ដោយៈ ជា សីហៈ​/​ភ្នំពេញៈ ​ក្រសួងកសិកម្ម រុក្ខាប្រមាញ់ និង នេសាទ បាន​អះអាងថា គឺ​ជំងឺ​ពុក​ស្បែក ឫ​ដុំ​ពក​ស្បែក កំពុងតែ​រីក​រាលដាល​នៅ​កម្ពុជា ។​

​ប្រភព​ដដែល​បាន​អះអាងថា ជំងឺ​ដុំ​ពក​ស្បែក​គោ ក្របី (Lumpy Skin Disease) កំពុងតែ​រីក​រាលដាល​នៅ​ខេត្ត​ចំនួន ១៩ ដោយ​ខេត្ត​ដែល​ច្រើនជាងគេ គឺ នៅ​បាត់ដំបង ដែលមាន ជិត ២០០០ ក្បាល កំពង់ស្ពឺ ជាង ៨០០ ក្បាល សៀមរាប ជាង ៦០០ ក្បាល ។

​ប្រភព​ដដែល​បាន​អះអាងថា រហូតមក​ដល់ពេល​ថ្ងៃទី ២៩ ខែកក្កដា​នេះ​មាន​ករណី គោ​ឈឺ​ចំនួន ៦.៨០៤​ករណី ក្នុងនោះ​សត្វ​បានជា​សះស្បើយ​ចំនួន​៦៥% និង​កំពុង ឈឺ​នៅឡើយ​មាន​៣៥% សត្វ​បាន​ងាប់​ចំនួន​១% ដោយ​ភាគច្រើន​លើ​កូន​គោ​។​

​ជំងឺ​នេះ​ផ្ទុះ​ជា​លើកដំបូង​នៅ​ឆ្នាំ​១៩២៩ នៅ​ប្រទេស​ស៊ាំ​ប៊ី ហើយ​បាន​ឆ្លង​រាលដាល នៅ​ទ្វីបអាហ្វ្រិក​ទាំងមូល បន្ទាប់មក មាន​ម​ជ្ឈឹ​ម​បូព៌ា អឺរ៉ុប​បែក​អាគ្នេយ៍ អាស៊ី​កណ្តាល អាស៊ី​ខាងត្បូង និង​ប្រទេស​ចិន ដែល​បង្ករ​ការខូចខាត​ដ៏​ធ្ងន់ធ្ងរ​ដល់​គ្រួសារ​កសិករ ចិញ្ចឹមសត្វ និង​សេដ្ឋកិច្ចជាតិ​។

​ប្រទេស​វៀតណាម​វិញ ជំងឺ​ដុំ​ពក​លើ​ស្បែក​នេះ​ផ្ទុះ​ចាប់ពី​ខែតុលា ឆ្នាំ​២០២០ រហូតមកដល់​ខែមេសា​ឆ្នាំ​២០២១ មាន​ចំនួន​៤១​កន្លែង ។ ប្រទេស​ឡាវ​មាន​ករណី ជំងឺ​ចាប់ផ្តើម​តាំងពី​ខែ​ចុងខែ​ឧសភា រហូតមកដល់​ខែកក្កដា ឆ្នាំ​២០២១ មាន​ចំនួន ៩​កន្លែង​។

​ចំណែកឯ​នៅ​ប្រទេស​ថៃ​មាន​ករណី​ជំងឺ​នេះ​ផ្ទុះ​ជំងឺ​នេះ​ផងដែរ ចាប់ពី​ខែមីនា ឆ្នាំ​២០២១ រហូតមកដល់​ខែកក្កដា ឆ្នាំ​២០២១ ថ្មីៗ នេះ មាន​ផ្ទុះ​នៅ​ចំនួន​១៨៤​កន្លែង ជាពិសេស​នៅ​តំបន់​ដែលមាន​ព្រំប្រទល់​ជាប់​កម្ពុជា​មានដូចជា ខេត្ត​សុរិន្ទ ខេត្ត​បុរី​រាំ ខេត្ត​អ៊ូ​ប៊ុន រ៉ា​ត​ឆា​ថា​នី និង​ខេត្ត​ស៊ីសាកេត​ជាដើម​។

​ចំណែក​នៅ​ប្រទេស​កម្ពុជា​បានចាប់ផ្តើម​ផ្ទុះ​ករណី​នៃ​ជំងឺ​នេះ នៅ​ដើមខែ​មិថុនា ឆ្នាំ​២០២១ ជាដំបូង​នៅ​ខេត្តព្រះវិហារ និង​ឧ​ត្ត​រ​មានជ័យ និង​បន្ទាប់​មកដល់​ខេត្ត​ជាប់ ព្រំដែន​ថៃ​មួយចំនួនទៀត​៕​/PC