ដោយៈ ភ្នំខៀវ / បាត់ដំបង÷ អាជ្ញាធរ ចុះពង្រឹងពិនិត្យធ្វើតេស្ត លើអ្នកបើកបររថយន្ត ដឹកទំនិញដែលចេញចូល កម្ពុជា-ថៃ តាមច្រកទ្វាអន្តរជាតិ និងច្រកតំបន់នានា នៅក្នុងភូមិសាស្ត្រ ខេត្តបាត់ដំបង បានរកឃើញករណី វិជ្ជមានជំងឺកូវីដ-១៩ ជាង ១០ នាក់។
មន្ត្រីរដ្ឋបាល ខេត្តបាត់ដំបង បានបញ្ជាក់ឲ្យដឹង នៅចុងសប្តាហ៍នេះថា÷ ដោយសារស្ថានភាពជំងឺកូវីដ-១៩ មានការកើនឡើង ជាបន្តបន្ទាប់ មន្ត្រីសុខាភិបាល នៅតំបន់ព្រំដែន ខេត្តបាត់ដំបង បានចុះពង្រឹងការត្រួតពិនិត្យធ្វើតេស្តលើអ្នកបើកបរ និងព្រូ ទាំងខាងភាគីកម្ពុជា ទាំងភាគីថៃ ដែលមានសិទ្ធិចេញចូល ដឹកជញ្ជូនទំនិញ ក្នុងរង្វង់ក្បែរមាត់ច្រក នៃច្រកទ្វាអន្តរជាតិ និងច្រកតំបន់ចំនួន ៤ ក្នុងខេត្តបាត់ដំបង រួមមាន: ច្រកទ្វាអន្តរជាតិ គីឡូ១៣ (ភ្នំដី) ក្នុងស្រុកសំពៅលូន, ច្រកអន្តរជាតិដូង ក្នុងភូមិសាស្ត្រស្រុកកំរៀង, ច្រកទ្វារតំបន់ស៊ួនស៊ុ (អូរអន្លក់) ក្នុងស្រុកកំរៀង និងច្រកទ្វារតំបន់អូររំដួល ក្នុងស្រុកភ្នំព្រឹក។
ប្រភពខាងលើ បានបន្តថា÷ ការងារពង្រឹងចុះយកវត្ថុសំណាក ធ្វើតេស្តខាងលើ ធ្វើឡើង រយៈពេល ២ថ្ងៃ នៅដើមខែកក្កដានេះ ក្នុងនោះ បានពិនិត្យតេស្ត លើអ្នកបើកបរ និងព្រូ ជនជាតិខ្មែរ សរុបចំនួន ៦៩០ នាក់ ស្មើនឹងចំនួនរថយន្ត ២៥៥ គ្រឿង ជាលទ្ធផល ក្រោយការធ្វើតេស្តរហ័ស រកឃើញករណី វិជ្ជមានកូវីដ-១៩ សរុបចំនួន ១២ នាក់។
ដោយឡែក ចំពោះអ្នកបើកបរ និងព្រូ ជនជាតិថៃ ពិនិត្យធ្វើតេស្ត បានចំនួន ១៧១ នាក់ ស្មើនឹងរថយន្ត ចំនួន ១៤៧ គ្រឿង លទ្ធផលអវិជ្ជមានទាំងអស់។
គិតត្រឹមថ្ងៃទី២ ខែកក្កដា ឆ្នាំ២០២១ នេះ រដ្ឋបាលខេត្តបាត់ដំបង បានរកឃើញប្រជាពលរដ្ឋ ឆ្លងនូវជំងឺកូវីដ-១៩ សរុបចំនួន ១.០៥៦ នាក់ បានព្យាបាល ជាសះស្បើយ ចំនួន ៥៩០ នាក់ កំពុងសម្រាកព្យាបាល ចំនួន ៤៥៩ នាក់ និងករណីស្លាប់ ចំនួន ៧ នាក់៕/V
