ប្រែ​សម្រួលៈ​វាសនា​/​បាងកក​៖​ថៃ​កំពុង​ពិចារណា​ដាក់​កំហិត​លើ​ការនាំ​ចេញ​វ៉ាក់សាំង​កូវី​ដ​១៩​ផលិត​ក្នុងស្រុក​របស់​ក្រុមហ៊ុន​AstraZeneca​ដើម្បី​ប្រយុទ្ធប្រឆាំង​នឹង​វិបត្តិ​ផ្ទាល់​របស់​ខ្លួន​។​វា​ជា​ចំណាត់ការ​​មួយ​ដែល​អាច​ប៉ះពាល់​ប្រទេសជិតខាង និង​នាំអោយ​មាន​ការបារម្ភ​អំពី​ជាតិ​និយម​វ៉ាក់សាំង​។​

​ចំណាត់ការ​របស់​ថៃ​អាច​ពន្យឺត​ការបញ្ជូន​វ៉ាក់សាំង​កូវី​ដ​១៩​ពី​ថៃ​ទៅកាន់​ម៉ាឡេស៊ី វៀតណាម​និង​ឥណ្ឌូនេស៊ី ដែល​សុទ្ធតែ​កំពុង​តស៊ូ​ប្រយុទ្ធ​នឹង​កំណើន​នៃ​ការ​ឆ្លងកូវី​ដ​១៩​និង​បាន​ជួប​បញ្ហា​នៃ​ការផ្អាក​ការ​​ផ្គត់ផ្គង់​វ៉ាក់សាំង​មក​ពី​ឥណ្ឌា​កាលពីមុន​។​វា​កើត​ឡើង​ចំពេល​មាន​ការអំពាវនាវ​អោយ​រដ្ឋាភិបាល​ថៃ​រក​វ៉ាក់សាំង​AstraZeneca​ផលិត​ដោយ​ក្រុមហ៊ុន​ថៃ​អោយបាន​ច្រើន​សំរាប់​ចាក់អោយ​ប្រជាជន​ថៃ​ ខណៈ​ប្រទេស​កំពុង​ជួប​វិបត្តិកូ​វីដ​១៩​ដ៏​ធំធេង​។​

​ក្នុងចំណោម​ប្រជាជន​ថៃ​៦៦​លាន​នាក់ មាន​តែ​ប្រមាណ​៥​ភាគរយ​បាន​ចាក់​វ៉ាក់សាំង​ប្រឆាំង​កូវី​ដ​១៩​ពេញលេញ​ជា​ហេតុនាំអោយ​មាន​ការអំពាវនាវ​អោយ​ទុក​វ៉ាក់សាំង​ផលិត​ដោយ​ខ្លួនឯង​អោយបាន​​ច្រើន​សំរាប់​ចាក់​អោយ​ប្រជាជន​ថៃ និង​ដាក់​កូតា​នាំចេញ​

​ថៃ​នៅ​ថ្ងៃ​ព្រហស្បតិ៍​នេះ​បាន​រាយការណ៍​អ្នក​ស្លាប់​ដោយកូវី​ដ​១៩​ដល់​ទៅ​៩៨​នាក់ ដែល​ជា​ចំនួន​ស្លាប់​ខ្ពស់បំផុត​មិន​ដែល​មាន និង​៩.១៨៦​នាក់​បាន​ឆ្លង​ថ្មី​នៅ​២៤​ម៉ោង​កន្លងទៅ​។​កាលពី​ថ្ងៃ​ពុធ អាជ្ញាធរ​​បានប្រកាស​អ្នកស្លាប់​៨៧​នាក់ និង​ឆ្លង​ថ្មី ៩.៣១៧​នាក់​។​

​សរុប​ចាប់​តាំង​ពី​កូវី​ដ​១៩​មាន​វត្តមាន​នៅ​ថៃ​កាលពី​ដើម​ឆ្នាំ​មុន​មក មនុស្ស​៣៧២.២១៥​នាក់​បាន​ឆ្លង និង​៣.០៣២​នាក់​បាន​ស្លាប់​ដោយ​ជំងឺឆ្លង​សកល​នេះ​។​

​គិត​ត្រឹម​ថ្ងៃ​ពុធ មនុស្ស​១០៣.០៥៦​នាក់​កំពុង​សម្រាក​ព្យាបាល​កូវី​ដ​១៩​នៅ​តាម​មន្ទីរពេទ្យ ទាំង​ពេទ្យ​ធម្មតា​និង​ពេទ្យ​បណ្តោះអាសន្ន​កណ្តាលវាល ហើយ​៣.២៧៦​នាក់​ឈឺ​ធ្ងន់​និង​៨៣៩​នាក់​កំពុង​ប្រើឧ​ប​​ក​រណ៍​ជំនួយ​ការដកដង្ហើម​។​

​នៅ​ទូទាំង​ពិភពលោក កូវី​ដ​១៩​បាន​បន្ថែម​អ្នកជំងឺ​៥៥៤.៥១០​នាក់​ទៀត​នៅ​២៤​ម៉ោង​កន្លងទៅ រហូត​ដល់​ចំនួន​សរុប​១៨៩,១៦​លាន​នាក់​។​ចំនួន​ស្លាប់​ដោយ​ជំងឺ​នេះ​នៅ​ទូទាំង​ពិភពលោក​កើន​៨.៧១៥​នាក់​​រហូត​ដល់​ចំនួន ៤,០៧​លាន​នាក់​៕

​អ្នក​ក្រុង​បាងកក​នាំគ្នា​មក​ធ្វើតេស្តិ៍​រក​កូវី​ដ​១៩​នៅ​សង្កាត់​ដន​មឿង កាលពី​ថ្ងៃ​ពុធ​