ដោយ៖តារារិទ្ធ/ភ្នំពេញ៖ប្រមុខរាជរដ្ឋាភិបាលកម្ពុជាសម្តេចអគ្គមហាសេនាបតីតេជោ ហ៊ុន សែន នៅរាត្រីថ្ងៃទី ៤ ខែ កក្កដា នេះបានសម្រេចអនុញ្ញាតម្ចាស់សត្វ តោ ដែលត្រូវបានសមត្តកិច្ចរឹបអូសយកទៅរក្សាក្នុងសួនសត្វភ្នំតាម៉ៅ អាចយកសត្វតោមកចិញ្ចឹមវិញជាមួយលក្ខខណ្ឌម្ចាស់ត្រូវធ្វើទ្រុងឱ្យបានត្រឹមត្រូវដើម្បីធានា សុវត្ថិភាពទាំងមនុស្សក្នុងផ្ទះនិងអ្នករស់នៅជិតខាង។
ការសម្រេចនេះត្រូវបានសម្តេចតេជោ ហ៊ុន សែន បង្ហោះនៅក្នុងផេកហ្វេសបុកផ្លូវការរបស់សម្តេចថា៖« ក្រោយក្តាប់បានរឿងសត្វតោ។ល្ងាចនេះខ្ញុំបានពិភាក្សាជា មួយរដ្ឋមន្ត្រីក្រសួងកសិកម្ម និងបានឯកភាពគ្នាថាអនុញ្ញាតឱ្យម្ចាស់យកទៅចិញ្ចឹមវិញក្នុងលក្ខខណ្ឌ ម្ចាស់ត្រូវធ្វើទ្រុងឱ្យបានត្រឹមត្រូវដើម្បីធានាសុវត្ថិភាពទាំងមនុ ស្សក្នុងផ្ទះនិងអ្នករស់នៅជិតខាង»។
សម្តេចតេជោ ហ៊ុន សែន បានបន្តថាអរគុណបងប្អូនជនរួមជាតិទាំងក្នុងនិងក្រៅប្រទេសដែលបានផ្តល់យោបល់និងអាណិតដល់សត្វតោ ។
គួររំលឹកថាកាលពីថ្ងៃទី ២៧ ខែ មិថុនា ឆ្នាំ ២០២១ អាជ្ញាធរចម្រុះរាជធានីភ្នំពេញសហការជាមួយអង្គការ Wildlife Alliance បានរឹបអូសសត្វតោចិញ្ចឹម ១ ក្បាល នៅក្នុងផ្ទះវីឡា ១ កន្លែងស្ថិតនៅផ្ទះលេខ ២២ ផ្លូវ ៣០៦ ភូមិ ៧ សង្កាត់បឹងកេងកង១ រាជធានីភ្នំពេញ ។ សត្វតោនោះមានអាយុ ១៨ ខែនិងទម្ងន់ ៧០ គីឡូក្រាម ហើយក្រោយការដកហូតក្រុមជួយសង្គ្រោះបានបញ្ជូនសត្វតោនេះទៅកាន់មជ្ឈមណ្ឌលសង្គ្រោះសត្វព្រៃភ្នំតាម៉ៅ ។
ស្របពេលមានការជជែកគ្នាច្រើននៅតាមបណ្តាញសង្គមជុំវិញបញ្ហានេះមានគណនីហ្វេសប៊ុកមួយដែលឈ្មោះថា Qi Xiao ដែលទំនងជាម្ចាស់សត្វតោបានសរសេរបង្ហោះកាលពីថ្ងៃទី ២៩ មិថុនាថា រូបគេនឹងទទួលយកការពិន័យដែលរដ្ឋដាក់ពិន័យ ចំពោះអំពើល្មើសក្នុងការចិញ្ចឹមសត្វព្រៃដោយគ្មានការអនុញ្ញាត។ ប៉ុន្តែរូបគេនឹងសុំសិទ្ធិចិញ្ចឹមដោយស្របច្បាប់ដោយគ្រាន់តែសង្ឃឹមថារាជរដ្ឋាភិបាលអាចបើកចិត្តនិងអនុញ្ញាតឱ្យលោកបានទទួលយកតោរបស់ខ្លួនមកចិញ្ចឹមវិញ។ គណនីនេះបានបន្តទៀតថា៖ «ខ្ញុំគ្រាន់តែស្រឡាញ់សត្វប៉ុណ្ណោះមិនមែនត្រឹមតែជាសត្វតោ និងឆ្កែទេ នៅមានសត្វពពែទៀតចិញ្ចឹមជាមួយសត្វតោជាមួយគ្នា។ ដើម្បីកុំឱ្យសត្វតោបំភ័យប្រជាជន ខ្ញុំបានធ្វើរបងរនាំងខ្ពស់បាំង ហើយវាមានសុខភាពល្អមិនដែលត្រូវបានគេធ្វើបាបរំលោភបំពាន ។សត្វតោនេះបានស៊ីសាច់គោឆ្អិន ៦ គីឡូក្រាមក្នុង ១ ថ្ងៃ ទឹកដោះគោ ១ គីឡូក្រាម។ «វាត្រូវបានខ្ញុំចិញ្ចឹមតាំងពីនៅតូចហើយក៏មានមនោសញ្ចេតនា»។
ក្រៅពីគណនីហ្វេសបុកនេះក៏នៅមានគណនីហ្វេសបុកជាច្រើនទៀត រួមទាំងតារាចម្រៀងជាច្រើនរូបបានសំដែងការអាណិតអាសូរសត្វតោននោះ និង បានអំពាវនាវ ឲ្យមានការអនុញ្ញាតឲ្យម្ចាស់តោយកទៅចិញ្ចឹមវិញផងដែរ ៕