​ប្រែ​សម្រួលៈ​វាសនា​/​ឡូ​ស អ៊ែន​ជើ​ឡេស​៖ ខណ្ឌ​ឡូ​ស អ៊ែន​ជើ​ឡេស ក្នុង​រដ្ឋ​កាលីហ្វ័​រញ៉ា សហរដ្ឋ​អាម៉េរិក នឹង​តំរូវ​អោយ​មនុស្ស​ពាក់​ម៉ាស់​ការពារកូ​វីដ​១៩​ឡើងវិញ ចាប់ពី​ចុង​សប្តាហ៍​នេះ​នៅពេល​បុគ្គលិក​​ពេទ្យ​កំពុង​តស៊ូ​ទប់ទល់​នឹង​កំណើន​នៃ​ការឆ្លង​វីរុស​កូរ៉ូណា​បំប្លែង​ខ្លួន​ចម្លង​ខ្លាំង ប្រភេទ​ដែល​តា​។​

​ខណ្ឌ​ដែល​មាន​មនុស្ស​រស់​នៅ​១០​លាន​នាក់​មួយ​នេះ និង​ទីក្រុង​ឡូ​ស អ៊ែន​ជើ​ឡេស ដែល​ជា​ទីក្រុង​ធំ​បំផុត​ទី​២​នៅ​អាម៉េរិក ស្ថិត​ចំណោម​តំបន់​ជាច្រើន​ដែល​ណែនាំ​ឬ​តំរូវអោយ​ពាក់​ម៉ាស់ និង​អនុវត្ត​វិធាន​​ការ​រឹតត្បិត​ផ្សេងៗ​ដើម្បី​ការពារ​ទល់នឹង​ជំងឺ​ឆ្លងកូវី​ដ​១៩​នៅ​ប៉ុន្មាន​ថ្ងៃ​មកនេះ នៅពេល​ចំនួន​ឆ្លង​បាន​កើន​ឡើង​វិញ​នៅ​ផ្នែក​ខ្លះ​របស់​សហរដ្ឋ​អាម៉េរិក​។​

​នាយកដ្ឋាន​សុខាភិបាល​ខណ្ឌ​ឡូ​ស អ៊ែន​ជើ​ឡេស បាន​និយាយ​កាលពី​ថ្ងៃ​ព្រហស្បតិ៍​ថា «​យើង​តំរូវ​អោយ​គ្រប់​គ្នា​ពាក់​ម៉ាស់​ពេល​នៅក្នុង​អាគារ ក្នុង​បន្ទប់​នៃ​ទីតាំង​សាធារណៈ កន្លែងធ្វើការ ឬ ស្ថាប័ន​ជំនួញ​​មិន​ថា​អ្នក​បាន​ចាក់​វ៉ាក់សាំង​រួច​ឬ​អត់​ទេ ដើម្បី​យើង​អាច​បញ្ឈប់​ល្បឿន​ឆ្លង​ចេះតែ​កើន​ឡើង​ដែល​យើង​កំពុង​ឃើញស្រាប់​»​។​

​បទបញ្ជា​ពាក់​ម៉ាស់​នេះ នឹង​ចូល​ជា​ធរមាន​នៅ​យប់​ថ្ងៃ​សៅរ៍​ទៅ​។​

​ការប្រកាស​អោយ​ពាក់​ម៉ាស់​ឡើងវិញ​នេះ​កើត​ឡើង​ក្រោយ​មាន​ការ​ឆ្លងកូវី​ដ​១៩​ជាង​១.០០០​នាក់​ក្នុង​មួយ​ថ្ងៃ​អស់​៦​ថ្ងៃ​ជាប់​គ្នា នៅក្នុង​ខណ្ឌ ឡូ​ស អ៊ែន​ជើ​ឡេស ។​អ្នកជំងឺ​កូវី​ដ​១៩​ចំនួន​៩​នាក់​ក៏​ត្រូវបាន​ប្រ​​កាស​ថា​ស្លាប់​កាលពី​ថ្ងៃ​ពុធ​នៅក្នុង​ខណ្ឌ​នេះ​។​

​កាលពី​ថ្ងៃ​ព្រហស្បតិ៍ មនុស្ស​ជាង​១.៥០០​នាក់​បាន​ឆ្លង​ថ្មី​នៅក្នុង​ខណ្ឌ​ខណ្ឌ​ឡូ​ស អ៊ែន​ជើ​ឡេស​។​ខណ្ឌ​ដទៃទៀត​ក្នុង​រដ្ឋ​កាលីហ្វ័​រញ៉ា និង​នៅ​រដ្ឋ​ដទៃទៀត ក៏​កំពុង​ជួប​កំណើន​នៃ​ការ​ឆ្លងកូវី​ដ​១៩​ផងដែរ បង្ក​​ឡើង​ដោយ​វីរុស​បំប្លែង​ខ្លួន​ដែល​តា​៕

​រូប​កាលពី​ថ្ងៃ​១​កក្កដា បង្ហាញ​អ្នកដំណើ​រពាក់​ម៉ាស់​ដើរ​ក្នុង​សង្កាត់​លក់ដូរ​មួយ​នៅ​ក្រុង​ឡូ​ស អ៊ែន​ជើ​ឡេស​