​ប្រែ​សម្រួល : កញ្ញា​ដា​លី​ស ៖ ក្រុមមន្ត្រី​បាន​និយាយ​ថា​ទាហាន​មី​យ៉ាន់​ម៉ា​បាន​ប្រយុទ្ធ​ជាមួយ​កងជីវពល​ស៊ីវិល​ដែល​ប្រឆាំង​នឹង​របប​យោធា​ប្រដាប់​ដោយ​អាវុធ​ខ្នាតតូច​និង​គ្រាប់បែកដៃ​នៅក្នុង​ទីក្រុង​ធំ​ទី ២ របស់​ប្រទេស​នេះ​នៅ​ថ្ងៃ​អង្គារ​ទី​២២​មិថុនា ដោយ​បាតុករ​៤ នាក់​ត្រូវបាន​សម្លាប់​និង​សមាជិក​សន្តិសុខ​ជាច្រើន​នាក់​រងរបួស​។​

​ការប្រយុទ្ធ​គ្នា​បាន​ផ្ទុះឡើង​នៅ​ពាសពេញ​ប្រទេស​មី​យ៉ាន់​ម៉ា​ចាប់តាំងពី​រដ្ឋប្រហារ​ខែ​កុម្ភៈ ខណៈ​ប្រជាជន​បាន​បង្កើត “​កងកម្លាំង​ការពារ​ជា​ច្រើន​ក្រុម​”​ដើម្បី​ប្រយុទ្ធប្រឆាំង​នឹង​ការបង្ក្រាប​ដ៏​ឃោរឃៅ​​របស់​យោធា​ទៅលើ​ក្រុមប្រឆាំង ប៉ុន្តែ​ការប៉ះទង្គិច​គ្នា​ឥឡូវ​មាន​តែ​នៅតាម​តំបន់​ជនបទ​ប៉ុណ្ណោះ​។​

​ក្រុម​ព័ត៌មាន​របស់​យោធា​បាន​និយាយ​នៅក្នុង​សេចក្តីថ្លែងការណ៍​មួយ​ថា ក្រោយ​ទទួលបាន​តម្រុយ កម្លាំង​សន្តិសុខ​បាន​ឆ្មក់​ចូល​ផ្ទះ​មួយ​នៅ​សង្កាត់​ចាន់​ម៉ា​ថា​ស៊ី​នៃ​ទីក្រុង​ម៉ាន់​ដា​ឡៃ​នៅ​ព្រឹក​ថ្ងៃ​អង្គារ​នេះ ហើយ​បាន​ពើបប្រទះ​ជួប​ជាមួយនឹង​ការបាញ់​កាំភ្លើង​និង​ការ​គប់​គ្រាប់បែកដៃ​។​

​សេចក្តីថ្លែងការណ៍​បាន​និយាយថា “​សមាជិក​សន្តិសុខ​មួយចំនួន​បាន​រងរបួស​ធ្ងន់ធ្ងរ​” នៅក្នុង​ការប្រយុទ្ធ​គ្នា​នេះ ដោយ​បន្ថែម​ថា “​ភេរ​វករ​” ចំនួន ៤ នាក់​ត្រូវបាន​សម្លាប់​និង ៨ នាក់​ទៀត​ត្រូវបាន​ចាប់ខ្លួន ដោយ​រឹបអូស​បាន​ទាំង​គ្រាប់មីន​កែច្នៃ គ្រាប់បែកដៃ និង​អាវុធ​តូចៗ​ជា​ច្រើន​ដើម​។​

​យោង​តាម​អង្គការ​ឃ្លាំមើល​ក្នុងស្រុក​បាន​ឱ្យដឹងថា ការបះបោរ​ទ្រង់ទ្រាយ​ធំ​ប្រឆាំងនឹង​ក្រុម​យោធា​ដែល​បាន​ផ្តួលរំលំ​រដ្ឋាភិបាល​របស់​លោកស្រី​អ៊ុង​សាន​ស៊ូ​ជី បាន​ជួប​នឹង​ការបង្ក្រាប​ដ៏​សាហាវ​ពី​យោធា ដែល​បាន​សម្លាប់​ជន​ស៊ីវិល​ជាង ៨៧០ នាក់​៕

​ទាហាន​មី​យ៉ាន់​ម៉ា​សម្លាប់​បាតុករ​៤​នាក់ និង​ចាប់ខ្លួន​ជាច្រើន​នាក់​ក្នុង​ការបង្ក្រាប​នៅ​ទីក្រុង​ម៉ាន់​ដា​ឡៃ