​ប្រែ​សម្រួល : កញ្ញា​ដា​លី​ស ៖ បណ្តា​ទីភ្នាក់ងារ​សហព័ន្ធ​អាម៉េរិក​បាន​និយាយ​កាលពី​ថ្ងៃ​ព្រហស្បតិ៍​ទី ៨ ខែកក្កដា​ថា ប្រជាជន​នៅ​សហរដ្ឋ​អាម៉េរិក ដែល​បាន​ចាក់​វ៉ាក់សាំង​ពេញលេញ​ប្រឆាំងនឹង​វីរុស​កូរ៉ូណា មិនចាំបាច់​ត្រូវការ​ចាក់​មួយ​ដូស​បន្ថែម​ទៀត​ទេ​នៅ​ពេល​នេះ ដែល​នេះ​បង្ហាញ​ពី​វិធី​កាន់តែ​អភិរក្ស​ថែមទៀត​ដើម្បី​ងាក​ចេញពី​ផែនការ​របស់​ក្រុមហ៊ុន​ផលិត​វ៉ាក់សាំង Pfizer និង BioNTech ដើម្បី​គ្រោង​នឹង​ផលិត​វ៉ាក់សាំង​ចាក់​ជំនួយ​មួយដូ​សទៀត​។​

​សេចក្តីថ្លែងការណ៍​រួម​ដោយ​មជ្ឈមណ្ឌល​គ្រប់គ្រង​និង​បង្ការ​ជំងឺ (CDC)​និង​រដ្ឋបាល​ចំណីអាហារ​និង​ឱសថ (FDA) បាន​កើតឡើង​ប៉ុន្មាន​ម៉ោង​បន្ទាប់ពី​ក្រុមហ៊ុន Pfizer និង BioNTech​បាន​​និយាយថា ទិន្នន័យ​ពី​ប្រទេស​អ៊ីស្រាអែល​បាន​លើកឡើង​ថា ការចាក់​មួយ​ដូស​ជំរុញ​ថែម​ទៀត​នឹង​ត្រូវការ​ជា​ចាំបាច់​ក្នុង​រយៈពេល ៦ ខែ​ឬ​ច្រើន​ជាង​នេះ ដោយសារតែ​ការគំរាមកំហែង​ពី​មេរោគ​បំ​ប្លែងខ្លួន​។​

​នៅក្នុង​សេចក្តីប្រកាស​ព័ត៌មាន ក្រុមហ៊ុន Pfizer និង BioNTech បាន​និយាយថា បន្ទាប់ពី​ដឹង​អំពី​បញ្ហា​នេះ ពួកគេ​កំពុង​បង្កើត​វ៉ាក់សាំង​កូវី​ដ​១៩​ជំនួយ​មួយ​ដូស​ថែមទៀត​ហើយ​រំពឹង​ថា​ការសិក្សា​​គ្លីនិក​នឹង​ចាប់ផ្តើម​នៅ​ខែ​សីហា ដោយ​រង់ចាំ​តែ​ការអនុញ្ញាត​ច្បាប់​ប៉ុណ្ណោះ​។​

​ប៉ុន្តែ CDC និង FDA បាន​និយាយថា​ពួកគេ​មាន​ដំណើរការ​ផ្អែក​លើ​វិទ្យាសាស្ត្រ​យ៉ាង​ហ្មត់ចត់​ក្នុង​ការពិចារណា​ថា​តើ​ពេល​ណា​ត្រូវ​ចាក់​វ៉ាក់សាំង​ជំរុញ​មួយ​ដូសជា​ចាំបាច់​ដែល​នេះ​ជា​ការសម្រេចចិត្ត​មួយ​​មិនមែន​ផ្អែក​ទាំងស្រុង​លើ​ទិន្នន័យ​ផ្តាច់មុខ​របស់​ក្រុមហ៊ុន​ផលិត​ឱសថ​នោះទេ​។​

​ទីភ្នាក់ងារ​ទាំងពីរ​មិន​បាន​បដិសេធ​លទ្ធភាព​នៃ​ការចាក់​វ៉ាក់សាំង​មួយ​ដូស​បន្ថែម​ចាំបាច់​នាពេលអ​នាគត​នោះ​ទេ ដោយ​និយាយថា ពួកគេ​នឹង​បន្ត​ពិនិត្យ​ឡើងវិញ​នូវ​ទិន្នន័យ​ថ្មី​ណាមួយ​នៅពេល​ទិន្នន័យ​ទាំងនោះ​អាច​រកបាន​៕

CDC និង FDA ថា​ឥឡូវនេះ​មិនចាំបាច់​ចាក់​វ៉ាក់សាំង​កូវី​ដ​១៩ ជំរុញ​មួយដូ​សទៀត​នោះទេ