​ប្រែ​សម្រួលៈ​វាសនា​/​វ៉ាស៊ីនតោន​៖​សហរដ្ឋ​អាម៉េរិក​បាន​និយាយ​កាលពី​ថ្ងៃ​ចន្ទ​ទី​២​សីហា​ថា របប​យោធា​មី​យ៉ាន់​ម៉ា​កំពុង​លេងល្បែង​ពន្យារពេល​ជាមួយនឹង​ការ​កំណត់​ពេល​បោះឆ្នោត​២​ឆ្នាំ​ទៀត​​នៅ​ពេល​រដ្ឋមន្ត្រី​ការបរទេស​អាម៉េរិក​លោក​អ៊ែន​ថូ​នី ប្លីង​កិន ត្រៀម​លើកទឹកចិត្ត​អាស៊ាន​អោយ​តែងតាំង​តំណាង​ម្នាក់​ប្រចាំ​មី​យ៉ាន់​ម៉ា​។​

​លោក​ប្លីង​កិន នឹងចូលរួម​កិច្ចពិភាក្សា​នៅ​សប្តាហ៍​នេះ​ជាមួយ​រដ្ឋមន្ត្រី​ការបរទេស​នៃ​សមាគម​អាស៊ាន​ដែល​ជា​ការប៉ុនប៉ង​ចុងក្រោយ​មួយ​របស់​រដ្ឋាភិបាលរ​បស់​ប្រធានាធិបតី ចូ បៃ​ដិន​ដើម្បី​​ចូលរួម​ពាក់ព័ន្ធ​ជាមួយ​តំបន់​មួយ​ចំពេល​អាម៉េរិក​ប្រជែង​ជាមួយ​ចិន​សំរាប់​ឥទ្ធិពល​ក្នុង​តំបន់​នេះ​។​

​នៅ​មុន​ជំនួប​ជាមួយ​អាស៊ាន ប្រមុខ​យោធា​មី​យ៉ាន់​ម៉ា​បាន​សន្យា​រៀបចំ​ការបោះឆ្នោត​និង​លុបចោល​ស្ថានភាព​គ្រាអាសន្ន​មួយ​នៅ​យ៉ាងយូរ​ត្រឹម​ខែសីហា​ឆ្នាំ​២០២៣ ដោយ​ពន្យារ​ពេល​ដែល​ខ្លួន​​បាន​សន្យា​កាលពី​ដំបូង​ក្រោយ​យោធា​ធ្វើ​រដ្ឋប្រហារ​ទម្លាក់​លោក​ស្រី អ៊ុង សាន ស៊ូ​ជី​ចេញពី​តំណែង​នៅ​ថ្ងៃ​០១ កុម្ភៈ​។​

​មន្ត្រីជាន់ខ្ពស់​អាម៉េរិក​ម្នាក់​បាន​និយាយថា​«​ការប្រកាស​នេះ​ជាការ​ក្រើនរំលឹក​អោយ​អាស៊ាន​បង្កើន​កិច្ចខិតខំ​របស់ខ្លួន ពីព្រោះ​វា​ច្បាស់​ណាស់​ថា របប​យោធា​ភូមា​កំពុង​ពន្យារ​ពេល​និង​ចង់​​បានកា​លបរ​ច្ឆេ​ទយូរ​មួយ​ដើម្បី​ប្រៀប​ឈ្នះ​របស់​ខ្លួន​។​វា​កាន់តែ​ជា​ហេតុផល​សំរាប់​អាស៊ាន​ត្រូវ​ចូលរួម​ពាក់ព័ន្ធ​ខ្លាំង​ឡើង និង​រក្សា​លក្ខខណ្ឌ​នៃ​ការមូល​មតិ​៥​ចំណុច​ដែល​មី​យ៉ាន់​ម៉ា​បាន​ចុះហត្ថលេខា​​ផងដែរ​»​។​

​សូមបញ្ជាក់​ថា ប្រមុខ​យោធា​មី​យ៉ាន់​ម៉ា លោក​មីន អ៊ុង​ហ្លាំង បាន​ចូលរួម​កិច្ចប្រជុំ​អាស៊ាន​មួយ​ស្តីពី​វិបត្តិ​នេះ​កាលពី​ខែ​មេសា​ដែល​នាំ​ដល់​ការសំរេច​ការមូល​មតិ​គ្នា​មួយ​ដែល​អំពាវនាវ​អោយ​​បញ្ចប់​អំពើ​ហិង្សា​ជា​បន្ទាន់​និង​តែងតាំង​តំណាង​អាស៊ាន​ម្នាក់​សំរាប់​ចរចា​ជាមួយ​អាជ្ញាធរ​មី​យ៉ាន់​ម៉ា​។​តែ​លោក​មីន អ៊ុង​ហ្លាំង​ក្រោយ​វិល​ទោដល់​ស្រុក បាន​ដកខ្លួន​ចេញពី​សេចក្តីថ្លែងការណ៍​​មូលមតិ​គ្នា​៥​ចំណុច​ខាងលើ​និង​ក៏​មិនទាន់​មាន​ការតែងតាំង​តំណាង​ណា​ម្នាក់​នៅឡើយ​ដែរ​៕

​ប្លីង​កិន ត្រូវ​ជួប​ពិភាក្សា​ជាមួយ​អាស៊ាន​៥​ថ្ងៃ​នៅ​សប្តាហ៍​នេះ​