ដោយៈ ជា សីហៈ​/​ភ្នំពេញៈ នៅ​រសៀល​ថ្ងៃនេះ លោក វេ​ង សាខុន រដ្ឋមន្ត្រីក្រសួង កសិកម្ម រុក្ខាប្រមាញ់ និង នេសាទ បាន​បង្ហើប​អំពី​គម្រោង​ទី​២០ ស្តីពី​គម្រោង​ប្រមូល ផល​កម្ពុជា ដំណាក់កាល​ទី​ពីរ (Feed the Future Cambodia Harvest Ⅱ ដែលជា គម្រោង​ដែល​ទទួល​ការឧបត្ថម្ភ​និង​គាំទ្រ​ថវិកា​ចំនួន​ប្រមាណ​ជា ២១,២​លាន​ដុល្លារ អាមេរិក ពី​ទីភ្នាក់ងារ​សហរដ្ឋអាមេរិក​សម្រាប់​ការអភិវឌ្ឍ​អន្តរជាតិ (USAID) មាន​រយៈពេល​៥​ឆ្នាំ​៣​ខែ ដោយ​ចាប់ផ្តើម​ពី​ខែមេសា ឆ្នាំ​២០១៧ ដល់​ពាក់កណ្តាល កក្កដា ឆ្នាំ​២០២២​។

​លោក​បាន​បន្តថា គម្រោង​នេះ​មាន​គោលបំណង​ជួយ​ជំរុញ​កំណើន​ផលិតកម្ម ដំណាំ​សាកវប្បកម្ម នៅ​ខេត្ត​គោលដៅ​ចំនួន​៤​គឺ ខេត្តពោធិ៍សាត់ បាត់ដំបង សៀមរាប និង​ខេត្តកំពង់ធំ ព្រមទាំង​បណ្តា​ខេត្ត​មួយចំនួន​ផ្សេងទៀត​ដែលមាន​សក្តានុពល ផលិតកម្ម​ដំណាំ​សាកវប្បកម្ម​មានដូចជា​ខេត្ត​មណ្ឌល​គី​រី កំពង់ស្ពឺ ប៉ៃលិន និង​ខេត្ត ព្រះវិហារ​ជាដើម​។

​លោក​បាន​បន្តថា គម្រោង​នេះ​ផ្តោត​សំខាន់​ទៅលើ​អនុវិស័យ​ដំណាំ​ចំនួន​៤​មុខ រួមមាន ដំណាំ​បន្លែ ស្វាយ មៀន​ប៉ៃលិន និង​ស្វាយចន្ទី​។ ក្រៅពី​លើកកម្ពស់​ផលិតកម្ម​ដំណាំ គម្រោង​ក៏បាន​ផ្តោត​ការយកចិត្តទុកដាក់​ប​ន្ថែ​ម​ក្នុងការ​ពង្រឹងសមត្ថភាព ដើម្បី​ជំរុញ ការផ្សារភ្ជាប់​ផលិតផល​ដំណាំ​ទៅនឹង​ទីផ្សារ ក្នុងស្រុក និង​ទីផ្សារ​អន្តរជាតិ​។​

​ប្រភព​ដដែល​បាន​បន្តថា តាមរយៈ​កិច្ចសហការ​ជាមួយ​អគ្គនាយកដ្ឋាន​កសិកម្ម និង​មន្ទីរ​កសិកម្ម​រុក្ខាប្រមាញ់ និង​នេសាទ​ខេត្ត​គោលដៅ គម្រោង​បាន​អនុវត្ត​សកម្មភាព សំខាន់ៗ​មួយចំនួន​ដូចជា បណ្តុះបណ្ដាល​អំពី​ការអនុវត្ត​កសិកម្ម​ល្អ​កម្ពុជា និង​វិ​ញ្ញាប​នក​ម្ម ។

​លោក​រដ្ឋមន្ត្រី​បាន​បន្តថា តាមរយៈ​គម្រោង​នេះ​អគ្គនាយកដ្ឋាន​កសិកម្ម​បាននិងកំពុង ជំរុញ​ការបណ្តុះបណ្ដាល​ស្តីពី​ការអនុវត្ត​កសិកម្ម​ល្អ​កម្ពុជា​ដល់​កសិករ​ដើម្បី​បង្កើន​ផលិតកម្ម និង​ពង្រឹងគុណភាព​ដំណាំ​មួយចំនួន ដូចជា ស្វាយ មៀន​ប៉ៃលិន បន្លែ ស្វាយចន្ទី ។​ល​។​

​លោក​បាន​បន្តថា លទ្ធផល​នៃ​ការអនុវត្ត​គម្រោង​ក្នុង​រយៈពេល ៤ ឆ្នាំ​កន្លង កសិករ កម្ពុជា​ទទួលបាន​ពី​ការលក់​ចេញ​ផលិតផល​សរុប មានតម្លៃ​ចំនួន ៥១,៥ លាន​ដុល្លារ អាមេរិក និង​បាន​បង្កើត​ក​ម្កាំ​ង​ពលកម្ម​ថ្មី​នៅ​សហគ្រាស​និង​នៅ​ចម្ការ​ចំនួន ១.៨៧៣ នាក់ ៕​/PC