ដោយៈ អូរ​ស្មាច់ / ឧ​ត្ត​រ​មាន​ជ័​យៈ មន្ទីរ​កសិកម្ម រុក្ខាប្រមាញ់ និង​នេសាទ ខេត្ត​ឧ​ត្ត​រ​មានជ័យ បានផ្តល់​ពូជ​មាន់​ស្រែ ចំនួន ៤២០ ក្បាល រួមទាំង​ចំណី និង​សម្ភារ ក្នុងការ​ចិញ្ចឹម​មាន់ ដល់​ប្រជាពលរដ្ឋ ចំនួន ១៤ គ្រួសារ ស្ថិតនៅក្នុង​ឃុំ​ពង្រ ស្រុក​ចុងកាល់ ដើម្បី​ចិញ្ចឹម លើកកម្ពស់​ជីវភាព​គ្រួសារ ឲ្យ​កាន់តែ​ប្រសើរឡើង ស្របពេល​នឹង​វិបត្តិ​ជំងឺ​កូ​វីដ​-១៩ នេះ​។​

​លោក សូត្រ ស៊ី​សុខ​ឃាង ប្រធាន​មន្ទីរ​កសិកម្ម​ខេត្ត បាន​ឲ្យ​ដឹងថាៈ​ការចែក​ពូជ មាន់​ស្រែ ចំណី និង​សម្ភារ នៅពេលនេះ គឺ​ក្នុង​គោលបំណង ជួយ​លើកស្ទួយ​កម្រិត ជីវភាព​ប្រជាពលរដ្ឋ នៅក្នុង​សហគមន៍​ឲ្យ​គាត់ មាន​ប្រាក់ចំណូល​កើនឡើង តាមរយៈ​ការចិញ្ចឹម​មាន់ ដោយ​ផ្សារភ្ជាប់​ជាមួយ​ទីផ្សារ ដែលមាន​អ្នក​ចាំ​ទទួល ទិញ សម្រាប់​លក់ដូរ​ក្នុងស្រុក និង​នាំចេញ ទៅ​ទីផ្សារ​ក្រៅ​ស្រុក​។​

​លោក​ប្រធាន​មន្ទីរ បាន​ថ្លែង​ទៀតថាៈ ការចែក​ពូជ​មាន់​ស្រែ និង​ចំណី សម្ភារ ជូន​ពលរដ្ឋ​នាពេលនេះ គឺជា​កម្មវិធី​ដែល​គាំទ្រ ដោយ​មន្ទីរ​កសិកម្ម ខេត្ត​ឧ​ត្ត​រ​មានជ័យ ដោយ​ប្រើប្រាស់​ថវិកា សម្រាប់​ឆ្នាំ​២០២១ ដោយ​ក្នុង​មួយ​គ្រួសារ ទទួលបាន រួមមាន ពូជ​មាន់​ស្រែ ចំនួន ៣០ ក្បាល ស្នូក​ដាក់​ចំណី​១ ស្នូក​ដាក់​ទឹក​១ និង​ចំណី​១​កា​រ៉ុង និង​មានការ​បង្រៀន​បន្ថែម ពី​បច្ចេកទេស នៃ​ការចិញ្ចឹម​មាន់​ផងដែរ​៕/V​-PC