​ដោយ​៖ ដេប៉ូ​/​ភ្នំពេញ​៖ មន្ត្រីជាន់ខ្ពស់​នៃ​ក្រសួងបរិស្ថាន បាន​ថ្លែងថា​ការគ្រប់គ្រង និង​ញែក​សំរាម​តាម​ប្រភេទ​បាន​ត្រឹមត្រូវ ព្រមទាំង​បង្កើន​ការកែច្នៃ​ឱ្យបាន​ច្រើន​អស់​លទ្ធភាព នោះ​សំណល់​សំរាម​ដែល​បោះចោល​លើ​ទីលាន​នឹងមាន​បរិមាណ​កាន់តែ​ថយចុះ​។

​ថ្លែង​នៅក្នុង​ពិធី​ប្រគល់ និង​ទទួល​ទ្រុង​សំណាញ់​ធ្វើ​ពី​ដែក​សម្រាប់​ដាក់​សំរាម​សំណល់​រឹង​ជូន​រដ្ឋបាល​ខេត្តកំពត ដែលជា​ជំនួយ​ឧបត្ថម្ភ​របស់​ក្រុមហ៊ុន​កូកាកូឡា​តាមរយៈ​ក្រសួងបរិស្ថាន កាលពី​ថ្ងៃទី​១៧ ខែមិថុនា ឆ្នាំ ២០២១ លោក នេត្រ ភក្ត្រា រដ្ឋលេខាធិការ និង​ជាម​ន្ត្រី​នាំពាក្យ ក្រសួងបរិស្ថាន​បានឱ្យដឹងថា ក្នុងចំណោម​សំណល់​សំរាម ១០០​ភាគរយ​មាន​សំណល់​សរីរាង្គ​ប្រមាណ ៦៨​ភាគរយ សំណល់​ប្លា​ស្ទិ​ក ប្រមាណ ២០​ភាគរយ និង​សំណល់​រឹង​ជាង ១០​ភាគរយ​។ ហើយ​អ្វីដែល​យើង​ត្រូវ​យកចិត្តទុកដាក់​បន្ថែ​ម​គឺ​សំណល់​ប្លា​ស្ទិ​ក ដែលជា​សំណល់​ប្រកបដោយ​គ្រោះថ្នាក់ ប្រសិនបើ​យើង​មិន​គ្រប់គ្រង​បានល្អ​ព្រោះ​សំណល់​ប្លា​ស្ទិ​កមាន​ផ្ទុក​សារធាតុ​គីមី​។

​លោក រដ្ឋលេខាធិការ​ក្រសួងបរិស្ថាន​បាន​ថ្លែងថា ទ្រុង​សម្រាប់​ដាក់​សំណល់​ប្លា​ស្ទិ​ក​ដែល​ក្រុមហ៊ុន​កូកាកូឡា​ផ្តល់ជូន​រដ្ឋបាល​ខេត្តកំពត​តាមរយៈ​ក្រសួងបរិស្ថាន​នេះ ជា​ផ្នែក​មួយ​នៃ​កិច្ចខិតខំ​ប្រឹងប្រែង​ក្នុងការ​ចូលរួម​គ្រប់ គ្រង​សំណល់​ប្លា​ស្ទិ​ក មិនឱ្យ​បោះចោល​បែប​អនាធិបតេយ្យ និង​ហូរ​ចូល​សមុទ្រ​។

​ក្នុងនាម​ក្រសួងបរិស្ថាន លោក នេត្រ ភក្ត្រា បាន​ថ្លែងអំណរគុណ​ដល់​ក្រុមហ៊ុន​កូកាកូឡា ដែល​តែងតែ​ចូលរួម​ជាមួយ​ក្រសួងបរិស្ថាន និង​អាជ្ញាធរ​ដែនដី​ក្នុងការ​សម្អាត​អនាម័យ​បរិស្ថាន​តាមរយៈ​ការផ្តល់​ធុងសំរាម និង​សកម្មភាព​ផ្សេងទៀត ដែលមាន​មេត្រីភាព​បរិស្ថាន​។​

​លោក រដ្ឋលេខាធិការ​ក្រសួងបរិស្ថាន​បានបញ្ជាក់​បន្ថែមថា​៖«​ការគ្រប់គ្រង​សំណល់​សំរាម​គឺជា​ភារកិច្ច​របស់​យើងទាំងអស់គ្នា ហើយ​ការញែក​សំរាម​តាម​ប្រភេទ​ច្បាស់លាស់ និង​ការជំរុញ​លើ​ការកែច្នៃ​ឱ្យអស់​លទ្ធភាព​នឹងចូលរួម​កាត់បន្ថយ​សំណល់​សំរាម​ដែល​បោះចោល​នៅលើ​ទីលាន និង​ទទួលបាន​ផលចំណេញ​ផ្នែក​សេដ្ឋកិច្ច​ថែមទៀត​ផង​»​។

​លោ​កថា​បច្ចុប្បន្ននេះ បរិមាណ​សំរាម​ចន្លោះ​ពី ៧០​ទៅ ៨០​ភាគរយ ត្រូវបាន​ចាក់ចោល​នៅលើ​ទីលាន និង​មាន​ប្រមាណ ២០​ភាគរយ​ប៉ុណ្ណោះ​ដែល​បាន​ដកហូត​យកទៅ​កែច្នៃ​។

​ជាមួយគ្នា​នេះ លោករ​ដ្ឋេ​លេខាធិការ​បាន​ថ្លែងថា ដើម្បី​ធានាបាន​នូវ​និរន្តរភាព​បរិស្ថាន និង​គុណភាព​បរិស្ថាន​សម្រាប់​ផាសុកភាព​រស់នៅ​របស់​ពលរដ្ឋ ក្រសួងបរិស្ថាន​តែងតែបាន​ជួយឧបត្ថម្ភ​គាំពារ​ទាំង​ស្មារតី​សម្ភារៈ​បច្ចេកទេស​ដល់រ​ដ្ឋ​បាល​ខេត្ត ក្នុងនោះ​រួមទាំង​ខេត្តកំពត​ផងដែរ​។​

គួរ​បញ្ជាក់ថា​ទ្រុង​សំណាញ់​ធ្វើ​ពី​ដែក​សំរាប់​ដាក់​សំរាម​សំណល់​រឹង ដែលមាន​ទំហំ​៤​ម៉ែត្រ​គុណ​នឹង​២,៥​ម៉ែត្រ និង​មាន​កម្ពស់​១,៤​ម៉ែត្រ ចំនួន​១៦ ទ្រុង ក្រោម​ជំនួយ​ឧបត្ថម្ភ​របស់​ក្រុមហ៊ុន​កូកាកូឡា​តាមរយៈ​ក្រសួងបរិស្ថាន ត្រូវបាន​ប្រគល់ជូន​ដល់​រដ្ឋបាល​ខេត្តកំពត ដើម្បី​ដាក់ពង្រាយ​តាម​ទីសាធារណៈ និង​ទីប្រជុំជន​ផ្សារ​ក្នុង​ក្រុង និង​ស្រុក​ទាំង ៨​ក្នុង​ខេត្តកំពត​។ ការប្រគល់​នេះ បានធ្វើ​ឡើង នៅ​សួនច្បារ​មាត់​ព្រែក​ក្នុង​សង្កាត់​កំពង់​កណ្ដាល ក្រោម​វត្តមាន​ចូលរួម​ពី​ឯកឧត្តម នេត្រ ភក្ត្រា រដ្ឋលេខាធិការ​ក្រសួងបរិស្ថាន ឯកឧត្តម ជាវ តា​យ អភិបាល នៃ​គណៈ​អភិបាលខេត្ត និង​លោក​-​លោកស្រី អភិបាលរង​ខេត្ត ថ្នាក់ដឹកនាំ​មន្ទីរ​បរិស្ថាន​ខេត្ត និង​អាជ្ញាធរ​មូលដ្ឋាន​។​

លោក នេត្រ ភក្ត្រា រដ្ឋលេខាធិការ​ក្រសួងបរិស្ថាន បានលើកឡើង​ដោយ​បញ្ជាក់ថា បញ្ហា​បរិស្ថាន​ត្រូវបាន​រាជរដ្ឋាភិបាល​កម្ពុជា​ក៏ដូចជា​ក្រសួងបរិស្ថាន​យកចិត្តទុកដាក់ ហើយ​បាន​ដាក់ចេញ​ឲ្យ​អនុវត្ត​ក្នុង​ក្របខណ្ឌ​ទូទាំងប្រទេស​នូវ​គោលនយោបាយ គ្រប់គ្រង​សំរាម​សំ​ណា​ល់​រឹង​ទីប្រជុំជន ដើម្បី ពង្រឹង និង ដោះស្រាយ បញ្ហា គ្រប់គ្រង សំរាម និង សំណល់ រឹង នៅ ទីប្រជុំជន​ឱ្យ មាន ប្រសិទ្ធភាព និង មាន​សុវត្ថិភាព បរិស្ថាន ខណៈ អត្រា បរិមាន​ណ​សំរាម ក្នុង មួយ ឆ្នាំ ៗ​មាន ការ កើន ឡើង​ប្រមាណ ១៥​ភាគរយ​ក្នុង​មួយឆ្នាំ​។ បច្ចុប្បន្ន សំណល់​សំរាម​ដែល​បង្កើតឡើង​នៅ​កម្ពុជា មួយថ្ងៃ​មាន​ចំនួន​ប្រមាណ​ជាង ១​ម៉ឺន​តោន ហើយ​ក្នុង​មួយឆ្នាំ​ប្រមាណ ៤ លាន​តោន​៕