ដោយ​៖ រ៉ា​ម៉ន / ភ្នំពេញ​៖ ប្រជាពលរដ្ឋ ដែល​មកចាក់​វាក់​សាំង កាលពី​ថ្ងៃអាទិត្យ ទី​២៧ មិថុនា និង​នៅ​ព្រឹក ថ្ងៃទី​២៨ មិថុនា​នេះ នៅតែ​បន្ត​សម្រុក មក​ទទួល​ការចាក់​វ៉ាក់សាំង ក្រោយពី​អាជ្ញាធរ រាជធានី​ភ្នំពេញ កាល​ថ្ងៃទី​២៥ ខែមិថុនា ឆ្នាំ​២០២១ បានចេញ សេចក្តីជូនដំណឹង ស្តីពី​កាលបរិច្ឆេទ ចុងក្រោយ នៃ​ការចាក់​វ៉ាក់សាំង ជូន​ប្រជាពលរដ្ឋ នៅ​ភូមិសាស្ត្រ​រាជ ធានី​ភ្នំពេញ ដោយ​ចាប់ផ្តើម ពីថ្ងៃ​ទី​២៧ មិថុនា ដល់​ថ្ងៃទី​៨ ខែកក្កដា ឆ្នាំ​២០២១ ។​

​លោក ឃួ​ង ស្រេង អភិបាល​រាជធានី​ភ្នំពេញ និង​ជា​អនុប្រធាន​គណៈកម្មការ ចំពោះ​កិច្ច​ចាក់​វ៉ាក់សាំង​កូ​វីដ​-១៩ តែង​បាន​ចុះ​ធ្វើការ​ត្រួតពិនិត្យ ទីតាំង​ចាក់​វ៉ាក់សាំង ជារឿយៗ និង​បាន​ជម្រុញ​អោយ ក្រុមការងារ ក្រុមគ្រូពេទ្យ និង​អាជ្ញាធរ​ដែនដី សម្រុក​ចាក់​វ៉ាក់សាំង​នេះ អោយបាន​លឿន និង​បាន​គ្រប់គ្នា សម្រាប់​អ្នករស់នៅ​ភ្នំពេញ យ៉ាងយូរបំផុត ក្នុងអំឡុង​ខែមិថុនា ឆ្នាំ​២០២១ ស្របតាម​ការកំណត់ របស់​រាជ​រដ្ឋា ភិ​បាល ដើម្បី​កាត់ផ្តាច់ អោយបាន នូវ​ការឆ្លង​រីក​រាលដាល ជំងឺ​កូ​វីដ​-១៩ ក្នុង​ព្រឹ​ត្ត​ការណ៍​សហគមន៍ ២០ កុម្ភៈ​។​

​ប្រជាពលរដ្ឋ នៅ​ខណ្ឌ​ច្បារអំពៅ ដែល​បានមក​ចាក់​វ៉ាក់សាំង​បង្ការ​ជំងឺ​កូ​វីដ​-១៩ បានបញ្ជាក់​ឱ្យដឹងថាៈ ចំពោះ​ការយឺតយ៉ាវ និង​បានមក​ទទួល ការចាក់​វ៉ាក់សាំង​នេះ ដោយសារតែ​នៅពេល​អាជ្ញាធរ អញ្ជើញ​ឱ្យ​ពួកគាត់ មកចាក់​នោះ ពួកគាត់​មាន​ជំងឺ និង​មួយចំនួនទៀត ជាប់​ទៅ​ស្រុកកំណើត ទើប​អាក់ខាន មិន​បានមក​ទទួល ការចាក់​វ៉ាក់សាំង​នេះ ។ ពួកគាត់​ពិតជា​អរគុណ​ណាស់ ចំពោះ​អាជ្ញាធរ​រាជធានី​ភ្នំពេញ ដែល​បាន​ពន្យារពេល ឱ្យបាន​ការចាក់​វ៉ាក់សាំង ចំពោះ​ពួកគាត់​ដែល​មិនទាន់ បានមក​ចាក់ នាពេល​កន្លងមក បាន​ចាក់​នៅពេលនេះ​។​

​មន្ត្រីរដ្ឋបាល​រាជធានី​ភ្នំពេញ បានបញ្ជាក់​ឱ្យដឹងថាៈ ចំពោះ​ប្រជាពលរដ្ឋ​ដែល​មិនបាន ទទួល​ការចាក់​វ៉ាក់សាំង បង្ការ​ជំងឺ​កូ​វីដ​-១៩ នៅក្នុង ១៣ ខណ្ឌ ក្នុង​រាជធានី​ភ្នំពេញ មាន​ចំនួន​សរុប ១៩.៣៩៩ នាក់ ក្នុងនោះ នៅ​ខណ្ឌ​កំបូល នៅសល់​ចំនួន ៩៨៧ នាក់ , ខណ្ឌ​ពោធិ​សែន​ជ័យ នៅសល់​ចំនួន ៤.៩៨០ នាក់ , ខណ្ឌទួលគោក នៅសល់​ចំនួន ១.២៩៧ នាក់ , ខណ្ឌ​៧​មករា នៅសល់​ចំនួន ៧៥៥ នាក់ , ខណ្ឌដូនពេញ នៅសល់ ចំនួន ៥២១ នាក់ , ខណ្ឌ​បឹង​កេងកង នៅសល់​ចំនួន ៧០២ នាក់ , ខណ្ឌចំការមន នៅសល់​ចំនួន ២២២ នាក់ , ខណ្ឌដង្កោ នៅសល់ ចំនួន ១.៨៨៧ នាក់ , ខណ្ឌ​ជ្រោយ ចង្វា នៅសល់​ចំនួន ២.៥៩០ នាក់ , ខណ្ឌឫស្សីកែវ នៅសល់​ចំនួន ៣០០ នាក់ , ខណ្ឌ​ច្បារអំពៅ នៅសល់​ចំនួន ១.៨៧៣ នាក់ , ខណ្ឌមានជ័យ រួចរាល់ , ខណ្ឌ​សែន​សុខ នៅសល់​ចំនួន ១.៧៦១ នាក់ និង​ព្រែក​ព្នៅ នៅសល់​ចំនួន ១.៥២៤ នាក់​។​

​គួរ​បញ្ជាក់ថា រដ្ឋបាល​រាជធានី​ភ្នំពេញ កាលពី​ថ្ងៃទី​២៥ ខែមិថុនា ឆ្នាំ​២០២១ រដ្ឋបាល រាជធានី បានចេញ សេចក្តីជូនដំណឹង ស្តីពី​កាលបរិច្ឆេទ​ចុងក្រោយ នៃ​ការចាក់ វ៉ាក់សាំង ជូន​ប្រជាពលរដ្ឋ នៅ​ភូមិសាស្ត្រ រាជធានី​ភ្នំពេញ​ដែល​ក្នុង​សេចក្តី ជូនដំណឹង​នេះ បាន​បញ្ជាក់ថា ក្នុង​ក្របខ័ណ្ឌ នៃ​យុទ្ធនាការ​ជាតិ​ចាក់​វ៉ាក់សាំង ដោយ​អនុលោម​តាម​ផែនការមេ សម្រាប់​យុទ្ធនាការ ចាក់​វ៉ាក់សាំង​បង្ការ​ជំងឺ​កូ​វីដ​-១៩ ដែលមាន​អនុគណៈ កម្ម​ការ ចំពោះ​កិច្ច ចាក់​វ៉ាក់សាំង​កូ​វីដ​-១៩ ជា​សេនាធិការ និង​ដែលមាន កិច្ចសហការ​ពី​ក្រុមគ្រូពេទ្យ នៃ កងយោធពល​ខេមរភូមិន្ទ ក្រសួង ការពារជាតិ ក្រុមគ្រូពេទ្យ​ស្ម័គ្រចិត្ត យុវជន​សម្តេច​តេ​ជោ (TYDA) ក្រុមគ្រូពេទ្យ ស្ម័គ្រចិត្ត​របស់ សម្តេច​ពិជ័យ​សេនា ទៀ បាញ់ ក្រុមគ្រូពេទ្យ​ស្ម័គ្រចិត្ត ស​.​ស​.​យ​.​ក និង​ក្រុមគ្រូពេទ្យ នៃ​អង្គភាព​ផ្សេងៗ បាន​ដំណើរការ ចាក់​វ៉ាក់សាំង ជូន​ប្រជាពលរដ្ឋ ដែលមាន​អាយុ​ពី ១៨ ឆ្នាំ​ឡើងទៅ នៅ​រាជធានី​ភ្នំពេញ បាន​យ៉ាង​រលូន ស្របតាម ជំហាន​កម្មវិធី​ការងារ ដែល​បាន​គ្រោងទុក ហើយ​ប្រជាពលរដ្ឋ ក៏បាន​ស្ម័គ្រចិត្ត យ៉ាង​សស្រាក់សស្រាំ តម្រង់​ជា​ជួរ មកចាក់​វ៉ាក់សាំង តាម​គោលដៅ នៃ​ខណ្ឌ​នីមួយៗ ដែល​គិត​មកដល់​ថ្ងៃទី​២៣ ខែមិថុនា ឆ្នាំ​២០២១ បាន​ចំនួន ១.៦៦២.៣៥៦ នាក់ (​ដូ​ស​ទី​១) និង ១.៤៩៨.៧៨៧ នាក់ (​ដូ​ស​ទី​២)​។ ប៉ុន្តែ ទោះជា​យ៉ាងនេះ​ក្តី រដ្ឋបាល រាជធានី​ភ្នំពេញ សង្កេតឃើញថា នៅមាន​ប្រជាពលរដ្ឋ មួយចំនួន​តូច​ទៀត ពុំទាន់​រួសរាន់ មក​ទទួល​ការចាក់​វ៉ាក់សាំង នៅឡើយ​។

ដើម្បី​ឈានទៅ​សម្រេច​លទ្ធផល ឱ្យបាន​ជោគជ័យ ១០០% ស្របតាម​ផែនការ យុទ្ធសាស្ត្រ​របស់ គណៈកម្មការ​ចាក់​វ៉ាក់សាំង និង​រាជរដ្ឋាភិបាល ដែល​គ្រោង បិទ​បញ្ចប់ យុទ្ធនា​ការចាក់​វ៉ាក់សាំង​ជូន ប្រជាពលរដ្ឋ នៅ​រាជធានី​ភ្នំពេញ នៅ​សប្តាហ៍​ទី​១ ខែកក្កដា ឆ្នាំ​២០២១ នោះ រដ្ឋបាល​រាជធានី​ភ្នំពេញ បាន​អំពាវនាវ​ដល់ ប្រជាពលរដ្ឋ ដែល​កំពុង​រស់នៅ​ស្នាក់នៅ ប្រកប​អាជីវកម្ម មុខរបរ​ផ្សេងៗ នៅក្នុង​ភូមិសាស្ត្រ រាជធានី​ភ្នំពេញ ដែល​ពុំទាន់​បានទទួល ការចាក់​វ៉ាក់សាំង អញ្ជើញ​រួសរាន់ មកចាក់​វ៉ាក់សាំង ចាប់ពី​ថ្ងៃទី​២៧ ខែមិថុនា រហូតដល់​ថ្ងៃទី​៨ ខែកក្កដា ឆ្នាំ​២០២១ កុំបី​ខាន​នៅតាម​ទីតាំង ដែល​បានកំណត់ ក្នុង​ខណ្ឌ ទាំង​១៤៕/V​-PC