​ដោយៈ បូកគោ / កំពត​: រដ្ឋបាល​ខេត្តកំពត កាលពី​រសៀល ថ្ងៃទី​១៨ ខែមិថុនា ឆ្នាំ​២០២១ បានប្រកាស​ជូនដំណឹង ស្ពី​ពី​ការស្លាប់​របស់ អ្នក​វិជ្ជមាន​កូ​វីដ​១៩​ម្នាក់ បន្ទាប់ពី​ចូល​សម្រាក​ព្យាបាល នៅ​មន្ទីរពេទ្យបង្អែក​ខេត្ត​។ ករណី​ស្លាប់​បន្ថែម ម្នាក់ទៀត​នេះ បានធ្វើឱ្យ​ការបាត់​បង់ជីវិត អ្នកជំងឺ​កូ​វីដ ក្នុង​ខេត្តកំពត កើន​ដល់​ចំនួន ៨ នាក់​។​

​សេចក្តីប្រកាស មាន​ខ្លឹមសារ​ថា យោងតាម​របាយការណ៍ របស់​មន្ទីរ​សុខាភិបាល ខេត្តកំពត គឺមាន​ករណី អ្នក​វិជ្ជមាន​កូ​វីដ​-១៩ ជា​ស្ត្រី​វ័យ​៥៥​ឆ្នាំ​ជនជាតិខ្មែរ​ម្នាក់​រស់នៅ​ភូមិ​ចក្រី​ទីង ឃុំ​ព្រៃ​ខ្នង ស្រុក​ទឹកឈូ ខេត្ត​ត​កំពត បាន​ស្លាប់ កាលពី​វេលា​ម៉ោង ៨ ព្រឹក​ថ្ងៃទី​១៨ ខែមិថុនា ឆ្នាំ​២០២១ ក្នុង​មន្ទីរពេទ្យបង្អែក​ខេត្ត​។ ជនរងគ្រោះ បាន​ចូល​សម្រាក​ព្យាបាល នៅ​ម៉ោង ៦ ព្រឹក​ថ្ងៃទី​១៨ ខែមិថុនា ដោយ​សភាព​អស់កម្លាំង ហត់ ក្អក​ខ្លាំង និង​ស្បែក​ប្រែសម្បុរ​ស្វាយ​។ ពេលនោះ ក្រុមគ្រូពេទ្យ បានធ្វើការ​សង្គ្រោះបន្ទាន់ តាម​លក្ខណៈ បច្ចេកទេស ព្រមទាំង​ធ្វើតេស្ត រកឃើញ​វិជ្ជមាន​ជំងឺ​កូ​វីដ​-១៩​។ ដោយ​ស្ថានភាព កាន់តែ​ធ្ងន់ធ្ងរ​ទៅៗ គ្រូពេទ្យ មិន​អាចជួយ​សង្គ្រោះបាន អ្នកជំងឺ ក៏​បាត់​បង់ជីវិត នៅ​ម៉ោង ៨ ព្រឹក ថ្ងៃ​ដដែល​នេះ​តែម្តង​។​

​ជាមួយនេះ រដ្ឋបាល​ខេត្តកំពត ក៏បាន​ប្រកាស​ពី​ការរកឃើញ អ្នក​វិជ្ជមាន​ជំងឺ​កូ​វីដ​-១៩ ថ្មី នៅ​ថ្ងៃទី​១៨ ខែមិថុនា ឆ្នាំ​២០២១ ចំនួន ២៧ នាក់​ទៀត​។ ការរកឃើញ​អ្នក​វិជ្ជមាន បន្ថែម​នេះ បានធ្វើឱ្យ​អក​មក​ឆ្លង ក្នុង​ខេត្តកំពត បាន​កើន​ដល់ ៩៦៨ នាក់​។ ក្នុងនោះ កំពុង​សម្រាក​ព្យាបាល ៥៣៨ នាក់ បានជា​សះស្បើយ ៤២២ នាក់ និង​ស្លាប់​ចំនួន ៨ នាក់​៕/V​