​ប្រែ​សម្រួលៈ​វាសនា​/​គី​ឡា​ឡាំ​ពួរ​៖​ម៉ាឡេស៊ី​បាន​ធ្លាក់​ចូល​ក្នុង​វិបត្តិ​នយោបាយ​ភ្លាម​កាលពី​ថ្ងៃ​ព្រហស្បតិ៍​បន្ទាប់ពី​គណបក្ស​ធំ​បំផុត​នៅក្នុង​សម្ពន្ធភាព​គ្រប់គ្រង​អំណាច​បាន​ប្រកាសថា​ខ្លួន​នឹង​ដក​ការគាំទ្រ​​ចេញ​ពី​នាយក​រដ្ឋមន្ត្រី មូ​យីត​ឌីន យ៉ាស​ស៊ីន ហើយ​សុំ​អោយ​លោក​ចុះចេញ​ពី​តំណែង​ដើម្បី​បើកផ្លូវ​សំរាប់​មេដឹកនាំ​ថ្មី​ម្នាក់​។​

​ការប្រកាស​នេះ​អាច​បង្ក​អោយ​ដួលរលំ​រដ្ឋាភិបាល​របស់​លោកមូ​យីត​ឌីន​និង​នាំ​ដល់​ការបោះឆ្នោត​ជា​ថ្មី ទោះជា​យ៉ាងណា​សេណា​រី​យ៉ូ​ទាំងពីរ​នេះ​ទំនងជា​មិនអាច​កើត​មាន​ទេ​ក្នុងអំឡុង​ប្រទេស​កំពុង​ផ្ទុះ​ជំងឺ​​កូវី​ដ​១៩​ធ្ងន់ធ្ងរ​បែប​នេះ​។​

លោកមូ​យីត​ឌីន កំពុងសម្រាកព្យាបាលជំងឺនៅមន្ទីរពេទ្យ នៅពេលសម្ពន្ធមិត្តសុំអោយលោកចុះចេញពីតំណែង

​លោកនាយក​រដ្ឋមន្ត្រី និង​សម្ពន្ធមិត្ត​របស់​លោក​នៅ​មិន​ទាន់​ចេញ​ប្រតិកម្ម​យ៉ាងណាទេ​។​

​សូម​រំលឹក​ថា លោកមូ​យីត​ឌីន បាន​ចូល​កាន់​អំណាច​នៅ​ខែ​មីនា​ឆ្នា ២០២០​បន្ទាប់​ពី​ផ្តួចផ្តើម​កៀរគរ​កម្លាំង​ទម្លាក់​រដ្ឋាភិបាល​កែ​ទំរង់​របស់​លោក​បណ្ឌិត​មហាធៀ​ដែល​បាន​ជាប់​ឆ្នោត​នៅ​ឆ្នាំ​២០១៨​។​គណ​​បក្ស​Bersatu របស់​លោក​បាន​រួម​ដៃ​ជាមួយ​គណបក្ស​អង្គការ​ជាតិ​ម៉ាឡេ​រួបរួម​(UMNO)​ដែល​ត្រូវបាន​ទម្លាក់​ក្នុង​ការបោះឆ្នោត​ឆ្នាំ​២០១៨ និង​គណបក្ស​តូចៗ​ដទៃទៀត​ដើម្បី​បង្កើត​រដ្ឋាភិបាល​ថ្មី​មួយ​​តែ​សម្ពន្ធភាព​នេះ​មិន​ជា​មាំទាំ​ទេ​ដោយសារតែ​មាន​សម្លេង​ភាគច្រើន​ស្តួចស្តើង​នៅក្នុង​សភា​។​

​ប្រធាន​UMNO លោក​អា​ម៉ា​ត ហ្សា​ហ៊ីត បាន​និយាយ​កាលពី​ព្រឹក​ថ្ងៃ​ព្រហស្បតិ៍​ថា រដ្ឋាភិបាល​របស់​លោកមូ​យីត​ឌីន បរាជ័យ​នៅក្នុង​កាត​ទប់ស្កាត់​ជំងឺ​កូវី​ដ​១៩​។​លោក​ថា​គោល​នយោបាយ​មិន​ស៊ីគ្នា និង​វិធាន​​ការបិទ​ខ្ទប់​ស្ទើរភ្លើង​របស់​វា កាន់តែ​បង្ក​ការលំបាក​ផ្នែក​សេដ្ឋកិច្ច​ខ្លាំង​ឡើង​។​

​លោក​ហ្សា​ហ៊ី​ត បាន​សុំ​អោយ​លោកមូ​យីត​ឌីន ចុះចេញ​ពី​តំណែង និង​បើកផ្លូវ​សំរាប់​មេដឹកនាំ​បណ្តោះអាសន្ន​ម្នាក់ ដើម្បី​ទទួល​ដឹកនាំ​ប្រទេស​រហូត​ដល់​ជំងឺឆ្លង​បាន​ធូរស្រាល និង​ការបោះឆ្នោត​សកល​មួយ​​អាច​រៀបចំ​ធ្វើឡើង​ដោយ​សុវត្ថិភាព​។​

​ការសំរេចចិត្ត​របស់​UMNO​បាន​កើត​ឡើង​តែ​ប៉ុន្មាន​ម៉ោង​បន្ទាប់​ពី​លោកនាយក​រដ្ឋមន្ត្រី តែងតាំង​រដ្ឋមន្ត្រី​ការពារជាតិ អ៊ី​ស្មេ​ល សា​ព្រី មកពី​UMNO​ជា​អនុប្រធាន​របស់​លោក​ក្នុង​គោលបំណង​បញ្ចុះបញ្ចូល​​អោយ​គណបក្ស​នេះ​បន្ត​នៅ​ក្នុង​ក្រុមចំរុះ​។​

​តាមពិត​ភាព​តានតឹង​បាន​ពុះ​ឡើង​រុយៗ​អស់​ពេល​រាប់​ខែ​មក​ហើយ​នៅក្នុង​សម្ពន្ធភាព​កាន់អំណាច ដោយ​UMNO​មិន​សប្បាយចិត្ត​នឹង​តួនាទី​បន្ទាប់បន្សំ​ឬ​តូច​ជាង​Bersatu​។​

​បច្ចុប្បន្ន​មិន​មាន​ក្រុមចំរុះ​ណា​មាន​សម្លេង​ភាគច្រើន​នៅក្នុង​សភា​ទេ​។ មេដឹកនាំ​ប្រឆាំង​លោក​អាន់​វ៉ា អ៊ីប្រាហ៊ីម អាច​ព្យាយាម​ស្វះស្វែង​រក​ការគាំទ្រ តែ​លោក​ហ្សា​ហ៊ី​ត បាន​បញ្ជាក់​ហើយ​ថា​គណបក្ស​UMNO ​នឹង​មិន​គាំទ្រ​បេក្ខភាព​របស់​អាន់​វ៉ា ជា​នាយករដ្ឋមន្ត្រី​ទេ​៕

​ប្រធាន​គណបក្ស​UMNO​លោក​អា​ម៉ា​ត ហ្សា​ហ៊ីត​(​ឆ្វេង)​ដក​ការគាំទ្រ​នាយករដ្ឋមន្ត្រី មូ​យីត​ឌីន យ៉ាស​ស៊ីន​