ដោយៈតារារិទ្ធ/ភ្នំពេញ៖វ៉ាក់សាំងការពារកូវីដ១៩(ស៊ីណូវ៉ាក់)ដែលរាជរដ្ឋាភិបាលបានបញ្ជាទិញពីក្រុមហ៊ុនចិនចំនួន ១​ លានដូសទៀតបានដឹកមកដល់កម្ពុជាហើយនៅវេលាម៉ោងប្រមាណ១០​៖៣០​ នាទី ព្រឹកថ្ងៃទី ២៨ ខែមិថុនានេះតាមជើងយន្តហោះក្រុមហ៊ុនឯកជនរបស់ប្រទេសចិន។

គិតត្រឹមថ្ងៃទី ២៨ ខែ មិថុនា​ ២០២១ នេះកម្ពុជាទទួលបានវ៉ាក់សាំង​​សរុប ១១,០២៤,០០០ រួចហើយ​ភាគច្រើនបំផុត​ជា​វ៉ាក់សាំង​ជំនួយ និង​ទិញ​ពី​ប្រទេស​ចិន ។ វ៉ាក់សាំង​ដែល​កម្ពុជា​ទទួលបាន​រួចមកហើយ​នោះ​រួមមាន​វ៉ាក់សាំង​ស៊ី​ណូ​ហ្វា​ម​(Sinopharm)​ជា​ជំនួយ​របស់​រដ្ឋាភិបាល​ចិន​ចំនួន ២,២ លាន​ដូ​ស​,​វ៉ាក់សាំង​ស៊ី​ណូ​ហ្វា​ម ១ លាន​ដូ​សទិញ​ពី​ក្រុមហ៊ុន​ស៊ី​ណូ​ហ្វា​ម​,​វ៉ាក់សាំង​ស៊ី​ណូ​វ៉ា​ក់​(Sinovac)​ទិញ​ពី​ប្រទេស​ចិន​ចំនួន​៧,៥ លាន​ដូ​ស​និង​វ៉ាក់សាំង​អា​ស្ត្រា​ហ្សេ​នី​កា(Astra Zeneca)​ជំនួយ​របស់​ខូ​វ៉ា​ក់ (Covax Facility) តាម​អង្គការ​សុខភាព​ពិភពលោក (WHO) ចំនួន​៣២៤,០០០​ដូ​ស ។

លោក វង្សី វិស្សុត រដ្ឋមន្ត្រីប្រតិភូអមនាយករដ្ឋមន្ត្រីនិងជារដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុ បានថ្លែងឱ្យដឹងកាលពីថ្ងៃទី ២៦ ខែមិថុនា ២០២១ ថា កម្ពុជានឹងទទួលបានវ៉ាក់សាំងគ្រប់ចំនួន ២០ លានដូសនៅត្រឹមខែសីហាឆ្នាំ២០២១នេះ ។ ដោយក្នុងនោះខែកក្កដាកម្ពុជានឹងទទួលបានវ៉ាក់សាំង ៥លានដូស និងខែសីហាចំនួន ៤ លានដូសទៀតដែលជាវ៉ាក់សាំងរាជរដ្ឋាភិបាលបានបញ្ជាតិញពីក្រុមហ៊ុនចិន ។

តាមរយៈវត្តមានវ៉ាក់សាំងដែលបានមកដល់មុនផែនការកំណត់ លោក វង្សី វិស្សុត បានឲ្យដឹងថាបើ​មិនមាន​ការប្រែប្រួល​ទេ​នៅ​សប្តាហ៍នេះ លោ​ឧបនាយករដ្ឋ មន្ត្រី អូន​ព័ន្ធ មុនី​រ័ត្ន រដ្ឋមន្ត្រីក្រសួង​សេដ្ឋកិច្ច និង ហិរញ្ញវត្ថុ​នឹង​បើក​កិច្ចប្រជុំ​ដើម្បី​ធ្វើ​ការកែសម្រួល​ផែ​នា​ការចាក់​វ៉ា​ក់​ដែល​យើង​បានកំណត់​នៅក្នុង​«​យុទ្ធនាការ​ជាតិ​ចាក់​វ៉ាក់សាំង​បង្ការ​ជំ​ង​កូដ​-១៩ នៅ​តំបន់​អាទិភាព​ខ្ពស់​សំដៅ​បង្កើត​ឲ្យ​បាន​នូវ​ភាពស៊ាំ​សង្គម​សេដ្ឋកិច្ច​នៅ​កម្ពុជា​នៅក្នុង​ឆ្នាំ​២០២១» ដែលមុននេះរាជរដ្ឋា ភិបាលមានផែនការចាក់វ៉ាក់សាំងជូនពលរដ្ឋដោយមិនគិត ថ្លៃដល់គោលដៅដែលត្រូវចាក់វ៉ាក់សាំងប្រមាណ១០លាននាក់ឲ្យរួចរាល់នៅក្នុងឆ្នាំ២០២២ ។លោក រំពឹងថា​ក្នុងអំឡុងពេល​ខែតុលា​ឬ​ខែវិច្ឆិកាកម្ពុជា​អាច​ចាក់​វ៉ាក់សាំង​ជូន​ប្រជាពលរដ្ឋ​គ្រប់ចំនួន​១០​លាន​នាក់ ។ ជាមួយនេះរាជរដ្ឋាភិបាល​ក៏បាន​កំពុង​គិតគូរផង ដែរ​ទៅលើ​ការចាក់​វ៉ាក់សាំង​ដល់​កុមារ​អាយុ​ពី​១២ ឆ្នាំ ទៅ ១៨ ឆ្នាំ និង ការចាក់​វ៉ាក់សាំង​សម្រាប់​ដូ​ស​ទី​៣ ។​

សូមបញ្ជាក់ថាគិតចាប់ពីថ្ងៃទី១០ខែកុម្ភៈរហូតដល់ថ្ងៃទី២៦ខែមិថុនា នេះកម្ពុជាចាក់វ៉ាក់សាំងជូនប្រជាពលរដ្ឋនិងជនបរទេសរស់នៅនិងធ្វើការនៅកម្ពុជាដោយ មិនគិតលុយបានចំនួន ៣,៨៨៦,៥៣៤ នាក់ដូសទី១ និង ចាក់វ៉ាក់សាំងដូសទី២ ​បានចំនួន ២,៨៤៣,២០២ នាក់ស្មើនឹង ៣៨.៨៧ ភាគរយនៃចំនួនប្រជាជន គោលដៅចាក់វ៉ាក់សាំងសរុប ១០ លាននាក់ ៕