ដោយៈ ទេព​មង្គល / ភ្នំពេញៈ ក្រសួងសុខាភិបាល ប្រកាស​ហាមឃាត់​ផ្សព្វផ្សាយ និង​លក់​ឱសថ​បុរាណ​ចិន LIANHUA QINGWEN JIAONANG ខុសច្បាប់ ក្រោយពី បាន​ពិនិត្យឃើញ មាន​គណនី បណ្តាញ​សង្គម​ហ្វេ​ស​ប៊ុ​ក ចំនួន ៨ បាន​ផ្សព្វផ្សាយ​លក់ ដោយ​ភូតកុហក បោកប្រាស់ និង​បំផ្លើស ហួស​ពី​ការពិត ដោយ​គ្មាន​មូលដ្ឋាន វិទ្យាសាស្ត្រ​ត្រឹមត្រូវ ថា​អាច​ព្យាបាល​ជំងឺ​កូ​វីដ​-១៩ បានជា​ដើម​…​។ ក្រសួងសុខាភិបាល ក៏បាន​ព្រមាន​ប្រជាពលរដ្ឋ​ទាំងអស់ ត្រូវ​បញ្ឈប់​ការទិញ ឱសថ​បុរាណ​ចិន​នេះ ក៏ដូចជា ឱសថ​បុរាណ ឬ​ឱសថ​ផ្សេងៗ​ទៀត ដែល​លក់​តាម​អន​ឡាញ គ្រប់​ប្រភេទ​ដើម្បី​ជៀស វាង​ការខាតបង់ ប្រាក់កាស និង​ប៉ះពាល់​ដល់​សុខភាព ឬ​ឈានដល់​បាត់បង់ អាយុជីវិត​របស់ អ្នកប្រើប្រាស់ និង​ព្រមាន ចាត់វិធានការ ដ៏​តឹងរ៉ឹង ទៅតាម​ច្បាប់ ស្តីពី​ច្បាប់​វិសោធនកម្ម ច្បាប់​ស្តីពី​ការគ្រប់គ្រង​ឱសថ ជា​ធរមាន​ចំពោះ​ម្ចាស់​គណនី ហ្វេ​ស​ប៊ុ​ក និង​គណនី​ផ្សេងៗ​ទៀត ពាក់ព័ន្ធ​នឹង​ករណីនេះ​។​

​យោងសេចក្តី​ជូន​ព័ត៌មាន ចុះ​ថ្ងៃទី​២៥ ខែមិថុនា ឆ្នាំ​២០២១ ក្រសួងសុខាភិបាល នៃ​ព្រះរាជាណាចក្រ​កម្ពុជា សូម​ជម្រាបជូន​ដល់ សាធារណជន​ទាំងអស់​ឲ្យ​បាន ជ្រាបថាៈ យោងតាម​ការ​ពិនិត្យឃើញ មាន​គណនី បណ្តាញ​សង្គម​ហ្វេ​ស​ប៊ុ​ក (Facebook) ចំនួន ៨ ឈ្មោះ​៖ ១-Global Products , ២-​សុខភាព​ប្រចាំថ្ងៃ , ៣-M-Online Shop G , ៤-JHRWS d , ៥-dynanos , ៦-Lianhua Qingwen Capsule , ៧ -R&N Supply 999 online shop , ៨-Morakot លក់​អាកុល​សុទ្ធ ១00% និង​គណនី​ផ្សេងៗ មួយចំនួនទៀត រួមទាំង​ឱសថស្ថាន ឱសថស្ថាន​រង អគារ​លក់ ឱសថ​បុរាណ​មួយចំនួន កំពុង​ផ្សព្វផ្សាយ និង​លក់​ឱសថ​បុរាណ​ចិន LIANHUA QINGWEN JIAONANG គ្មាន​លេខ​បញ្ជិកា និង​គ្មាន​ក្រុមហ៊ុន នាំចូល​ត្រឹមត្រូវ ព្រមទាំង​កំពុង​ផ្សព្វផ្សាយ ភូតកុហក បោកប្រាស់ និង​បំផ្លើស ហួស​ពី​ការពិត ដោយ​គ្មាន​មូលដ្ឋាន​វិទ្យាសាស្ត្រ ត្រឹមត្រូវ ថា​អាច​ព្យាបាល​ជំងឺ កូ​វីដ​-១៩ បានជា​ដើម​…​។​

​អនុលោម​តាមច្បាប់ ស្តីពី​ការគ្រប់គ្រង​ឱសថ និង​ច្បាប់​ស្ដីពី វិសោធនកម្ម​ច្បាប់ ស្ដីពី​ការគ្រប់គ្រង​ឱសថ តម្រូវឱ្យ​រាល់​ការលក់​ឱសថ ឬ​ឱសថ​បុរាណ ក្នុង​ព្រះរាជា ណា​ចក្រ​កម្ពុជា ត្រូវមាន​លេខ​ទិដ្ឋាការ ឬ​បញ្ជិកា ពី​ក្រសួងសុខាភិបាល​ហើយ​តម្រូវ ឱ្យ​លក់ នៅក្នុង​ឱសថស្ថាន ឱសថស្ថាន​រង និង​អគារ​លក់​ឱសថ​បុរាណ​ស្របច្បាប់ តែប៉ុណ្ណោះ​។ ដូច្នេះ សូម​ប្រជាពលរដ្ឋ មុននឹង​ទិញ​ឱសថ ឬ ឱសថ​បុរាណ គ្រប់​ប្រភេទ សូម​ពិនិត្យមើល​ល​តាប​ត្រ​បញ្ជិកា ដែលមាន​បិទ​លើ​សំបក វេច​ខ្ចប់​ត្រឹមត្រូវ គឺមាន ២​ផ្នែក ១-​ផ្នែក ខាងលើ មានឈ្មោះ​គ្រឹះស្ថាន​អាហរ័ណ នីហរ័ណ , ២-​ផ្នែក​ខាងក្រោម មាន​លេខ​បញ្ជិកា ដូច​មាន​គំរូ​ភ្ជាប់​ជាមួយ​។​

​ក្រសួងសុខាភិបាល សូម​ជម្រាបជូន​ដល់ សាធារណជន​ជ្រាបថា បន្ទាប់ពី​ក្រសួង សុខាភិបាល បាន​ទិញ​ឱសថ ផលិតផល បំប៉ន​សុខភាព ឬ​ឱសថ​បុរាណ​ដែល​លក់​តាម ប្រព័ន្ធ​អន​ឡាញ មក​ធ្វើការ​ត្រួតពិនិត្យ​គុណភាព បាន​ពិនិត្យឃើញថា ផលិតផល ទាំងនោះ ភាគច្រើន ពុំ​អាច​ធានាបាន នូវ​គុណភាព​បានឡើយ គឺជា​ផលិតផល មានគុណ​ភាពមិន​ត្រឹមត្រូវ ឬ​ក្លែងក្លាយ​ទៀតផង​។​

​ដើម្បី​ជៀសវាង​ការខាតបង់​ប្រាក់កាស និង​ប៉ះពាល់​ដល់​សុខភាព ឬ​ឈានដល់​បាត់បង់ អាយុជីវិត​របស់ អ្នកប្រើប្រាស់​ទៀត​នោះ ក្រសួងសុខាភិបាល សូម​ណែនាំ​ដល់​បងប្អូន ប្រជាពលរដ្ឋ​ទាំងអស់ ត្រូវ​បញ្ឈប់ ការទិញ ឱសថ​បុរាណ​ចិន LIANHA QINGWEN JIAONANG ក៏ដូចជា ឱសថ​បុរាណ ឬ​ឱសថ​ផ្សេងៗ​ទៀត ដែល​លក់​តាម​អន​ឡាញ គ្រប់​ប្រភេទ ដោយ​ត្រូវ​ទិញ​ឱសថ ឬ​ឱសថ​បុរាណ ដែលមាន​លេខ​ទិដ្ឋាការ ឬ​បញ្ជិកា​ត្រឹមត្រូវ ពី​តាម​ឱសថស្ថាន ឱសថស្ថាន​រង ឬ​អគារ​លក់​ឱសថ​បុរាណ ស្របច្បាប់​។​

​ក្រសួងសុខាភិបាល នឹងមាន​វិធានការ​តឹងរ៉ឹង ទៅតាម​ផ្លូវច្បាប់ ចំពោះ​ម្ចាស់​គណនី ហ្វេ​ស​ប៊ុ​ក ខាងលើ និង​គណនី​ផ្សេងៗ​ទៀត ដែល​បាននិងកំពុង​នាំចូល ចែកចាយ និង​ផ្សព្វផ្សាយ​លក់ ឱសថ​បុរាណ​ចិន ខាងលើ ទៅតាម​ច្បាប់ ស្តីពី​ច្បាប់​វិសោធនកម្ម ច្បាប់​ស្តីពី​ការគ្រប់គ្រង​ឱសថ ជា​ធរមាន​។​

​ក្នុងករណី​បងប្អូន​សាធារណជន ត្រូវការ​ព័ត៌មាន​បន្ថែម សូម​ទំនាក់ទំនង​មក​នាយកដ្ឋាន ឱសថ ចំណីអាហារ បរិក្ខារ​ពេទ្យ និង​គ្រឿងសំអាង នៃ​ក្រសួងសុខាភិបាល​តាមរ​យៈ ទូរស័ព្ទ​លេខ ០១២ ៣៥៥ ១៦១, ០១១ ៥៧៤ ៧៨៧, ០១២ ៩៨៣ ៣៣៤០១៧ ៦០៦ ៦៧០០១៧ ៨៦៦ ៧៦០ ៕/V-PC