ដោយ​:​សម្បត្តិ​/​ភ្នំពេញ​:​ បុរស​ម្នាក់​ដែល​បាន​ជិះ​ម៉ូតូ​ហុងដា ហ្សូ​មឺ​អេ​ច ពណ៌​ក្រហម លាយ​ខ្មៅ​ពាក់​ផ្លាកលេខ ភ្នំពេញ 1GV-1987 មក​លោតទឹក​សម្លាប់ខ្លួន​នៅលើ​ស្ពាន ព្រះមុនីវង្ស​ចាស់​ត្រូវបាន​សាច់ញាតិ​ជួល​ឱ្យ​ម្ចាស់​ទូក​រកមើល​ប្រទះឃើញ​ហើយ សព​អណ្ដែត​ទឹក​កាលពី​ល្ងាច ថ្ងៃ​២៤ ខែមិថុនា ឆ្នាំ​២០២១ នៅមុខ​វត្ត​ព្រែកប្រា ក្នុង​សង្កាត់​ព្រែកប្រា ខណ្ឌ​ច្បារអំពៅ រាជធានី​ភ្ន​ពេញ​។​

​សព​ឈ្មោះ សុខ ខាថ​លី អាយុ​៤៥​ឆ្នាំ សព្វថ្ងៃ​រស់នៅ​ជាមួយ​បងប្អូន​នៅ​បុរី​ប៉េ​ត​ហួត មានកំណើត​ស្រុកកំណើត នៅ​ខេត្តកណ្តាល​។​

​បើតាម​ប្រភពព័ត៌មាន​ពី​បងប្រុស​របស់​អត្តឃាត​ជន​បានឱ្យដឹងថា ប្អូន​របស់គាត់ ឈ្មោះ សុខ ខាថ​លី បានមក​រស់នៅ​ផ្ទះ​បងប្អូន​នៅ​បុរី​ប៉េង​ហួត បាន​បី​ខែ​ហើយ បន្ទាប់ពី​លក់ ផ្ទះ​នៅ​ស្ទឹងមានជ័យ ហើយ​នៅ​យប់​ថ្ងៃទី​២១ ខែមិថុនា នា​វេលា​ម៉ោង​៦​ព្រលប់ ខាថ​លី បាន​បើករថយន្ត​របស់ខ្លួន​គាត់​ម៉ាក Range rover ពណ៌​ស ពាក់​ផ្លាកលេខ ភ្នំពេញ 2BK-9779 យកមក​ទុក​នៅផ្ទះ​បងប្អូន​របស់គាត់ រួច​បាន​ខ្ចី​ម៉ូតូ​ក្មួយ​ដោយបាន​ប្រាប់ថា ជិះ​ចេញមកក្រៅ​តែមួយ​ភ្លេ​ត​ទេ​។ បាន​មួយសន្ទុះ​ក្រោយមក​ក៏​ស្រាប់​តែមាន​គេ​ទូរស័ព្ទ មក​ប្រាប់​គាត់​ថា មាន​បុរស​ម្នាក់ បាន​ជិះ​ម៉ូតូ​ម៉ាក ហុងដា ហ្សូ​មឺ​អេ​ច​ពណ៌​ក្រហម លាយ​ខ្មៅ ពាក់​ផ្លាកលេខ ភ្នំពេញ 1GV-1987 មក​លោតទឹក​សម្លាប់ខ្លួន នៅលើ​ស្ពាន ព្រះមុនីវង្ស​ចាស់ (​សង្កាត់​ទន្លេបាសាក់ ខណ្ឌចំការមន​) ។ ភ្លាមនោះ រូបគាត់ ក៏បាន​ចុះមក​ពិនិត្យមើល​ជាក់ស្ដែង ឃើញ​ពិតជា​ម៉ូតូ​របស់​ក្មួយ​ពិតប្រាកដ​មែន ទើប​ជួល​ទូក​ប្រជាពលរដ្ឋ ឱ្យជួយ​រកមើល​ទាំងយប់​ថ្ងៃទី​២១​ខែមិថុនា ដែលជា​ថ្ងៃ​កើត ហេតុតែ​មិនឃើញ​។ រហូតមកដល់​ល្ងាច​ថ្ងៃទី​២៤ ខែមិថុនា​ទើប​រកឃើញ​សព អណ្ដែត​ទឹក នៅមុខ​វត្ត​ព្រែកប្រា ក្នុង​សង្កាត់​ព្រែកប្រា ខណ្ឌ​ច្បារអំពៅ​តែម្តង​។ ចំពោះ​មូលហេតុ ដែល​ប្អូនប្រុស​របស់គាត់ បានមក​លោតទឹក​សម្លាប់​ខ្លួន​នេះ រូបគាត់​ក៏​មិនទាន់​ដឹងថា​មាន​វិបត្តិ​អ្វី​ឱ្យ​ពិតប្រាកដ​នោះទេ​។​

​សមត្ថកិច្ច​ជំនាញ​ចុះមក​ពិនិត្យមើល និង​ធ្វើ​កោសល្យវិច័យ​រួចរាល់ ក៏​ប្រគល់​សព បុរស​ខាងលើនេះ​ឱ្យទៅ​ក្រុមគ្រួសារ​សាច់ញាតិ​ដឹកយក​ទៅធ្វើ​បុណ្យ​តាម​ប្រពៃណី​នៅឯ​ស្រុកកំណើត នៅ​វត្ត​ជ្រៃ ខេត្តកណ្តាល​៕​/PC