ដោយ​: ពៅ​និមល​/​ភ្នំពេញៈ ដោយសារ​ករណី​ពុល​ស្រា​បានកើត​ឡើងជា​បន្តបន្ទាប់​នៅតាម​បណ្តា​ខេត្ត​មួយចំនួន អគ្គនាយកដ្ឋាន ការពារ​អ្នកប្រើប្រាស់ កិច្ចការ​ប្រកួតប្រជែង និង​បង្ក្រាប​ការ​ក្លែងបន្លំ (​ក​.​ប​.​ប​) នៃ​ក្រសួងពាណិជ្ជកម្ម បាន​បើក​យុទ្ធនា​ការចុះ​យក​គំរូ​ស្រាស ស្រាថ្នាំ​នៅ​ទូទាំងប្រទេស ដើម្បី​វិភាគ​រក​សារធាតុ​មេ​តា​ណុល​។​

​មានប្រសាសន៍ប្រាប់​រស្មី​កម្ពុជា​កាលពី​ថ្ងៃទី​២៦ ខែមិថុនា ឆ្នាំ​២០២១​កន្លងទៅ លោក ផាន អូន ប្រតិភូ​រាជរដ្ឋាភិបាល​ទទួលបន្ទុក​ជា​អគ្គនាយក ក​.​ប​.​ប បាន​ឲ្យ​ដឹងថា ដោយមាន​ការណែនាំ​រប​ស់លោក​រដ្ឋមន្ត្រី ប៉ាន សូរ​ស័ក្តិ លោក​បានដាក់​ចេញ​នូវ​យុទ្ធនា​ការឱ្យ​មន្ត្រី​នៅតាម​បណ្តា​សាខា ក​.​ប​.​ប រាជធានី ខេត្ត ចុះ​យក​សំណាក​គំរូ​ស្រាស ស្រាថ្នាំ នៅតាម​បណ្តា​ទីតាំង​ផលិត និង​កន្លែង​លក់​ស្រាស ស្រាថ្នាំ ក្នុង​ក្របខណ្ឌ​ទូទាំងប្រទេស​មក​វិភាគ​រកសារ​ធាតុ​មេ​តា​ណុល​នៅ​មន្ទីរពិសោធន៍​របស់​អគ្គ​នាយកដ្ឋាន ក​.​ប​.​ប​.​។ លោក​បាន​បន្តថា ជាក់ស្តែង​ក្នុង​ខែមិថុនា​នេះ មន្ត្រី​សាខា ក​.​ប​.​ប​. នៅតាម​បណ្តា​រាជធានី ខេត្ត​ចំនួន​១៧ បាន​ចុះ​យក​គំរូ​ស្រាស ស្រាថ្នាំ​មក​វិភាគ​នៅ​មន្ទីរពិសោធន៍​អគ្គនាយកដ្ឋាន ក​.​ប​.​ប​. បាន​ចំនួន​១៧៨​គំរូ​។ ក្នុងនោះ​យោងតាម​លទ្ធផល​វិភាគ សំណាក​គំរូ​ស្រា​អស់នោះ ពុំមាន​វត្តមាន​សារធាតុ​មេ​តា​ណុល​ដែលជា​សារធាតុ​បង្ក​គ្រោះ​ឡើយ​។
​ពាក់ព័ន្ធ​យុទ្ធនាការ​ខាងលើនេះ លោក ផាន អូន លើកឡើង​បន្តថា អគ្គនាយកដ្ឋាន ក​.​ប​.​ប​. នឹង​បន្ត​យុទ្ធនា​ការចុះ​អប់រំ ផ្សព្វផ្សាយ​ការយល់ដឹង និង​យក​សំណាក​គំរូ​ស្រាស​និង​ស្រាថ្នាំ ឲ្យ​បាន​គ្រប់​រាជធានី ខេត្ត ពិសេស​តំបន់​ដាច់ស្រយាល​មក​វិភាគ​រកសារ​ធាតុ​បង្ក​គ្រោះ ដើម្បី​ទប់ស្កាត់​ករណី​ពុល​ស្រា​មិនឱ្យ​កើតឡើង​បន្តទៀត​។

​សូមបញ្ជាក់ថា គិត​ចាប់ពី​ខែមករា រហូត​ត្រឹម​ខែមិថុនា​នេះ អ្នកស្លាប់​បាត់បង់​ជីវិត​ដោយសារ​ករណី​ពុល​ស្រាស ចំនួន​សរុប​ប្រមាណ​ជាង ៤០​នាក់ ដែល​ករណីនេះ​បានកើត​ឡើង​នៅក្នុង​ខេត្ត​ចំនួន​៤​គឺ ខេត្តពោធិ៍សាត់ កណ្តាល ព្រៃវែង និង​ខេត្តកំពត​៕​