​ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ កីឡាការិនី​រត់ប្រណាំង​បេឡា​រូស​ម្នាក់​បាន​និយាយ​កាលពី​ថ្ងៃអាទិត្យ​ទី​១ សីហា​ថា​នាង​កំពុងស្ថិត​នៅ​ក្រោម​ការការពា​រ​របស់​ប៉ូលិស​ជប៉ុន​បន្ទាប់​ពី​គណៈ​​កម្មា​ធិ​ការ​អូឡាំពិក​ប្រចាំ​ប្រទេស​របស់​នាង​បាន​ព្យាយាម​និង​បរាជ័យ​ក្នុង​ការ​និរទេស​នាង​ដោយ​បង្ខំ​បន្ទាប់ពី​នាង​រិះគន់​គ្រូបង្វឹក​របស់​នា​ង​ចំពោះ​ការចុះ​ឈ្មោះ​នាង​ក្នុង​ព្រឹត្តិការណ៍​ខុស​។​

​អ្នក​រត់ប្រណាំង​ឈ្មោះ គ្រីស្ទី​ណា ធី​ម៉ាណូ​វស្កា​យ៉ា បាន​ប្រកាស​កាលពី​ល្ងាច​ថ្ងៃអាទិត្យ​នៅលើ​បណ្តាញ​សង្គម Instagram ថា​នាង​បាន​ស្វែងរក​ការការពារ​នៅ​ប្រទេស​ជប៉ុន​ព្រោះ​នាង​បារម្ភ​​ពី​សុវត្ថិភាព​របស់​នាង​នៅ​បេឡា​រូ​ស ទី​ដែល​បុរស​ខ្លាំង អា​ឡិច​សាន់ឌ័​រ លូ​កា​សិន​កូ បាន​កាន់​អំណាច​អស់​រយៈពេល ២៧ ឆ្នាំ​ហើយ​បាន​ព្យាយាម​បំបិទ​សំឡេង​ប្រឆាំង​។​

​នាង​ធី​ម៉ា​នូវ​ស្កា​យ៉ា​បាន​ប្រាប់​វេបសាយ​ព័ត៌មាន​ឯក​រាជ្យ​បេឡា​រូ​ស Zerkalo.io​ថា “​ខ្ញុំ​បារម្ភ​ថា នៅ​បេឡា​រូ​ស ពួកគេ​អាច​នឹង​ចាប់​ខ្ញុំ​ដាក់គុក​”​។​

​នាង​បាន​និយាយថា “​ខ្ញុំ​មិន​ខ្លាច​ត្រូវ​គេ​បណ្តេញ​ចេញ​ឬ​ទាត់​ចោល​ពី​ក្រុម​ជម្រើសជាតិ​ទេ ខ្ញុំ​ព្រួយបារម្ភ​អំពី​សុវត្ថិភាព​របស់​ខ្ញុំ ហើយ​ខ្ញុំ​គិត​ថា​នៅពេលនេះ​វា​មិន​មាន​សុវត្ថិភាព​សម្រាប់​ខ្ញុំ​នៅ​​បេឡា​រូស​ទេ​”​។​

​គណៈកម្មាធិការ​អូឡាំពិក​ជាតិ​បេឡា​រូស​ដែល​គ្រប់គ្រង​ដោយ​កូនប្រុស​ច្បង​របស់​លោក​លូ​កា​សិនកូ​គឺលោក វី​កទ័រ លូ​កា​សិន​កូ បាន​និយាយ​កាលពី​ថ្ងៃអាទិត្យ​ថា​ខ្លួន​បាន​ដក​នាង​ធី​ម៉ា​នូវ​ស្កា​យ៉ា​​ចេញពី​ការប្រកួត ដោយសារតែ “​ស្ថានភាព​អារម្មណ៍​និង​ផ្លូវចិត្ត​របស់​នាង​” បន្ទាប់​ពី​ពិគ្រោះ​ជាមួយ​វេជ្ជបណ្ឌិត​។​

​នាង​ធី​ម៉ា​នូវ​ស្កា​យ៉ា​បាន​បដិសេធ​ថា​មិន​ត្រូវបាន​ពិនិត្យ​ដោយ​គ្រូពេទ្យ​ទេ​ហើយ​និយាយ​ថា​នាង​មាន​សុខភាព​រាងកាយ​និង​ផ្លូវចិត្ត​ល្អ​ណាស់​។ ​នាង​និយាយថា​នាង​ត្រូវ​បាន​បណ្តេញចេញ​ពី​ក្រុម​ជម្រើសជាតិ​ដោយ​បង្ខំ ព្រោះ “​ខ្ញុំ​បាន​និយាយ​នៅ​លើ Instagram របស់​ខ្ញុំ​អំពី​ការធ្វេសប្រហែស​របស់​គ្រូបង្វឹក​យើង​”​។​

​នៅក្នុង​វីដេអូ​ដែល​ថត​នៅ​អាកាសយានដ្ឋាន​ហា​ណេ​ដានៃ​ទីក្រុង​តូ​ក្យូ នាង​បាន​សុំ​ជំនួយ​ពី​គណៈកម្មាធិការ​អូឡាំពិក​អន្តរជាតិ (IOC) ។​

​នៅក្នុង​សេចក្តីថ្លែងការណ៍​មួយ IOC​បាន​និយាយថា​ខ្លួន​បាន​ទាក់ទង​ផ្ទាល់​ជាមួយ​នាង​ធី​ម៉ា​នូវ​ស្កា​យ៉ា​។ IOC បាន​និយាយថា​នាង​បាន​ស្ថិតនៅ​ឯ​អាកាសយានដ្ឋាន​ហា​ណេ​ដា​ហើយ​ត្រូវ​​បាន​អមដំណើរ​ដោយ​សមាជិក​ម្នាក់​នៃ​អូឡាំពិក​ក្រុង​តូ​ក្យូ ២០២០ ។​

​សេចក្តីថ្លែងការណ៍​នោះ​បាន​និយាយថា “​នាង​បាន​ប្រាប់​យើង​ថា​នាង​មាន​អារម្មណ៍​សុវត្ថិភាព​ហើយ​”​។​

​អ្នកនាំពាក្យ​កំពូល​របស់​រដ្ឋាភិបាល​ជប៉ុន​បាន​និយាយ​កាលពី​ថ្ងៃ​ចន្ទ​ថា នាង​ធី​ម៉ា​នូវ​ស្កា​យ៉ា​មានសុវត្ថិភាព​ហើយ​។​

​នាយក​ខុទ្ទកាល័យ​លោក​កាតស៊ូ​ណូ​ប៊ូ កា​តូ​ក៏​បាន​ប្រាប់​សន្និសីទ​សារព័ត៌មាន​ដែរ​ថា អាជ្ញាធរ​រួមទាំង IOC កំពុង​ធ្វើការ​ដើម្បី​បញ្ជាក់​ពី​ចេតនា​របស់​នាង​ហើយ​ជប៉ុន​នឹង​ចាត់វិធានការ​សម​​ស្រប​ក្នុង​កិច្ចសហប្រតិបត្តិការ​ជាមួយ​ស្ថាប័ន​ផ្សេងទៀត​៕

​នាង គ្រីស្ទី​ណា ធី​ម៉ាណូ​វស្កា​យ៉ា ឥឡូវ​មាន​សុវត្ថិភាព​ក្នុង​ប្រទេស​ជប៉ុន