​ប្រែ​សម្រួល : កញ្ញា​ដា​លី​ស ៖ សហព័ន្ធ​បាល់ទាត់​អាម៉េរិក​ខាងត្បូង (CONMEBOL)​បាន​ពិន័យ​គ្រូបង្វឹក​ប្រេ​ស៊ីល​ចំនួន ៥.០០០ ដុល្លារ​កាលពី​ថ្ងៃ​ព្រហស្បតិ៍​ទី​២៤​មិថុនា​ពី​បទ​រិះគន់​ការរៀបចំ​ការប្រកួត Copa America​។​

​ការដាក់ទណ្ឌកម្ម​នេះ​បាន​កើតឡើង​តិចជាង​មួយ​សប្តាហ៍​បន្ទាប់ពី​កីឡាករ​បូ​លី​វី​ម្នាក់​ត្រូវបាន​ដាក់​ទណ្ឌកម្ម​ផងដែរ​សម្រាប់​ការវាយប្រហារ​ការប្រកួត​នេះ ដែល​កំពុង​ធ្វើ​ឡើង​ចំពេល​មាន​ការរីក​រាលដាល​នៃ​ជំងឺ​កូវី​ដ​១៩ នៅក្នុង​តំបន់​បន្ទាប់ពី​ម្ចាស់ផ្ទះ​ដើមពីរ​គឺ​កូឡុំប៊ី​និង​អា​ហ្សង់​ទីនបាន​ដកខ្លួន​ចេញ​។​

​លោក​ទី​តេ​បាន​និយាយ​នៅក្នុង​សន្និសីទ​សារព័ត៌មាន​កាល​ពី​ថ្ងៃទី ១២ មិថុនា​ថា Copa America ត្រូវបាន​ផ្លាស់​មក​លេង​នៅ​ប្រទេស​របស់​គាត់​ក្នុង “​លក្ខណៈ​ច្របូកច្របល់​”​។ សហព័ន្ធ CONMEBOL បាន​ជ្រើសតាំង​ប្រេ​ស៊ីល​ជា​ម្ចាស់ផ្ទះ​តិចជាង​ពីរ​សប្តាហ៍​មុន​ពេល​ការប្រកួត​ចាប់ផ្តើម​។​

CONMEBOL បាន​និយាយថា សហព័ន្ធ​បាល់ទាត់​ប្រេ​ស៊ីល​មិន​អាច​ប្តឹង​ឧទ្ធរណ៍​ចំពោះ​ការសម្រេចចិត្ត​ប្រឆាំងនឹង​លោក​ទីតេ​បានទេ​។​

​លោក អេឌូ​អាដូ ហ្គ្រោ​ស ប្រោ​ន ប្រធាន​គណៈកម្មកា​រវិ​ន័យរ​បស់ CONMEBOL បាន​បន្ថែមថា លោក​ទីតេ​អាច​រង​នូវ​ការពិន័យ​ថ្មី ប្រសិនបើ​គាត់​រិះគន់​អ្នករៀបចំ​ការប្រកួត​ម្តងទៀត​។​

​លោក​ទី​តេ​បាន​រិះគន់ CONMEBOL កាលពី​ថ្ងៃ​ពុធ បន្ទាប់​ពី​ជ័យជម្នះ ២-១ របស់​ប្រេ​ស៊ីល​លើកូ​ឡុំប៊ី​នៅ​ទីក្រុង​រី​យ៉ូ​។​

​លោក​បាន​និយាយថា “​ខ្ញុំ​នឹង​មិន​ហៅ​ទីលាន​នេះ​ថា​យ៉ាប់​នោះទេ​ប៉ុន្តែ​វា​អន់​ខ្លាំងណាស់​សម្រាប់​លេង​បាល់ទាត់ វា​ប៉ះពាល់​ដល់​ទស្សនីយភាព​ទាំងមូល​។ អ្នក​ដែល​មាន​ឆន្ទៈ​លេង​ឱ្យបាន​ល្អ គឺ​ធ្វើ​មិន​បាន​ទេ​។ ពេលវេលា​រៀបចំ Copa America គឺ​ខ្លី​ណាស់​។ វា​មិន​អាច​ទទួលយក​បាន​ទេ​ដែល​កីឡាករ​មកពី​ពីរ​ក្រុម​ដែល​មាន​កម្រិត​លេង​ខ្ពស់ ដែល​លេង​ជាមួយ​ទីលាន​ដ៏​អស្ចារ្យ​នៅ​អឺរ៉ុប បែរជា​មក​ទី​នេះ​ដើម្បី​លេង​នៅលើ​ទីលាន​បែបនេះ​”៕

​លោក​ទី​តេ​ត្រូវ​បានផាក ៥.០០០ ដុល្លារ​ពី​បទ​រិះគន់ CONMEBOL