​ដោយៈ​ អង្គា​រ៍​ហេង​/​ភ្នំពេញៈ បន្ទាប់ពី​លោក ឃួ​ង ស្រេង អភិបាល​រាជធានី​ភ្នំពេញ បានដាក់​បទបញ្ជា​ឲ្យ​គណៈបញ្ជាការ​ឯកភាព​ខ​ណ្ឌ​ទាំង​១៤ ត្រូវអនុវត្ត​ឲ្យ​បាន​ម៉ឺងម៉ាត់​បំផុត ចំពោះ​វិធានការ​រដ្ឋបាល​នៅក្នុង​ភូមិសាស្ត្រ​រាជធានី​ភ្នំពេញ សម្រាប់​រយៈពេល ១៤ (​ដប់​បួន​)​ថ្ងៃ គិត​ចាប់ពី​ម៉ោង​២៣:៥៩​នាទី នា​ថ្ងៃទី​២៩ ខែកក្កដា រហូតដល់​ថ្ងៃទី​១២ ខែ​សីហ​ដើម្បី​ប្រយុទ្ធ និង​ទប់ស្កាត់​ការឆ្លង​រាលដាល​នៃ​ជំងឺ​កូ​វីដ​-១៩ កម្លាំងចម្រុះ នៃ​គណៈបញ្ជាការ​ឯកភាព​ខ​ណ្ឌ​ទួលគោក នៅវេលា​ម៉ោង​រំលងអធ្រាត្រ ឈានចូល​ថ្ងៃទី​៣០ ខែកក្កដា បាន​ចុះ​ធ្វើការ​ណែនាំ​ដល់​ប្រជាពលរដ្ឋ អាជីវករ​ដែល​ប្រកប​អាជីវកម្ម​លក់ដូរ​តាម​ចិញ្ចើមផ្លូវ និង​ភោជនីយដ្ឋាន អាហា​រដ្ឋា​ន ហាង​លក់ដូរ​ទំនិញ លក់​គ្រឿង​ស្រវឹង ឲ្យ​ចូលរួម​អនុវត្តតាម​សេចក្ដីសម្រេច​របស់​រដ្ឋ​បាល​រាជធានី​ភ្នំពេញ ។

​ក្នុង​សកម្ម​ភាពចុះ​អនុវត្ត​សេចក្ដី​នេះ​គេ​សង្កេតឃើញថា មាន​ប្រជាពលរដ្ឋ​ភាគច្រើន​អនុវត្តតាម​បាន​យ៉ាង​ល្អ​និង​មួយចំនួន​តូច​មិនទាន់​អនុវត្ត​ការណែនាំ​របស់​អាជ្ញាធរ នៅឡើយ ។​

​គួរ​បញ្ជាក់ថា ការអនុវត្ត​វិធានការ​បម្រាម​គោចរ​ក្នុង​រាជធានី​ភ្នំពេញ នៅ​យប់​នេះ​ត្រូវអនុវត្ត​ពី​ម៉ោង​២៣:៥៩ ដល់​ម៉ោង​៣​ទៀបភ្លឺ ហើយ​ចាប់​អនុវត្ត​ពី​យប់​ថ្ងៃទី​៣០​ខែកក្កដា​នេះ​ទៅ ៕​សរន​-PC