ដោយៈសោម ប៊ុនថន អ្នកសរសេរ​ទស្សនា​វ​ដ្តី​ស្វែងរក​ការពិត/ភ្នំពេញៈបទ​ចម្រៀង​បាន​ជួយ​ធ្វើ​​ឲ្យ​មនុ​ស្ស​មាន​អារម្មណ៍​ផ្លាស់ប្តូរ ការគិត​ពិចារណា និង​ជួយ​ធ្វើ​ឲ្យ​មានការ​ផ្សះផ្សា​ផ្លូវចិត្ត​។ រហូតមកដល់​ពេលនេះ​មាន​រយៈពេល​៤២​ឆ្នាំ​មកហើយ បទ​ចម្រៀង «​ឱ​! ភ្នំពេញ​អើយ​» នៅតែ​ដក់​ជាប់​នៅក្នុង​ដួងចិត្ត​របស់​ប្រជាជន​កម្ពុជា ជាពិសេស​អ្នក​ដែល​បាន​ឆ្លងកាត់​របប​ខ្មែរក្រហម​ប្រមាណ ជាង​៥​លាន់​នាក់ ដែល​កំពុង​នៅ​រស់រានមានជីវិត​។


​បទ​ចម្រៀង «​ឱ​! ភ្នំពេញ​អើយ​» និពន្ធ​ដោយ​លោក កែវ ចិន្តា នៅ​ថ្ងៃទី​១០ ខែមករា ឆ្នាំ​១៩៧៩ គឺជា​បទ​ចម្រៀង​ទីមួយ​ដែល​ត្រូវបាន​ចាក់ផ្សាយ​បន្ទាប់ពី​របប​ខ្មែរក្រហម​ដួលរលំ​។ បទ​ចម្រៀង «​ឱ​! ភ្នំពេញ​អើយ​» ត្រូវបាន​ច្រៀង​ឡើងវិញ​ដោយ​អ្នកនាង ពេជ្រ ចរិយា នៅពេលនេះ បាន​រំឭក​អំពី​ការចងចាំ ប្រវត្តិសាស្ត្រ និង​រឿងរ៉ាវ​រន្ធត់ ដែល​ប្រជាជន​កម្ពុជា​បាន​ឆ្លងកាត់​នៅក្នុង​របប​ខ្មែរក្រហម ពី​ឆ្នាំ​១៩៧៥ ដល់​ឆ្នាំ​១៩៧៩​។ ប្រជាជន​កម្ពុជា​នឹង​បាន​ស្តាប់​បទ​ចម្រៀង «​ឱ​! ភ្នំពេញ​អើយ​» គឺជា​ទម្រង់​បទ​ចម្រៀង​ថ្មី​ដែល​នឹង​ជួយ​ឲ្យ​មានការ​គិតពិចារណា​ឡើងវិញ​អំពី​អំពើ​ឃោរឃៅ​ដែល​បាន​កើតឡើង​នៅក្នុង​របប​ខ្មែរក្រហម ជួយ​ឲ្យ​បាន​ធូរស្បើយ​អារម្មណ៍ និង​ជួយ​ឲ្យ​យកឈ្នះ​លើ​អតីតកាល​ដ៏​ឈឺចាប់​។​
​សេន វាសនា អ្នកស្ម័គ្រចិត្ត​កម្ពុជា ខេត្តស្វាយរៀង ដែល​បាន​ស្តាប់​បទ​ចម្រៀង «​ឱ​!​ភ្នំពេញ​អើយ​» ច្រៀង​ដោយ​អ្នកនាង ពេជ្រ ចរិយា សរសេរថា «​បន្ទាប់ពី​ខ្ញុំ​បាន​ស្ដាប់​បទ​នេះ​អមដោយ​រូបភាព ខ្ញុំ​មាន​អារម្មណ៍​ថា អាណិត​ឈឺចាប់​ខ្លោចផ្សា ហើយ​បទ​នេះ​បានបង្ហាញ​អំពី​ទុក្ខលំបាក​របស់​បងប្អូន​ប្រជាជន​ដែល​រងគ្រោះ​ពី​របប​ខ្មែរក្រហម​»​។​
​សុខ ចន្ទ្រា អ្នកស្ម័គ្រចិត្ត​កម្ពុជា ខេត្តស្វាយរៀង សរសេរថា «​បទ​នេះ​ពិ​រោះ​រណ្ដំ​លាយឡំ​ជាមួយ​ភាព​កម្សត់ និង​ចាក់​ចូល​ជ្រៅ​ទៅក្នុង​ចិត្ត ធ្វើ​ឲ្យ​អ្នក​ស្តាប់​នឹកឃើញ​ដល់​អតីតកាល​ឈឺចាប់ នឹក​ដល់​ដួងព្រលឹង​ជាតិ ហើយក៏​ធ្វើ​ឲ្យ​ធូរស្បើយ​ក្រោយ​ការវិល​មក​សន្តិភាព​វិញ​»​។​


​ទេព ម៉ាលី​ណា អ្នកស្ម័គ្រចិត្ត​កម្ពុជា ខេត្តស្វាយរៀង សរសេរថា «​បទ​នេះ​ពិ​រោះ ហើយ​កម្សត់​។ ពេល​ខ្ញុំ​ស្តាប់​បទ​នេះ​ចប់ ខ្ញុំ​មាន​អារម្មណ៍​ក្តុកក្តួល ព្រោះ​ឃើញ​រូបភាព និង​អត្ថន័យ​បទ​ចម្រៀង​ប្រៀប​ដូច​ឃើញ​ហេតុការណ៍​ជាក់ស្តែង​ផ្ទាល់​ភ្នែក​ពី​ការឈឺចាប់ លំបាក​វេទនា​របស់​ប្រជាជន​ខ្មែរ​នៅក្នុង​របប​ខ្មែរក្រហម​»​។​
​បច្ចុប្បន្ន​អ្នកស្ម័គ្រចិត្ត​កម្ពុជា​របស់​មជ្ឈមណ្ឌល​ឯកសារ​កម្ពុជា​ប្រមាណ​៥០០​នាក់ នៅតាម​ទីជនបទ​ដាច់ស្រយាល​ទូទាំងប្រទេស​កម្ពុជា កំពុងធ្វើការ​ងារ​ជួយ​លើ​ផ្នែក​សុខភាព និង​ស្តាប់​នូវ​រឿងរ៉ាវ​របស់​ឪពុកម្តាយ យាយ​តា អ៊ំ ពូ មីង ដែល​នៅ​រស់រានមានជីវិត​ពី​របប​ខ្មែរក្រហម​៕សន


(ប្រភពរូបថត៖ បណ្ណសារមជ្ឈមណ្ឌលឯកសារកម្ពុជា)

សូមទស្សនាវីដេអូនៅតំណភ្ជាប់ខាងក្រោម៖

https://youtu.be/YE7ALqIpF9I