ដោយៈ បាយ័ន / សៀមរាបៈ បុរស​ម្នាក់ ជា​បុគ្គលិក​អចលនទ្រព្យ បាន​បើកឡាន តូយ៉ូតា​ព្រូស ជិះ​គ្នា ៣ នាក់ គេច​ពី​ម៉ូតូ​រ៉ឺម៉ក បើកបរ​យ៉ាង​លឿន បុក​ចូលទៅ​ក្នុងផ្ទះ វេរ​លុយ​អ៊ី​ម៉ា​នី បណ្ដាលឱ្យ រង​ការខូចខាត ទ្វារ​កញ្ចក់ និង​ទូរទស្សន៍ អស់​ចំនួន ៣ គ្រឿង​។ ករណីនេះ បានកើត​ឡើង នៅវេលា​ម៉ោងជាង ១០ ព្រឹក ថ្ងៃទី​២៣ ខែមិថុនា ឆ្នាំ​២០២១ ស្ថិតនៅលើ​ដងផ្លូវ ចាក់​បេតុង ក្រោយ​ផ្សារលើ​ធំថ្មី (​ផ្លូវ​តា​អុច​) ក្នុងភូមិ​តាវៀន សង្កាត់​សាលា​កំរើក ក្រុង​សៀមរាប​។​

​មន្ត្រីនគរបាល​ចរាច​រណ៍​ផ្លូវគោក នៃ​ស្នងការ​នគរបាល ខេត្តសៀមរាប បាន​ប្រាប់​នៅ កន្លែង កើតហេតុ​ថាៈ ជនបង្ក​ឈ្មោះ ប៊ិន ដូ​រិ​ទ្ធ ភេទ​ប្រុស អាយុ​៣៦​ឆ្នាំ មុខរបរ ជា​បុគ្គលិក​ផ្នែក អចលនទ្រព្យ ក្នុង​ក្រុង​សៀមរាប មាន​ស្រុកកំណើត នៅ​ភូមិ​កំពង់​ចន្លុះ ឃុំ​ពាង ស្រុក​ត្បូងឃ្មុំ ខេត្តកំពង់ចាម បើកបរ​រថយន្ត ម៉ាក​តូយ៉ូតា ព្រូស ពណ៌​ស ពាក់​ស្លាក​លេខ ភ្នំពេញ ២.BC.១៩៨២ ស៊េរី ឆ្នាំ​២០១០ មកពី​ទិស​ខាងត្បូង ហើយ​បត់ មក​ទិសខាងកើត បំរុង​ទៅផ្ទះ ។ នៅពេល​មកដល់ ចំណុចកើតហេតុ​នេះ​ជនបង្ក​បាន គេច​ពី​ម៉ូតូ​រ៉ឺម៉ក ហើយក៏​បាន​បើក​ចូល​ផ្ទះ​វេរ​លុយ យីហោ អ៊ី ម៉ា​នី វីរៈ តែម្តង​។​

​ប្រភព​បាន​បញ្ជាក់ថាៈ ម្ចាស់​តូប​ជួល មានឈ្មោះ ឈើ​ត វីរៈ ភេទ​ប្រុស អាយុ​៣៥​ឆ្នាំ មុខរបរ ជា​អាជីវក​រវេរ​លុយ យីហោ អ៊ី ម៉ាន់​នី វីរៈ រស់នៅ​ភូមិ​ចុង​កៅស៊ូ សង្កាត់​ចុង​កៅស៊ូ សង្កាត់​ស្លក្រាម ក្រុង​សៀមរាប​។​

​បច្ចុប្បន្ន ជនបង្ក និង ជនរងគ្រោះ បាន​ត្រូវរ៉ូវ​គ្នា ចំនួន ១.០៥០ ដុល្លារ មាន​ចំនួន​២ តូប​គឺៈ តូប​ទី​១.​ម្ចាស់​វេរ​លុយ បាន​ទារ​សំណង ចំនួន ១.០០០ ដុល្លារ និង​តូប​ទី​២. ម្ចាស់​តូប ជាង​ជួសជុល​ទូរទស្សន៍ ដែល​ខូចខាត​ទូរទស្សន៍ អស់​ចំនួន ៣ គ្រឿង ទារ​សំណង ចំនួន ៥០ ដុល្លារ ដើម្បី​បញ្ចប់រឿង​៕/V​-PC