពេញៈក្នុងជំនួប​ពិភាក្សាមួយ លោក​នាយ​ឧ​ត្ត​ម​សេនីយ៍ គៀត ច័ន្ទ​ថា​រិ​ទ្ធ អគ្គនាយកអន្តោប្រវេសន៍បានជម្រាបទៅលោកទូតវៀតណាមប្រចាំកម្ពុជាថា កិច្ចប្រតិបត្តិការ​ការ​ងារ​គ្រប់គ្រង​ជនបរទេស និង​ការអនុវត្ត​ច្បាប់​អន្តោប្រវេសន៍​នៅ​កម្ពុជា គឺមិនដែល​មានការ​រើសអើង​ឡើយ​។​លោក វូ ក្វាង​មី​ញ (Vu Quang Minh) ឯកអគ្គរដ្ឋទូត​សាធារណរដ្ឋ​សង្គមនិយម​វៀតណាម​ប្រចាំ​ព្រះរាជាណាចក្រ​កម្ពុជា​បានជួបលោកនាយឧត្តមសេនីយ៍​កាលពីរសៀលថ្ងៃទី១៧ខែមិថុនាម្សិលមិញ។

​ប្រភព​បញ្ជាក់ថា ក្នុងជំនួប​នេះ​នាយ​ឧ​ត្ត​ម​សេនីយ៍ គៀត ច័ន្ទ​ថា​រិ​ទ្ធ​បានស្នើ​ឲ្យ​ឯកអគ្គរដ្ឋទូត​សាធារណរដ្ឋ​សង្គម និយម​វៀតណាម​ប្រចាំ​កម្ពុជា​ជំរុញ​កិច្ចសហប្រតិបត្តិការ​ធ្វើ​យ៉ាងណា​បំពេញបែបបទ​ដើម្បី​បញ្ជូន​ជនជាតិ​វៀតណាម​ដែល​រស់នៅ​ខុសច្បាប់ ក្នុងប្រទេស​កម្ពុជា​ទៅ​ប្រទេស​វៀតណាម​វិញ​ឲ្យ​បាន​ឆាប់​។​លោក៏បានបញ្ជាក់​ជូន​ទូត​វៀតណាម​ថា កិច្ចប្រតិបត្តិការ​ការ​ងារ​គ្រប់គ្រង​ជនបរទេស និង​ការអនុវត្ត​ច្បាប់​អន្តោប្រវេសន៍​នៅ​កម្ពុជា គឺមាន​មិនដែល​មានការ​រើសអើង​ឡើយ​។​

​ចំណែក​ទូត​វៀតណាម​បាន​ថ្លែងអំណរគុណ​ចំពោះ​កិច្ចខិតខំ​ប្រឹងប្រែង របស់​អគ្គនាយកដ្ឋាន​អន្តោប្រវេសន៍ លើ​ការងារ​គ្រប់គ្រង​ជនបរទេស ជាពិសេស​ប្រជាជន​វៀតណាម ដែល​កំពុងស្នាក់នៅ​ក្នុង​ប្រទេស​កម្ពុជា​នាពេល​កន្លងមក។ ក្នុងនោះ​រួមមានៈ ការងារ​ជំរឿន​ស្ថិតិ​ជនបរទេស​, ការទទួល​ពាក្យស្នើសុំ និង​ផ្តល់​ប័ណ្ណ​ស្នាក់នៅ​អចិន្ត្រៃយ៍​ដល់​ជនបរទេស និង​ការអនុវត្ត​ច្បាប់​អន្តោប្រវេសន៍ជាដើម​។ ទន្ទឹមនឹងនេះ​លោកទូត​ក៏បាន​លើកឡើង​អំពី​បញ្ហាប្រឈម​មួយចំនួនពាក់ព័ន្ធ​នឹង​សិទ្ធិ និង​ប្រសិទ្ធភាព​នៃ​ការប្រើប្រាស់​ប័ណ្ណ​ស្នាក់នៅ​អចិន្ត្រៃយ៍ នៅក្នុង​ជីវភាព​រស់នៅ​ប្រចាំថ្ងៃ​របស់​ប្រជាជន​វៀតណាម​នៅ​រាជធានី​ភ្នំពេញ និង​តាម​បណ្តា​ខេត្ត​ដែរ ។​

​លោកនាយ​ឧ​ត្ត​ម​សេនីយ៍ គៀត ច័ន្ទ​ថា​រិ​ទ្ធ បាន​តបទៅលោកទូតថា អគ្គនាយកដ្ឋាន​អន្តោប្រវេសន៍​នឹងធ្វើការសម្រប សម្រួល​ប​ន្ថែ​ម​ទៀត​លើ​ការងារ​ផ្សព្វផ្សាយ​បទបញ្ញត្តិ​ស្តីពី​សិទ្ធិ​ក្នុងការ​ប្រើប្រាស់​ប័ណ្ណ​ស្នាក់នៅ​អចិន្ត្រៃយ៍ សម្រាប់​ជនបរទេស​នៅក្នុង​ប្រទេស​កម្ពុជា ដល់​អាជ្ញាធរ​មូលដ្ឋាន​តាម​រាជធានី ខេត្ត ដើម្បី​ឲ្យ​មានការ​យល់ដឹង និង​អនុវត្ត​ត្រឹមត្រូវ​ឈរលើ​មូលដ្ឋាន​ច្បាប់​។​

ចំពោះ​ជនជាតិ​វៀតណាម​ដែល​រស់នៅ​ខុសច្បាប់ក្នុងប្រទេស​កម្ពុជា អគ្គនាយក​អន្តោប្រវេសន៍​ក៏បាន​ស្នើ​ឲ្យ​ឯកអគ្គ​រដ្ឋ ទូត​វៀតណាម​បន្ត​ជំរុញ​កិច្ចសហប្រតិបត្តិការ​ធ្វើ​យ៉ាងណា​បំពេញបែបបទ​ដើម្បី​បញ្ជូន​អ្នក​ទាំងនោះ​ទៅ​ប្រទេស​វៀតណាម​វិញ​ឲ្យ​បាន​ឆាប់​។​

​នាយ​ឧ​ត្ត​ម​សេនីយ៍ គៀត ច័ន្ទ​ថា​រិ​ទ្ធ បាន​បញ្ជាក់ថា កិច្ចប្រតិបត្តិការ​ការ​ងារ​គ្រប់គ្រង​ជនបរទេស និង​ការអនុវត្ត​ច្បាប់​អន្តោប្រវេសន៍​នៅ​កម្ពុជា គឺមិនដែល​មានការ​រើសអើង​ឡើយ​៕សរន