ដោយៈ​សុផល​/​ភ្នំពេញ​: សម្តេច​អគ្គ​មហា​ពញា​ចក្រី ហេង សំរិន ប្រធានរដ្ឋសភា នៃ​ព្រះរាជាណាចក្រ​កម្ពុជា បាន​ផ្ញើលិខិត​អបអរសាទរ​ជូន ចំពោះ លោក វឿ​ង ឌិ​ញ​ហ្វេ​( Vương Đình Huệ) ប្រធានរដ្ឋសភា​នីតិកាល​ទី​១៥ នៃ​សាធារណរដ្ឋ​សង្គមនិយម​វៀតណាម ដែល​ត្រូវបាន​បោះឆ្នោត​ជ្រើសតាំង​ជា​ប្រធានរដ្ឋសភា​នីតិកាល​ទី​១៥ នៃ​សាធារណរដ្ឋ​សង្គមនិយម​វៀតណាម ក្នុងអំឡុងពេល​សម័យ​ប្រជុំ លើក​ទី​១ កាលពី​ថ្ងៃទី​២០ ខែកក្កដា ឆ្នាំ​២០២១ កន្លងទៅ​ថ្មីៗ​នេះ​។​

​នៅក្នុង​លិខិត​ចុះ​ថ្ងៃទី​៣​ខែសីហា​ឆ្នាំ​២០២១​នេះ សម្តេច​ចក្រី ហេង សំរិន បាន​សម្តែង​នូវ​ការអបអរសាទរ​យ៉ាង​កក់ក្តៅ​ជូន ចំពោះ​លោក​ប្រធាន ដែល​ត្រូវបាន​បោះឆ្នោត​ជ្រើសតាំង​ជា​ប្រធានរដ្ឋសភា​នីតិកាល​ទី​១៥​នៃ​សាធារណរដ្ឋ​សង្គមនិយម វៀតណាម ក្នុងអំឡុងពេល​សម័យ​ប្រជុំ​លើក​ទី​១ កាលពី​ថ្ងៃទី ២០​ខែកក្កដា ឆ្នាំ​២០២១ កន្លងទៅ​ថ្មីៗ​នេះ​។​

​ក្នុង​លិខិត​ដដែល​នេះ សម្តេច​ចក្រី​ប្រធានរដ្ឋសភា​នៃ​កម្ពុជា មាន​ជំនឿ​យ៉ាង​មុតមាំ​ថា ក្រោម​ការដឹកនាំ​ប្រកបដោយ​គតិបណ្ឌិត​រប​ស់លោក ស្ថាប័ន​នីតិប្បញ្ញត្តិ នៃ​សាធារណរដ្ឋ​សង្គម និយម​វៀតណាម ចំណងមិត្តភាព ភាពជា​អ្នកជិតខាង​ល្អ យូរអង្វែង និង​កិច្ចសហប្រតិបត្តិការ​ដ៏​ទូលំទូលាយ​រវាង​ស្ថាប័ន​នីតិប្បញ្ញត្តិ និង​ប្រទេស​យើង​ទាំងពីរ នឹង​កាន់តែ​រីកលូតលាស់​បន្ថែមទៀត​ក្នុងពេល​អនាគត ដើម្បី​ជា​ឧ​ត្ត​ម​ប្រយោជន៍​សម្រាប់​ប្រជាជន នៃ​ប្រទេស​ទាំងពីរ​ជា​បងប្អូន​។​

​ឱកាស​នោះដែរ សម្តេច​អគ្គ​មហា​ពញា​ចក្រី ហេង សំរិន បាន ថ្លែងអំណរគុណ​យ៉ាង​ជ្រាលជ្រៅ ចំពោះ​សាធារណរដ្ឋ​សង្គមនិយម​វៀតណាម ដែល​បានផ្តល់​ម៉ាស​មុខ​ចំនួន​រាប់ម៉ឺន​ម៉ាស ដល់​កម្ពុជា ដើម្បី​ប្រើប្រាស់ ក្នុងការ​ទប់ស្កាត់​ការរីក​រាលដាល​នៃ​ជំងឺ​កូ​វីដ​១៩ ដែល​បាន​រាតត្បាត​ប្រទេស​ជាច្រើន នៅ​ទូទាំង​ពិភពលោក​។​

​សម្តេច​ចក្រី ហេង សំរិន បាន​វាយតម្លៃ​ខ្ពស់​ចំពោះ​កិច្ចខិតខំ​ប្រឹងប្រែង​រួមគ្នា​របស់​រដ្ឋាភិបាល​នៃ​ប្រទេស​ទាំងពីរ ក្នុងការ​ប្រយុទ្ធប្រឆាំង​នឹង​ជំងឺ រាតត្បាត​នេះ តាមរយៈ​កិច្ចសហប្រតិបត្តិការ​ជិតស្និទ្ធ និង​ជំនួយ​ផ្នែក​វេជ្ជសាស្ត្រ​៕​សរន