ដោយៈ វ៉ៃ​កូ / ស្វាយរៀងៈ លោក​ទេសរដ្ឋមន្ត្រី លី ធុជ ប្រធាន​ក្រុមការងារ រាជរដ្ឋាភិបាល ចុះ​មូលដ្ឋាន ក្រុង​បាវិត តំណាង​លោកស្រី កិត្តិ​សង្គហ​បណ្ឌិត ម៉ែន សំអន ឧបនាយករដ្ឋមន្ត្រី និង​ជា​ប្រធាន​ក្រុមការងារ រាជរដ្ឋាភិបាល​ចុះ​មូលដ្ឋាន ខេត្តស្វាយរៀង នា​ព្រឹក​ថ្ងៃទី​២៦ ខែមិថុនា ឆ្នាំ​២០២១ នេះ បាន​អំពាវនាវ​ឲ្យ ប្រជាពលរដ្ឋ បន្ត​ចូលរួម​មហា​ចលនា​គ្រួសារ​ខ្មែរ​តែមួយ ជាតិ​តែមួយ អនាគត​តែមួយ និង​គោលដៅ​តែមួយ ក្រោម​ម្លប់​ដឹកនាំ​របស់​គណបក្ស​ប្រជាជន​កម្ពុជា ដែលមាន សម្តេច​អគ្គមហាសេនាបតី តេ​ជោ ហ៊ុន សែន ជា​ប្រធាន​។​

​លោក​ទេសរដ្ឋមន្ត្រី លី ធុជ បានលើកឡើង​បែបនេះ ក្នុងឱកាស​អញ្ជើញ​ជា​អធិបតី ក្នុង​ពិធី​ខួប​អនុស្សាវរីយ៍ លើក​ទី​៧០ នៃ​ការបង្កើត​គណបក្ស​ប្រជាជន​កម្ពុជា និង​ផ្សព្វផ្សាយ “​ផែនការ​សកម្មភាព សម្រាប់​ការបោះឆ្នោត ជ្រើសរើស​ក្រុមប្រឹក្សា ឃុំ​-​សង្កាត់ អាណត្តិ​ទី​៥ ឆ្នាំ​២០២២” នៅ​ក្រុង​បាវិត ខេត្តស្វាយរៀង ដែលមាន ការចូលរួម​ពី ក្រុមការងារ​គណបក្ស ចុះជួយ​សង្កាត់​ទាំង​៥ សមាជិក សមាជិកា គណៈកម្មាធិការ គណបក្ស​ក្រុង និង​គណៈកម្មាធិការ គណបក្ស​សង្កាត់​។​

​ក្នុងឱកាស​នេះដែរ លោក​ទេសរដ្ឋមន្ត្រី លី ធុជ និង​សហការី ក៏បាន​អញ្ជើញ​ដំឡើង ប៉ាណូ គណបក្ស ជា​និមិត្តរូប ដើម្បី​អបអរសាទរ ខួប​អនុស្សាវរីយ៍ លើក​ទី​៧០ នៃ​ការបង្កើត​គណបក្ស​ប្រជាជន​កម្ពុជា នៅមុខ ទីស្នាក់ការ​គណបក្ស​ស​ង្កា​ត់បា​ទី ក្រុង​បាវិត​៕/PC