​ប្រែ​សម្រួល : កញ្ញា​ដា​លី​ស ៖ ហាង​លក់ទំនិញ​និង​ឃ្លាំង​នៅ​អាហ្វ្រិក​ខាងត្បូង​បាន​រង​ការវាយប្រហារ​ដោយ​ការឆក់ប្លន់​កាលពី​ថ្ងៃ​អង្គារ​ទី​១៣​កក្កដា ដល់​ថ្ងៃទី ៥ ជាប់​គ្នា​ត្បិត​មាន​ចំណាត់ការ​ពី​សំណាក់​​ប្រធានាធិបតី ស៊ី​រី​ល រ៉ា​ម៉ា​ហ្វូ​សា ដើម្បី​ដាក់​ពង្រាយ​កងទ័ព​ក្នុង​បំណង​បង្ក្រាប​ភាពវឹកវរ ដែល​បាន​ឆក់យក​ជីវិត​មនុស្ស ៧២ នាក់​។​

​ខណៈ​ការ​លួច​ឆក់​ប្លន់​ទ្រង់ទ្រាយ​ធំ​បាន​ផ្ទុះឡើង​នៅ​ក្នុង​ទីក្រុង​សេដ្ឋកិច្ច ចូហាន​ណេ​ស្បឺក និង​ខេត្ត​ក្វា​ហ្ស៊ូ​លូ​ណា​តាល់ភាគ​អាគ្នេយ៍ វិបត្តិ​នេះ​បាន​ផ្ទុះ​ចូល​ដល់​ក្នុង​ឆាក​នយោបាយ​ទី​ដែល​បក្ស​ប្រឆាំង​ដ៏​ធំ​របស់​​អាហ្វ្រិក​ខាងត្បូង​បាន​ចោទប្រកាន់​ពួក​ជ្រុលនិយម​ចំពោះ​ការបង្ក​ភាពវឹកវរ​នេះ​។​

​កងកម្លាំងប្រដាប់អាវុធ​បាន​បញ្ជូន​ទាហាន​ចំនួន ២.៥០០ នាក់​ទៅ​ជួយ​ប៉ូលិស ដែល​បាក់ស្បាត​នឹង​ចលាចល​មួយ​នេះ​។​

​ប៉ុន្តែ​ចំនួន​ទាហាន​ទាំងនេះ​នៅតែ​ជា​ចំនួន​តិចតួច ព្រោះ​កងទ័ព​ជាង ៧ ម៉ឺន​នាក់​ត្រូវបាន​ដាក់​ពង្រាយ​ដើម្បី​អនុវត្ត​ការទប់ស្កាត់​វីរុស​កូរ៉ូណា​កាលពី​ឆ្នាំ​មុន​ហើយ​មាន​តែ​ទាហាន​មួយចំនួន​តូច​ប៉ុណ្ណោះ​ឃើញ​​នៅតាម​មជ្ឈមណ្ឌល​ផ្សារ​ទំនើប​មួយចំនួន​។​

​ភាពវឹកវរ​ដ៏​ខ្លាំង​នេះ​បាន​ផ្ទុះឡើង​ដំបូង​កាលពី​ថ្ងៃ​សុក្រ​សប្តាហ៍​មុន​បន្ទាប់ពី​អតីត​ប្រធានាធិបតី​លោកយ៉ា​កូប ហ្ស៊ូ​ម៉ា​បានចាប់ផ្តើម​ជាប់​ពន្ធនាគារ​រយៈពេល ១៥ ខែ​ពី​បទ​មិន​ស្តាប់​តាម​បញ្ជា​តុលាការ បន្ទាប់​ពី​ជំទាស់​មិន​ព្រម​សហការ​លើ​ការស៊ើបអង្កេត​អំពើពុករលួយ ដែល​ញាំញី​ការ​កាន់​អំណាច​រយៈពេល ៩ ឆ្នាំ​របស់​លោក​។​

​គិត​ត្រឹម​ចុង​សប្តាហ៍​កន្លងមកនេះ អំពើហិង្សា​បាន​ចាប់ផ្តើម​រាលដាល​ដល់​ខេត្ត​ហ្គោ​ថេង​។​

​ប៉ូលិស​បាន​និយាយ​នៅក្នុង​សេចក្តីថ្លែងការណ៍​មួយ​កាលពី​ល្ងាច​ថ្ងៃ​អង្គារ​ទី​១៣​កក្កដា​ថា “​ចំនួន​ប្រជាជន​សរុប​ដែល​បាន​បាត់បង់​ជីវិត​ចាប់តាំងពី​ការចាប់ផ្តើម​នៃ​ការតវ៉ា​ទាំងនេះ​បាន​កើនឡើង​ដល់ ៧២ នាក់​”​។​

​កងកម្លាំង​បាន​និយាយថា “​ភាគច្រើន​នៃ​ការស្លាប់​ទាំងនេះ​គឺ​ទាក់ទង​នឹង​ការ​រត់​ជាន់គ្នា ដែល​បាន​កើតឡើង​ក្នុង​ឧបទ្ទវហេតុ​នៃ​ការ​លួច​ឆក់​ប្លន់​តាម​ហាង​”​។​

​អ្នក​ផ្សេង​ទៀត​ត្រូវបាន​ផ្សារភ្ជាប់​ជាមួយនឹង​ការបាញ់ប្រហារ​និង​ការ​បំផ្ទុះ​ម៉ាស៊ីន​ដក​ប្រាក់​ស្វ័យប្រវត្តិ​របស់​ធនាគារ​នានា​។​

​ចំនួន​នៃ​ការចាប់ខ្លួន​បាន​កើនឡើង​ដល់ ១.២៣៤ នាក់ ទោះបី​មាន​មនុស្ស​រាប់​ម៉ឺន​នាក់​បាន​ជាប់​ទាក់ទង​នឹង​ការ​លួច​ឆក់​ប្លន់​នេះ​ក៏​ដោយ​៕

​ភាគច្រើន​នៃ​ការស្លាប់​ទាំងនេះ​គឺ​ទាក់ទង​នឹង​ការ​រត់​ជាន់​គ្នា​ពេល​ឆក់​ប្លន់​តាម​ហាង​នានា​