​ដោយៈ រិ​ទ្ធិ​សែន / ពោធិសាត់ៈ បុរស​ម្នាក់ បាន​ស្លាប់​ភ្លាមៗ នៅនឹងកន្លែង​កើតហេតុ ដោយសារតែ ប្រពន្ធ បាន​ចាក់​មួយ​កាំបិត ចំ​ឆ្អឹងជំនី ខាងឆ្វេង នៅក្នុង​អំឡុងពេល ពួកគេ​ទាំងពីរ បាន​ឈ្លោះ ប្រកែក​គ្នា ដោយ​ពាក្យសម្ដី ហើយ​បាន​ប្រតាយប្រតប់​គ្នា បង្ក​ទៅជា​អំពើហិង្សា​បែបនេះ​។ ហេតុការណ៍​នេះ បានកើត​ឡើង នៅវេលា​ម៉ោង ១០​និង​៣០ នាទី ថ្ងៃទី​៩ ខែកក្កដា ឆ្នាំ​២០២១ នៅ​ចំណុច​អូរ ១៧ ស្ថិត​ក្នុងភូមិ​ដីក្រហម ឃុំ​អន្លង់​រាប ស្រុក​វាលវែង ខេត្តពោធិ៍សាត់ ។​

​លោក​វរ​សេនី​យី​ឯក ធាង ឡេង អធិការ​នគ​បាល ស្រុក​វាលវែង បានអោយដឹង នៅ​ព្រឹក​ថ្ងៃទី​១០ កក្កដា ២០២១​នេះ​ថាៈ ករណី​ហិង្សា​ខាងលើនេះ បង្ករ​ឡើង​ដោយ ជនសង្ស័យ ជា​ប្រពន្ធ ឈ្មោះ តាំង គា ហៅ ញឹ​ង អាយុ ២៦ ឆ្នាំ ។ ចំណែក​ជនរងគ្រោះ​ជា​ប្តី មានឈ្មោះ សឿន ស៊ា អាយុ​៣៤​ឆ្នាំ អ្នក​ទាំង​២ រស់នៅ​ក្នុងភូមិ​.​ឃុំ​.​ស្រុក កើតហេតុ​ខាងលើ​។​

​លោក​បាន​បញ្ជាក់ថាៈ ប្រពន្ធ​បាន​ឈ្លោះប្រកែក ដោយ​ពាក្យសម្តី​គ្នា ជាមួយ​ប្ដី ហើយ​បាន​យក កូនកាំបិត កាន់​នៅ​ដៃ ។ នៅពេល​ឈ្លោះ​ប្រតាយប្រតប់​គ្នា​នោះ ប្រពន្ធ​បាន​ចាក់​ត្រូវ​ប្តី មួយ​កាំបិត ចំ​ឆ្អឹងជំនី ខាងឆ្វេង បណ្ដាលអោយ​ប្ដី ស្លាប់​ភ្លាមៗ នៅនឹងកន្លែង​កើតហេតុ​តែម្ដង​។​

​អធិការនគរបាល​ស្រុក​វាលវែង បាន​អោយដឹងទៀតថាៈ ក្រោយ​កើតហេតុ ស្ត្រី​ដែលជា​ជនសង្ស័យ បាន​រត់គេច​មក​លាក់​ខ្លួន នៅផ្ទះ​ម្ដាយបង្កើត​របស់ខ្លួន​ឯង ឈ្មោះ ណាក់ ដែលមាន​ចម្ងាយ​ជាង ៤០០ ម៉ែត្រ ពី​កន្លែងកើតហេតុ ហើយ​ត្រូវបាន​កម្លាំង ស្រាវជ្រាវ​ឈានដល់​ការឃាត់ខ្លួន ជនសង្ស័យ​បាន នៅវេលា​ម៉ោងជាង ១ រំលងអធ្រាត្រ ចូល​ថ្ងៃទី​១០ ខែកក្កដា ឆ្នាំ​២០២១ នេះ ។​

​អធិការ​នគ​បាល​ស្រុក​វាលវែង បានអោយដឹង​បន្ថែមទៀតថាៈ មូលហេតុ​ឈានដល់​ចាក់​សម្លាប់​ប្តី ផ្តើមឡើង​ដោយសារ​ទំនាស់​ពាក្យសម្ដី ហើយ​គ្រួសារ​មួយ​នេះ តែងតែ​មានរឿង ឈ្លោះប្រកែក​គ្នា​ជា​ញឹកញាប់ ។​

​បច្ចុប្បន្ន ជនសង្ស័យ រួម​នឹង​វត្ថុតាង ត្រូវបាន​សមត្ថកិច្ច ឃាត់ខ្លួន បញ្ជូន​មកកាន់​អធិការដ្ឋាន នគរបាល​ស្រុក​វាលវែង ដើម្បី​សាកសួរ និង​កសាង​សំណុំរឿង បញ្ជូនបន្ដ​ទៅ​ស្នងការដ្ឋាន នគ​បាល​ខេត្ត អនុវត្តតាម​នីតិវិធី នៅថ្ងៃនេះ​៕/V​