ដោយៈវ៉ៃកូ/ ស្វាយរៀងៈនៅយប់ ថ្ងៃទី ២ ខែ សីហា ឆ្នាំ ២០២១ នេះ លោក ស៊ូ ម៉ុល អភិបាលស្រុករមាសហែកនិងជា ប្រធាន គណៈ បញ្ជា ការឯកភាព រដ្ឋបាល ស្រុករមាសហែកបាន បន្ត ចុះដឹកនាំ កម្លាំងចម្រុះ ចុះ អនុវត្ត សេចក្តីសម្រេច លេខ ០៨៣/២១ ស . ស . រ ចុះ ថ្ងៃទី ២៩ ខែកក្កដា ឆ្នាំ ២០២១ របស់ រដ្ឋបាល ខេត្តស្វាយរៀង ស្តីពី ការដាក់ចេញ នូវ វិធានការ រដ្ឋបាល នៅក្នុង ភូមិសាស្ត្រ ខេត្តស្វាយរៀង រយៈពេល ១៤ ថ្ងៃ គិត ចាប់ពី ម៉ោង ២៣:៥៩ នាទី នា ថ្ងៃទី ២៩ ខែកក្កដា ឆ្នាំ ២០២១ រហូតដល់ ថ្ងៃទី ១២ ខែសីហា ដើម្បី ប្រយុទ្ធ និង ទប់ស្កាត់ ការឆ្លង រាលដាល នៃ ជំងឺ កូ វីដ -១៩ ក្នុង មូលដ្ឋាន ។
លោកអភិបាលស្រុករមាសហែកបានឱ្យដឹងថានៅក្នុងភូមិសាស្ត្រស្រុករមាសហែកគឺមាន៤០គោលដៅ។ក្នុងនោះរួមមានតាមខ្សែបន្ទាត់ព្រំដែនកម្ពុជាវៀតណាម ១៤គោលដៅ ព្រំប្រទល់ស្រុកនិងស្រុក ៦គោលដៅ ទីប្រជុំជន ៥គោលដៅ និងព្រំប្រទល់ឃុំ ចំនួន១៦គោលដៅ
លោកបន្តថាដើម្បីចុះអនុវត្តវិធានការរដ្ឋបាលនេះ អាជ្ញាធរបានធ្វើការណែនាំដល់ប្រជាពលរដ្ឋ អាជីវករ និង អ្នកពាក់ព័ន្ធ ទាំងអស់ត្រូវ ចូលរួម អនុវត្តតាម ខ្លឹមសារ សេចក្តីសម្រេច របស់ រដ្ឋបាលខេត្តស្វាយរៀងពិសេស ការលក់ដូរ ប្រកបអាជីវកម្ម គ្រប់ ប្រភេទ អនុញ្ញាតត្រឹមតែការវេចខ្ចប់ប៉ុណ្ណោះ ដោយ មិន អនុញ្ញាតឱ្យ អតិថិជន ចូលមក អង្គុយ ឬ ទទួលទាន នៅក្នុង បរិវេណ អាជីវកម្មដ្ឋាន របស់ខ្លួន ឡើយ ។ ហាមឃាត់ ការជួបជុំ ការលក់ដូរ និង សេព គ្រឿង ស្រវឹង ត្រូវ អនុវត្តតាម វិធានការ បម្រាម គោចរ ( ចាប់ពី ម៉ោង ២១:០០ នាទី ដល់ ម៉ោង ៣:០០ នាទី )។
លោក ស៊ូ ម៉ុល អភិបាលស្រុករមាសហែក ក៏បានអំពាវនាវដល់បងប្អូនប្រជាពលរដ្ឋទាំងអស់បើគ្មានការចាំ បាច់សូមកុំចេញក្រៅផ្ទះហើយរាល់ការធ្វើដំណើរត្រូវមានលិខិតស្នាមបញ្ជាក់ពី អង្គភាព ស្ថាប័ន ក្រុមហ៊ុន ឬ អាជ្ញាធរមូលដ្ឋាន៕សរន
