ដោយៈ​បូកគោ​/ កំ​ពតៈ មេបញ្ជាការរង​កងរាជអាវុធហត្ថ​នៃ​បញ្ជាការដ្ឋាន​ខេត្តកំពត​ដែល​ឆ្លង​កូ​វីដ​១៩​ហើយ​មិនមាន វត្ត​មាននៅ​មណ្ឌល​ព្យាបាល​បង្កក្តី​ងឿងឆ្ងល់​ជាទូទៅ​នោះបាន​អះអាងថា​លោក​មានការ​អនុញ្ញាតឱ្យ​ព្យាបាល​នៅផ្ទះ​ក្រោម​ការណែនាំ​និង​យកចិត្តទុកដាក់​ពី​ក្រុមគ្រូពេទ្យ​ជំនាញ​។​និយាយ​រួម​លោក​មិនបាន​គេចវេស​ពី​ការព្យាបាល​ដូច​ការលើកឡើង​មួយ ចំនួន​ផ្តោត​ក្តី​សង្ស័យ​នោះទេ​។​

​សូម​រំលឹកថា កាលពី​ថ្ងៃទី​៩ ខែកក្កដា​កន្លងទៅ លោក អូន ដឺ មេបញ្ជាការរង​កងរាជអាវុធហត្ថ​ខេត្តកំពត​បាន​ជិះ​រថយន្ត ឡិច​ស៊ី​ស​៥៧០​ចូលក្នុង​បរិវេណ​មន្ទីរពេទ្យបង្អែក​ខេត្តកំពត​ដើម្បី​ធ្វើតេស្ត​រក​មេរោគ​កូ​វីដ​១៩​។

​ប្រភពពី​ក្រុមគ្រូពេទ្យ​បាន​និយាយថា​បន្ទាប់ពី​ពិនិត្យឃើញ​វិជ្ជមាន​លោក​មេបញ្ជាការរង​បាន​សំណូមពរ​ឱ្យធ្វើ​តេស្ត​ម្តងទៀត​។ ការធ្វើ​តេស្ត​លើក​ទី​ពីរ​គឺ​លទ្ធផល​វិជ្ជមាន​ដដែល​។ ក្រោយមក​ស្រាប់តែ​លោក​អូន​ដឺ​បាន​ជិះ​រថយន្ត​ចេញពី​មន្ទីរពេទ្យ​ដោយ មិនដឹង​ទៅ​ទីណា​ទើប​ក្រុមការងារ​រាយការណ៍​ជូន​ប្រធាន​មន្ទីរពេទ្យបង្អែក​ដើម្បី​ជ្រាប​ជា​ដំណឹង​។​ការចាកចេញ​ដោយ​មិន​រង់ចាំ​គ្រូពេទ្យ​នាំទៅ​ព្យាបាល​នៅ​មណ្ឌល​ព្រះរាជ​សម្ភារ​បែប​នោះបាន​បង្កក្តី​ព្រួយបារម្ភ​សម្រាប់​សាធារណជន​ទូទៅ​អំពី​ការឆ្លង​នូវ​មេរោគ​កូ​វីដ​១៩​នេះ​។​

​លោក​អូន​ដឺ​ដែល​ត្រូវបាន​មតិ​មួយចំនួន​ដាក់​ការបន្ទោស​គេចវេស​ពី​ការព្យាបាល​បាន​បំភ្លឺថា​តាមរយៈ​ការស្នើសុំ​ប្រធាន​មន្ទីរពេទ្យបង្អែក លោក​ពិតជា​បាន​ទៅឱ្យ​ក្រុមគ្រូពេទ្យ​ធ្វើតេស្ត​រក​មេរោគ​កូ​វីដ​១៩​មែនហើយ​ការ​ទៅនោះ​គឺ​ស្ម័គ្រចិត្ត​ដោយ ខ្លួនឯង​។ លទ្ធផល​លើកទីមួយ លោក​មិន​ជឿថា​ខ្លួនឯង​កើត​កូ​វីដ​ទេ​ទើប​សុំឱ្យ​ធ្វើ​លើក​ទី​ពីរ​ទៀត​។

​លោក​មេបញ្ជាការរង​បាន​បញ្ជាក់ថា​បន្ទាប់​ពីលើ​ក​ទី​ពីរ​នៅតែ​វិជ្ជមាន​លោក​ក៏​ទូរ​សព្ទ​ទំនាក់ទំនង​ជាមួយ​ប្រធាន​មន្ទីរពេទ្យបង្អែក​ខេត្ត​សួរនាំ​តើ​ត្រូវ​សម្រាក​ព្យាបាល​នៅផ្ទះ​ឬ​នៅ​មន្ទីរពេទ្យ​។​ពេលនោះ​ប្រធាន​មន្ទីរពេទ្យ​បាន​ឆ្លើយតប​ថា​មានតែ​លោក​អភិបាលខេត្ត​និង​ប្រធាន​មន្ទីរ​សុខាភិបាល​ទេ​ដែល​អាច​សម្រេច​រឿងនេះ​។​លោក​ក៏​ស្នើសុំ​ទៅ​លោក​អភិបាលខេត្ត​ទើប​មាន​ការយល់​ព្រមឱ្យ​សម្រាក​ព្យាបាល​នៅផ្ទះ​។

​លោក អូន ដឺ បាន​បន្តថា​ដោយមាន​ការអនុញ្ញាត​បែប​នោះ​ប្រធាន​មន្ទីរ​សុខាភិបាល​ក៏​បញ្ជូន​ក្រុមគ្រូពេទ្យ​ផ្នែក​កូ​វីដ​មក ពិនិត្យឃើញថា​ជា​ជំងឺ​ប្រភេទ​ស្រាល​។ ដូច​ច្នេះ សូម​សាធារណជន​ទូទៅ​កុំ​មានការ​យល់ច្រឡំ​លើ​រូបលោក ពោលគឺ​លោក​មិនបាន​គេចវេស​ពី​ការព្យាបាល​ជំងឺ​កូ​វីដ​ទេ​៕​សរន​