ដោយៈ សុផានីតា/កោះកុងៈ ក្រុមក្មេងឈាមរាវមានគ្នាប្រមាណ៥ទៅ១០នាក់ បានប្រើអំពើហិង្សាកាប់ចាក់គ្នាយ៉ាងចាស់ដៃបណ្តាលឱ្យម្នាក់ស្លាប់នៅនឹងកន្លែង។ រីឯជនបង្កកំពុងរត់គេចខ្លួនបាត់ស្រមោលទាំងយប់។ករណីក្មេងមានជម្លោះរហូតឈានដល់ធ្វើឱ្យគូរបដិបក្ខស្លាប់នេះ កើតឡើងនៅកាលពីម៉ោងជាង១០យប់ថ្ងៃទី២២ ខែមិថុនា ឆ្នាំ២០២១ទល់មុខសាលារៀនសាមគ្គីឯកជនក្បែរសាលាសង្កាត់ដងទង់ ក្រុងខេមរភូមិន្ទ។
បើតាមសមត្ថកិច្ចជំនាញបានឱ្យដឹងថា យុវជនដែលស្លាប់ឈ្មោះ លីម៉ា អាយុ១៨ឆ្នាំ រស់នៅភូមិពាមក្រសោប ឃុំពាមក្រសោប ស្រុកមណ្ឌលសីមា មុខរបរជាកម្មករ បានរងរបួសចំកណ្តាលក្បាលចំនួនពីរកន្លែង និងលើដងខ្លួនចំនួន៤កន្លែង។ រីឯជនរងគ្រោះម្នាក់ទៀតឈ្មោះ ប៉ាក់ រ៉ាវុធ អាយុ ១៩ ឆ្នាំ រងរបួសធ្ងន់កំពុងសម្រាកព្យាបាលនៅមន្ទីរពេទ្យបង្អែកខេត្ត មានទីលំនៅភូមិពាមក្រសោបជាមួយអ្នកស្លាប់។
នគរបាល បង្ហាញជាបឋមថា តាមការសាកសួរនិងពិនិត្យសកម្មភាពអំពើហិង្សាក្នុងកាមេរ៉ាសុវត្ថិភាព ជនសង្ស័យមានគ្នីគ្នា៥ទៅ១០នាក់ ។ក្រោយស្លាប់មនុស្សរួច ពួកគេនាំគ្នារត់គេចខ្លួនបាត់អស់ភ្លាមៗដែរ។ ករណីឃាតកម្មនេះគេនៅពុំទាន់ដឹងមូលហេតុច្បាស់លាស់នៅឡើយទេ ដោយកម្លាំងសមត្ថកិច្ចជំនាញកំពុងបើកស៊ើបអង្កេតស្រាវជ្រាវរកមុខក្រុមជនដៃដល់មកផ្តន្ទាទោសតាមច្បាប់ជាធរមាន៕សរន
