​ប្រែ​សម្រួល : កញ្ញា​ដា​លី​ស ៖ ក្រុម​អ្នកជំនាញ​បាន​ព្រមាន​ថា ចំនួន​អ្នក​ស្លាប់​ដោយ​វីរុស​កូរ៉ូណា​ពិតប្រាកដ​នៅ​ឥណ្ឌា​អាច​មាន​ដល់​ជិត​ពីរ​លាន​នាក់​ធៀប​នឹង​ចំនួន​អ្នកស្លាប់​ផ្លូវការ​ចំនួន ៣៩៥.០០០ នាក់​។​

​ក្រុម​អ្នកវិទ្យាសាស្ត្រ​នៅ​វិទ្យាស្ថាន​វាស់វែង​និង​វាយតម្លៃ​សុខភាព​របស់​សាកលវិទ្យាល័យ​វ៉ាស៊ីនតោន​និយាយថា ឥណ្ឌា​អាច​រកឃើញ​តែ​ពី ៣ ទៅ ៥ ភាគរយ​នៃ​ករណី​ឆ្លងកូវី​ដ​ប៉ុណ្ណោះ ដោយសារ​កង្វះ​នៃ​ការ​តេស្តិ៍​។​

​លោក មូរ៉ា​ដ បា​ណា​ជី ជា​គណិត​វិទូ​នៅ​សាកលវិទ្យាល័យ​មី​ដ​ដល​សិច បាន​ប៉ាន់ប្រមាណ​ថា ចំនួន​អ្នក​ស្លាប់​ពិតប្រាកដ​នៅ​ប្រទេស​នេះ​អាច​មាន​ប្រហែល ៥ ដង​នៃ​តួលេខ​ដែល​បាន​រាយការណ៍​។​

​យោង​តាម​កាសែត​វ៉​ល​ស្ទ្រីត​ជើ​ណល​បានឱ្យដឹងថា លោក​បា​ណា​ជី​បាន​ផ្អែក​ការប៉ាន់ស្មាន​មួយផ្នែក​ទៅលើ​អត្រា​មរណភាព​និង​ទិន្នន័យ​នៃ​ការ​ស្ទាបស្ទង់​ដែល​បង្ហាញ​ពី​វត្តមាន​របស់​អង្គ​បដិ​ប្រាណ​ចំណោម​​ប្រជាជន​។​

​ការប៉ាន់ស្មាន​ថ្មី​ទាំងនេះ​គឺ​បន្ទរ​តាម​ការស្រាវជ្រាវ​ដែល​បាន​ធ្វើឡើង​ដោយ​កាសែត​ញូវយ៉ក​ថែមស៍​កាលពី​ខែ​មុន ដែល​និយាយថា ចំនួន​អ្នក​ស្លាប់​ពិតប្រាកដ​អាចមាន​ដល់​ទៅ ១,៦ លាន​នាក់​។​

​នៅក្នុង​ការពិគ្រោះ​យោបល់​ជាមួយ​អ្នកជំនាញ​រាប់សិប​នាក់ កាសែត​ញូវយ៉ក​ថែមស៍​បាន​រកឃើញ​ថា​វា​ពិតជា​ពិ​បាក​ណាស់​ក្នុង​ការទទួល​បាន​រូប​ភាពច្បាស់លាស់ សូម្បី​ចំនួន​អ្នក​ឆ្លង​សរុប​នៅក្នុង​ប្រទេស​ឥណ្ឌា ដោយសារ​តែ​ការកត់ត្រា​ដ៏​ខ្សោយ​និង​កង្វះ​នៃ​ការធ្វើ​តេស្តិ៍​។​

​ក្រុម​អ្នកជំនាញ​និយាយថា ការរាប់​ចំនួន​អ្នក​ស្លាប់​មិន​អស់​នេះ​អាច​បណ្តាល​មក​ពី​ការធ្វើ​តេស្តិ៍​មិន​គ្រប់គ្រាន់ មន្ទីរពេទ្យ​ពេញ​ហៀរ​ដោយ​អ្នកជំងឺ និង​កង្វះ​លទ្ធភាព​ទទួលបាន​សេវា​ថែទាំ​សុខភាព​នៅ​​តាម​តំបន់​ជនបទ​នៃ​ប្រទេស​។​

​នេះ​អាច​មានន័យថា ការស្លាប់​ដោយ​ជំងឺ​កូ​វីដ​ភាគច្រើន​កំពុង​កើតឡើង​នៅតាម​ផ្ទះ ជាពិសេស​នៅ​តាម​ទីជនបទ ដូច្នេះ​ហើយ​មិន​មាន​ក្នុងការ​រាប់​បញ្ចូល​ក្នុង​បញ្ជី​ផ្លូវការ​ទេ​៕

​ចំនួន​អ្នក​ស្លាប់​ដោយ​វីរុស​កូរ៉ូណា​ពិតប្រាកដ​នៅ​ឥណ្ឌា​អាច​មាន​ដល់​ជិត​ពីរ​លាន​នាក់​ធៀប​នឹង​ចំនួន​អ្នកស្លាប់​ផ្លូវការ​ចំនួន ៣៩៥.០០០ នាក់​