​ដោយៈ​ជា​សីហៈ​/​ភ្នំពេញៈ​លោក​ហេង​រតនា​អគ្គនាយក​ស៊ីម៉ាក់​បាន​អះអាងថា​ដូងខ្ទិះ​ដែល​ពី​មុនគេ​ដាំ​នៅក្នុង​មួយ​ធ្លាយ​ផ្លែ​មក​បាន​ដូងខ្ទិះ​តែមួយ​ទៅ​ពីរ​ផ្លែ​នោះ ពេលនេះ ក្រោយ​សាកល្បង​ដាំ មួយរយៈ លោក បាន​ដាំដូង​ខ្ទិះ​សាកល្បង​បាន​ផ្លែ​ជា​ដូងខ្ទិះ ១០០ ភាគរយ​បានតែ​ម្តង ។
​លោក​បានបញ្ជាក់​នៅលើ​បណ្តាញ​សង្គម​របស់លោក​ថា​”​ខ្ញុំ​ក៏បាន​ដាំ​សាកល្បង​ផងដែរ​ឥឡូវនេះ​ដូង​ទាំងនោះ​បានចេញ​ផ្លែ​ជា​ផ្លែ​ដូងខ្ទិះ​១០០%​ភាគរយ​ពិតប្រាកដ​មែន​” ។
​លោក​បាន​បន្តថា ការដាំ​សាកល្បង​ពូជ​ដូងខ្ទិះ​ចេញ​ផ្លែ​ជា​ដូងខ្ទិះ ១០០ ភាគរយ នេះ គឺ​លោក​ធ្លាប់​ពិគ្រោះ​យោបល់​ជាមួយនឹង​សម្តេច​វិបុល​បញ្ញា សុខ អាន កន្លងមក ។


​លោក​បាន​រៀបរាប់ថា ប្រមាណ​៧​ទៅ​៨​ឆ្នាំមុន អ្នកជំនាញ​ខាង​ដំណាំ​ដូង​វៀតណាម​បាន​ប្រមូល​ទិញ​ដូងខ្ទិះ​ទុំ​នៅ​ខេត្តបាត់ដំបង ដើម្បី​ផលិត​កូន​ដូងខ្ទិះ​ដែល​ដាំ​បាន​ផ្លែ​ដូងខ្ទិះ​១០០​ភាគរយ​ព្រោះថា​ទីផ្សារ​ដូងខ្ទិះ​មាន​តំរូវការ​ខ្ពស់​។​រីឯ​ដូងខ្ទិះ​កម្ពុជា​គឺ​ផ្លែ​ដូងខ្ទិះ​មាន​មួយ​ឬ​២​ផ្លែ​ក្នុង​មួយ​ធ្លាយ គ្មាន​ផ្លែ​ដូងខ្ទិះ​សុទ្ធ​ក្នុង​មួយ​ធ្លាយៗ​នោះទេ​។
​លោក​បាន​បន្តថា ទឹកដី​បាត់ដំបង​មាន​ដូងខ្ទិះ​ច្រើន ដែរ ហើយ​តាម​ធម្មតា​ដូងខ្ទិះ​មិនអាច​បណ្តុះ​កូន​ដូង ដូច​ផ្លែ​ដូង​ធម្មតា​បាន​នោះទេ​។ អ្នកជំនាញ​ដូង​អន្តរជាតិ​ជាពិសេស​ជំនាញ​ដូង​វៀតណាម​បាន​ដំណើការ​ស្រាវជ្រាវ​បណ្តុះ​ពូជ​ខ្ទិះ​១០០​ភាគរយ​ក្នុង​កែវ​ដោយ​ផ្តើមចេញពី​ការប្រមូលទិញ​ផ្លែ​ដូងខ្ទិះ​ពី​ខេត្តបាត់ដំបង ដើម្បី​គាំទ្រ​ការស្រាវជ្រាវ​បច្ចេកទេស​នោះ​។

ឥឡូវនេះ​តាម​ដឹង​វៀតណាម​មាន​ចំការ​ដូងខ្ទិះ​រាប់លាន​ដើម​និង​ម្ចាស់​ការផលិត​ផ្លែ​ដូងខ្ទិះ ដើម្បី​បំរើ​ឧស្សាហកម្ម ចំណីអាហារ និង​ប្រេងម្សៅ​ផងដែរ រហូត​មាន​ខេត្ត​មួយ​ផលិតផល​មួយ​ជា​ដូងខ្ទិះ​! ។ លោក​បាន​បន្តថា ដូងខ្ទិះ​នេះ​មានការ​វិវត្តន៍​បច្ចេក​ទេស​ខ្លាំង មាន​ការដាំដុះ​ច្រើន​នៅ​ថៃ ហ្វីលីពីន និង​ប្រទេស​អាមេរិក​ឡាទីន​៕.mara