​ប្រែ​សម្រួល : កញ្ញា​ដា​លី​ស ៖ ដោយ​ប្រកាន់យក​ជំហរ​តឹងរ៉ឹង​បំផុត​នៅ​ថ្ងៃ​ខួប ១០០ ឆ្នាំ​របស់​គណបក្ស​កុម្មុយនីស្ត​កាន់អំណាច ប្រធានាធិបតី​ចិន​លោក​ស៊ី ជីន​ភីង​បាន​សន្យា​នៅ​ថ្ងៃ​ព្រហស្បតិ៍​​នេះ​ថា​នឹង​សម្រេច​ឱ្យបាន​នូវ​ការបង្រួបបង្រួម​ជាមួយ​កោះ​តៃវ៉ាន់​ដែល​គ្រប់គ្រង​ដោយ​ខ្លួនឯង​និង​ប្តេជ្ញា​ថា​នឹង​វាយ​កម្ទេច​រាល់​ការប៉ុនប៉ង​ប្រកាស​ឯករាជ្យ​ជា​ផ្លូវការ​សម្រាប់​កោះ​នេះ​។​

​ចិន​ចាត់ទុក​តៃវ៉ាន់​ដែល​គ្រប់គ្រង​តាម​បែប​ប្រជាធិបតេយ្យ​ជា​ទឹកដី​របស់​ខ្លួន ហើយ​ក្រោម​ការដឹកនាំ​របស់​លោក​ស៊ី​បាន​បង្កើន​ការអះអាង​ទាមទារ​អធិបតេយ្យភាព​របស់​ខ្លួន​រួម​ទាំង​ការបញ្ជូន​យន្ត​​ហោះ​ចម្បាំង​និង​យន្តហោះ​ទម្លាក់​គ្រាប់បែក​ទៅជិត​កោះ​នេះ​ជា​ញឹកញាប់​។​

​លោក​ស៊ី​បាន​និយាយ​នៅក្នុង​សុន្ទរកថា​ពី​ទីលាន​ធៀន​អាន​មេន​របស់​ទីក្រុង​ប៉េកាំង​ថា​”​ការដោះស្រាយ​នូវ​បញ្ហា​កោះ​តៃវ៉ាន់​និង​ការបង្រួបបង្រួម​មាតុភូមិ​ឱ្យបាន​ពេញលេញ​គឺជា​កិច្ចការ​ប្រវត្តិសាស្ត្រ​​ដែល​មិន​ធ្លាប់​មាន​របស់​បក្ស​កុំម្មុយនីស្ត​ចិន​និង​ជា​សេចក្តីប្រាថ្នា​រួម​របស់​ប្រជាជន​ចិន​”​។​

“​កុលបុត្រ​កុលធីតា​ទាំងអស់​របស់​ចិន​រួម​ទាំង​ជនរួមជាតិ​នៅ​សងខាង​ច្រក​សមុទ្រ​តៃវ៉ាន់​ត្រូវតែ​រួមគ្នា​និង​ឆ្ពោះទៅមុខ​រួមគ្នា​ដោយ​សាមគ្គីភាព​ដោយ​កម្ទេច​ចោល​ដាច់ខាត​នូវ​ផែនការ​ឯករាជ្យ​​របស់​កោះ​តៃវ៉ាន់​”​។​

​ខណៈ​ចិន​មិន​ដែល​បោះបង់ចោល​ការប្រើ​ប្រាស់​កម្លាំង​ដើម្បី​យក​កោះ​តៃវ៉ាន់​ដាក់​ក្រោម​ការគ្រប់គ្រង​របស់​ខ្លួន លោក​ស៊ី​បាន​អំពាវនាវ​ឱ្យមាន​ដំណើរការ​នៃ “​ការបង្រួបបង្រួម​គ្នា​ដោយ​សន្តិវិធី​”​។​

​ទោះ​យ៉ាងណា​លោក​បាន​និយាយថា​គ្មាន​នរណាម្នាក់​អាច​មើលស្រាល​ការប្តេជ្ញា​ចិត្ត​ដ៏​មោះមុត​របស់​ប្រជាជន​ចិន​និង​សមត្ថភាព​ខ្លាំងក្លា​របស់​ខ្លួន​ក្នុង​ការការពារ​អធិបតេយ្យភាព​ជាតិ​និង​បូរណភាព​ទឹកដី​បាន​នោះឡើយ​។​

​ក្រុមប្រឹក្សា​កិច្ចការ​ចិនដីគោក​របស់​កោះ​តៃវ៉ាន់​បាន​ប្រាប់​ទីភ្នាក់ងារ​សារព័ត៌មាន​រ៉​យ​ទ័​រថា ខ្លួន​កំពុង​ធ្វើ​ការងា​រលើ​ការឆ្លើយតប​ទៅនឹង​អត្ថាធិប្បាយ​របស់​លោក​ស៊ី​។​

​ចិន​ជឿថា​ប្រធានាធិបតី​តៃវ៉ាន់​លោកស្រី សៃ អ៊ីង​វិន គឺជា​ជន​ផ្តាច់ខ្លួន​និយម ដែល​ចង់​ប្រកាស​ឯករាជ្យ​។ លោក​ស្រី​និយាយថា តៃវ៉ាន់​គឺជា​ប្រទេស​ឯករាជ្យ​រួច​ទៅ​ហើយ ដែល​មានឈ្មោះ​ដើម​ផ្លូវការ​ថា សាធារណរដ្ឋ​ចិន​៕

​លោក​ស៊ី​ចូលរួម​ខួប ១០០ ឆ្នាំ​នៃ​ការបង្កើត​បក្ស​កុំ​ម្មុនី​ស្ត​ចិន​នៅ​ថ្ងៃ​ព្រហស្បតិ៍​នេះ​