ដោយៈ​តារា​រិ​ទ្ធ​/​ភ្នំពេញ​៖នៅ​រសៀល​ថ្ងៃទី​២៣​ខែមិថុនា​ឆ្នាំ​២០២១​សម្ដេច​ក្រឡាហោម ស ខេង​ឧបនាយករដ្ឋមន្ត្រី​រដ្ឋ​មន្ត្រី​ក្រសួងមហាផ្ទៃ​បានទទួល​ជួបពិភាក្សាការងារ​ជាមួយ​លោក Vitit Muntarbhorn អ្នករាយការណ៍​ពិសេស​អង្គការសហប្រជាជាតិ​ទទួលបន្ទុក​សិទ្ធិមនុស្ស​នៅ​កម្ពុ​ជាថ្មី តាម​ប្រព័ន្ធ​វីដេអូ Zoom​នៅ​ទី​ស្ដី ការ​ក្រសួងមហាផ្ទៃ ។ នេះ​បើ​យោងតាម​ផេ​ក​ហ្វេ​ស​បុក​ផ្លូវការ​របស់​សម្តេច​ក្រឡា​ហោម ស ខេង នា​ល្ងាច​ថ្ងៃទី ២៤ ខែ មិថុនា​នេះ ។

សម្ដេច​ក្រឡាហោម ស ខេង​ឧបនាយករដ្ឋមន្ត្រី​រដ្ឋ​មន្ត្រី​ក្រសួងមហាផ្ទៃ​បានទទួល​ជួបពិភាក្សាការងារ​ជាមួយ​លោក Vitit Muntarbhorn អ្នករាយការណ៍​ពិសេស​អង្គការសហប្រជាជាតិ​ទទួលបន្ទុក​សិទ្ធិមនុស្ស​នៅ​កម្ពុ​ជាថ្មី តាម​ប្រព័ន្ធ​វីដេអូ Zoom​នៅ​ទី​ស្ដី ការ​ក្រសួងមហាផ្ទៃ ។

​នៅក្នុង​ជំនួប​នោះ​ភា​កី​ទាំងពីរ​បាន​ពិភាក្សាគ្នា​លើ​ប្រធានបទ​ចំនួន ៤ ដែលជា​ការស្នើ​ឡើង​ដោយ​លោក Vitit Muntarbhorn ដើម្បី​ស្នើសុំ​កិច្ចពិភាក្សា​ជាមួយ សម្ដេច​ក្រឡាហោម ស ខេង រួមមាន​៖១.​ទិដ្ឋភាព​រួម​ឬ​ទិដ្ឋភាព​ទូទៅ​នៃ​ជំងឺ​កូ​វីដ​-១៩​នៅ​កម្ពុជា​, ទី​២.​ស្ថានភាព​នៅក្នុង​ពន្ធនាគារ​, ទី​៣. លំហរ​ប្រជាធិបតេយ្យ និង​ដំណើរការ​កែទម្រង់​ច្បាប់​NGOs និង​ទី​៤ វិធានការ​ឆ្លើយតប​ប​ន្ត​បន្ទាប់​ទៀត​នៅក្រោយ​ស្ថានភាព​ជំងឺ​កូ​វីដ​-១៩​។

​នៅក្នុង​កិច្ច​ពិភាក្សាគ្នា​នោះ​ពាក់ព័ន្ធ​នឹង​ទិដ្ឋភាព​ជារួម​នៃ​ជំងឺ​កូ​វីដ​-១៩​នៅ​កម្ពុជា ពាក់ព័ន្ធ​នឹង​ចំណុច​នេះ​ស​ម្ដេ​ក្រឡាហោម​បាន​មានប្រសាសន៍ថា​រាជរដ្ឋាភិបាល កម្ពុជា​មានការ​យកចិត្ត​ទុកដាក់​ខ្ពស់​ដោយបាន​ដាក់ចេញ​នូវ​យន្តការ​និង​វិធានការ​មួយចំនួន​ជា​បន្តបន្ទាប់​រហូតដល់​ពេលនេះ​ក្នុងនោះ​មានការ​បន្ត​ជំរុញ​ផ្សព្វផ្សាយ​លើកកម្ពស់​ការយល់ដឹង​របស់​ប្រជាពលរដ្ឋ​ក្នុង​ការបង្ការ​ទប់ស្កាត់ការជំរុញ​យ​ទ្ធ​នា​ការចាក់​វ៉ាក់សាំង​ជូន​ប្រជាពលរដ្ឋនិង​ការអនុ វត្ត​ការបិទ​ខ្ទប់​តំបន់​មួយ ចំនួន​តាមរយៈ​ការដាក់ចេញ​វិធានការ​បង្រួម​ភូមិសាស្ត្រ​មាន​ហា​នី​ភ័យ ដូចជា​តំបន់​លឿង តំបន់​លឿងទុំ និង តំបន់​ក្រហម​ដើម្បី​បង្ការ​ការឆ្លង​រីក​រាលដាល​ជំងឺ ផង​និង​កាត់បន្ថយ​ផលប៉ះពាល់​ឱ្យ​បានជា​អតិ​ប្ប​មារ​ទៅលើ​ជីវភាព​ពលរដ្ឋ​ដែល​មិន​ស្ថិតនៅក្នុង​តំបន់​ហា​នី​ភ័យ​។ ទន្ទឹមនឹងនេះ​រាជរដ្ឋាភិបាល​កម្ពុជា​បាន​អនុ វត្ត​វិធានការ​ផ្ដល់ជំនួយ​សង្គម​មិ​ច្ច​ដើម្បី​ជួយ​សម្រួល​ដល់​ប្រជាពលរដ្ឋ​ដែល​ទទួលរង​ផលប៉ះពាល់​ដោយសារ​ជំងឺ​នេះ​ផងដែរ ។​

​ចំណូ​ច​ទី​២.​ពាក់ព័ន្ធ​នឹង​ស្ថានភាព​ពន្ធនាគារ​លោក Vitit Muntarbhorn ក៏បាន​ជម្រាបជូន​សម្ដេច ស ខេង ថា​លោក​ក៏បាន​ដឹង​អំពី​បញ្ហា​ចង្អៀត​ណែន​ក្នុង​ពន្ធ​នា គារ​ជាពិសេស​នៅក្នុង​ស្ថានភាព​នៃ​ជំងឺ​កូ​វីដ​-១៩​នេះ​។ លោក​ក៏​ចង់​ស្វែងយល់​បន្ថែម​អំពី​វិធានការ​នានា​របស់​រាជ​រដ្ឋាភិបាល​ក្នុង​ការបង្ការ​ទប់ស្កាត់​ជំងឺ​កូ​វីដ ១៩ ក្នុង​ពន្ធនាគារ​។

​ពាក់ព័ន្ធ​នឹង​ចំណុច​នេះ​សម្ដេច​ក្រឡាហោម ស ខេង បាន​ជម្រាបជូន​ថា​ជាក់ស្ដែង​ក្រៅតែពី​ការខិតខំ​បន្ត​កសាង​និង​ពង្រីក​បន្ថែម​ហេដ្ឋារចនាសម្ព័ន្ធ​ពន្ធនាគារ ដើម្បី​ដោះស្រាយ​បញ្ហា​ចង្អៀត​ណែន​បច្ចុប្បន្ននេះ​ក្រសួងមហាផ្ទៃ​កំពុង​អនុវត្ត​វិធានការ​មួយចំនួនទៀត​ដើម្បី​បន្ធូរបន្ថយ​ភាព​ចង្អៀត​ណែន​ក្នុងស្ថានភាព​កូ​វីដ​-១៩ ក្នុងនោះ​ក្រសួ ងមហាផ្ទៃ​កំពុង​សហការ​ជាមួយ​ក្រសួងយុត្តិធម៌​ដើម្បី​ពិនិត្យ​ស្ថានភាព​អ្នក​ជាប់ឃុំ​ថា​តើ​គួរតែ​អនុវត្ត​នូវ​ការដោះលែង​ឬក៏​អនុញ្ញាតឱ្យ​នៅក្រៅ​ឃុំ​ទៅ​បទល្មើស​ស្រាលៗ​មួយចំនួន​ដូចជា​អ្នកទោស​ជិត​រួច​ទោស​និង​អ្នក​ដែល​ប្រព្រឹត្ត​ទ​ប​ល្មើស​ស្រាល​តាមរយ​ការដាក់ឱ្យ​នៅក្រៅ​ឃុំ​ក្រោម​ការត្រួតពិនិត្យ​ដោយ​តុលា ការ​។​

​សម្ដេច ស ខេង បាន​បន្តថា​ជាមួយគ្នានេះដែរ​ក្រសួងមហាផ្ទៃ​ក៏​បាននិងកំពុង​សហកា​រ​គ្នា​យ៉ាង​ល្អជា​មួយ​ក្រសួងសុខាភិបាល​ដើម្បី​ជំរុញ​ការព្យាបាល​ឱ្យទាន់ ពេលវេលា​ចំពោះ​រាល់​ករណី​ដែល​បាន​រកឃើញ​វិជ្ជមាន​ជំងឺ​កូ​វីដ​-១៩​ក្នុង​ពន្ធនាគារ​និង​បាន​សហការ​ក្នុង​ការចាក់​វ៉ាក់សាំង​ដល់​មន្ត្រី​ពន្ធនាគារ​និង​អ្នក​ជាប់ឃុំ​ក៏​ដូច ជា​បានធ្វើ​តេស​រហ័ស​ដើម្បី​មាន​វិធានការ​ទាន់ពេលវេលា​ក្នុង​ការញែក​អ្នកមាន​ជំងឺ​ចេញ​សំដៅ​ទប់ស្កាត់​ការឆ្លង​រីក​រាលដាល​ឱ្យបាន​ទាន់ពេលវេលា​និង​រួមចំណែក ថែរក្សា​បាន​សុខភាព​ទាំង​ជន​ជាប់ឃុំ និង​មន្ត្រី​អនុរក្ស​ពន្ធនាគារ ដោយ​កិច្ចការ​នេះ​បាន​អនុវត្ត​យ៉ាង​ល្អប្រសើរ​។​

​ចំពោះ​បញ្ហា​លំហរ​ប្រជាធិបតេយ្យ​និង​ដំណើរការ​កែទម្រង់​ច្បាប់​NGOs សម្ដេច​ក្រឡាហោម​បាន​ជម្រាបជូន​ភ្ញៀវ​ថា​ជារួម​រាជរដ្ឋាភិបាល​តែងតែ​ចាត់ទុក​សង្គម ស៊ីវិល​ជា​ដៃគូ​និង​បានធ្វើការ​ជាមួយគ្នា​ជាច្រើន​មកហើយ​ដែរ​ជា​ពិ​សេ​ទៅលើ​សំណើរ​ធ្វើកំណែទម្រង់​ច្បាប់​NGOs​នេះ​ដោយ​សម្ដេច​បាន​ជំរុញ​និង​លើកទឹកចិត្ត ដល់​ភាគី​ទាំងពីរ ទាំង​ភាគី​តំណាង​រាជរដ្ឋាភិបាល​និង​តំណាង​NGOs រួមទាំង​ភាគី​ពាក់ព័ន្ធ​បន្ត​រក​ឱកាស​ជជែក​ពិភាក្សាគ្នា​និង​មាន​កិច្ចសន្ទ នា​ជា​បន្តទៀត​ទោះបី ជា​ស្ថិតក្នុង​ស្ថានភាព​នៃ​ជំងឺ​កូ​វីដ​១៩​ក៏ដោយ​ដើម្បី​ជំរុញ​ការងារ​ពាក់ព័ន្ធ​នឹង​សំណើរ​កែទម្រ ង់​ច្បាប់​នេះ​។​សម្ដេច​បានចាត់ទុក​ថា​នេះ​គឺជា​ឧទាហរណ៍​ជាក់ស្ដែង មួយ​នៃ​ការចូលរួម​លើ​កម្ពស់​លំហរ​ប្រជាធិបតេ យ្យ​នៅ​កម្ពុជា ។​

​ពាក់ព័ន្ធ​នឹង​វិធានការ​ឆ្លើយតប​បន្តបន្ទាប់​នៅក្រោយ​ជំងឺ​កូ​វីដ​-១៩ សម្ដេច​ក្រឡាហោម ស ខេង បាន​ជម្រាប​អ្នករាយការណ៍​ពិសេស​ថា​ជា​ការពិត​នៅលើ​ពិភព លោក​នេះ​និន្នាការ​នៃ​ការឆ្លង​ជំងឺ​កូ​វីដ​-១៩ តួលេខ​មានការ​ថយចុះ​ប៉ុន្តែ​សម្រាប់​កម្ពុជា​ពុំទាន់​មាន​សភាព​ធូរស្រាល​នៅឡើយ​ទេ​ហើយ​សម្រាប់​វិធានការ​បន្តបន្ទាប់ទៀត​ដើម្បី​ស្ដារ​សេដ្ ឋកិច្ច​ក្រោយ​វិបត្តិ​ជំងឺ​កូ​វីដ​១៩​នេះ​ក៏​រាជរដ្ឋាភិបាល​កម្ពុជា​បាននិងកំពុង​យកចិត្តទុកដាក់​គិតគូ​ផងដែរ​ទោះបីជា​ពុំមាន​នរណាម្នាក់​ដឹងថា​ជំងឺ កូ​វីដ​-១៩​នឹង​បញ្ចប់​នៅពេលណា​ក៏ដោយ​។​

​លោក Vitit Muntarbhorn បាន​ថ្លែងអំណរគុណ​សម្ដេច​ក្រឡា​ហោម ស ខេង ចំពោះ​កិច្ចសន្ទនា​និង​ការផ្ដល់ជូន​ព័ត៌មាន​ដ៏​មាន​សារៈសំខាន់​ទៅលើ​ប្រធានបទ ទាំង​៤​ដែល​លោក​បាន​ស្នើសុំ​ពី​ខាងដើម​និង​បាន​ចាត់ទុកថា​ជា​មូលដ្ឋាន​ដ៏​សំខាន់​បន្ថែម​សម្រាប់​លោក​ក្នុងនាម​ជា​អ្នករាយការណ៍​ពិសេស​របស់​អង្គការសហប្រជាជាតិ​ទទួលបន្ទុក​សិទ្ធិមនុស្ស​ប្រចាំ​នៅ​កម្ពុ​ជានា​អាណត្តិ​ថ្មី​នេះ ។​

​សម្ដេច​ក្រឡាហោម ស ខេង និង​លោក Vitit Muntarbhorn បាន​សម្ដែង​នូវ​ក្ដីសង្ឃឹម​ចំពោះ​កិច្ចសហការ​ល្អ​ទៅ វិញទៅមក​ប្រកបដោយ​ភាប​ស្ថាបនា​ដោយ​ក្នុង នោះ​សម្ដេច​ក្រឡាហោម​បាន​ជម្រាបជូន​ថាស​ម្ដេច​ត្រៀមខ្លួន​ជា និច្ច​ក្នុងការ​ចូលរួម​អនុវត្ត​នូវ​យន្តការ​សហប្រតិបត្តិ​ការដែល​មាន​ស្រាប់​រវាង​ភាគី​ទាំងពីរ​ឱ្យទទួល​បាន​ប្រសិទ្ធភាព​ខ្ពស់​។

​សូមបញ្ជាក់ថា​លោក Vitit Muntarbhorn គឺជា​ជនជាតិ​ថៃ​និង​ទើបត្រូវ​បានតែងតាំង​ជា​អ្នករាយការណ៍​ពិសេស​អង្គការសហប្រជាជាតិ​ទទួលបន្ទុក​សិទ្ធិមនុស្ស នៅ​កម្ពុជា​ជំនួស​លោកស្រី រ៉ូ ណា​ស្មី​ត​។ លោក​បាន​ចូលកាន់​តួនាទី​អ្នករាយការណ៍​ពិសេស​ជា​ផ្លូវការ​កាលពី​ថ្ងៃទី​១ ខែឧសភា ឆ្នាំ​២០២១ ៕

លោក Vitit Muntarbhorn អ្នករាយការណ៍​ពិសេស​អង្គការសហប្រជាជាតិ​ទទួលបន្ទុក​សិទ្ធិមនុស្ស​នៅ​កម្ពុ​ជាថ្មី ជាជនជាតិថៃ ៕