ដោយៈ បូកគោ / កំពត​: រដ្ឋបាល​ខេត្តកំពត កាលពី​រសៀល​ថ្ងៃទី​២៤ ខែមិថុនា ឆ្នាំ​២០២១ បានប្រកាស ជូនដំណឹង ស្តីពី​ការរកឃើញ អ្នក​វិជ្ជមាន​កូ​វីដ​១៩​ថ្មី ចំនួន ៣០ នាក់ និង​បាត់បង់​ជីវិត​ម្នាក់ បន្ថែមទៀត​។​

​សេចក្តីប្រកាស មាន​ខ្លឹមសារ​ថាៈ យោងតាម​លទ្ធផល នៃ​ការវិភាគ​វត្ថុ​សំណាក រក​មេរោគ​កូ​វីដ​១៩ និង​សេចក្តីប្រកាស​ព័ត៌មាន របស់​ក្រសួងសុខាភិបាល នៅ​ថ្ងៃទី​២៤ ខែមិថុនា ឆ្នាំ​២០២១ គឺ​បាន​រកឃើញ អ្នកជំងឺ​កូ​វីដ​១៩​ថ្មី ចំនួន ៣០ នាក់​។ ជាមួយនេះ ក៏មាន​អ្នកជំងឺ ស្លាប់​ម្នាក់​ផងដែរ​។​

​ជាមួយនេះដែរ សេចក្តីប្រកាស ក៏បាន​បញ្ជាក់​ផងដែរ​ថាៈ គិត​ត្រឹម​ថ្ងៃទី​២៤ ខែមិថុនា ឆ្នាំ​២០២១ ខេត្តកំពត មាន​អ្នកជំងឺ​កូ​វីដ​១៩ សរុប​ចំនួន ១.១៣៦ នាក់ ក្នុងនោះ​កំពុង សម្រាក​ព្យាបាល ៤០០ នាក់ បានជា​សះស្បើយ ៧២៤ នាក់ និង​ស្លាប់​ចំនួន ១២ នាក់​៕/V​-PC