ដោយ​៖ សៅ​វ៉ាន់ឌី / ព្រះវិហារ​៖ រដ្ឋបាលខេត្ត​ព្រះវិហារ បានប្រកាស​ព័ត៌មាន ពី​ការស្លាប់​ទារិកា​ម្នាក់ និង​ការរកឃើញ អ្នក​កើត​មេរោគ​កូ​វីដ​-១៩​ថ្មី ចំនួន ៤ នាក់​បន្ថែមទៀត នៅ​ថ្ងៃទី​២ ខែសីហា ឆ្នាំ​២០២១ ស្ថិតនៅក្នុង ភូមិសាស្ត្រ ខេត្តព្រះវិហារ​។​

​រដ្ឋបាលខេត្ត​ព្រះវិហារ បានបង្ហាញ​ថាៈ ទារិកា​ម្នាក់ ដែល​បាន​ស្លាប់​ដោយមាន​វិជ្ជមាន ជំងឺ​កូ​វីដ​-១៩ នោះ ឈ្មោះ ប៊ិន យូ​ជិន អាយុ ២​ខែ ស្ថិតក្នុង​បន្ទុក​ឪពុកម្តាយ​នៅក្នុង​ភូមិ រុងរឿង​៥ ឃុំ​ទឹក​ក្រហម ស្រុក​ជាំ​ក្សាន្ត ខេត្តព្រះវិហារ​។​

​ទារិកា អាយុ ២​ខែ​ខាងលើ បាន​ស្លាប់​ភ្លាមៗ នៅវេលា​ម៉ោង ៤ រសៀល ថ្ងៃទី​១ ខែសីហា ឆ្នាំ​២០២១ តាម​ការសន្និដ្ឋាន​រប​ស់ ក្រុមគ្រូពេទ្យ​ផ្នែក​កុមារ នៃ​មន្ទីរ​សុខា ភិ​បាល ខេត្តព្រះវិហារ ក្រុមគ្រូពេទ្យ​យោធា​ថា ទារិកា​ឈ្មោះ ប៊ិន យូ​ជិន ស្លាប់​ដោយសារ​ជំងឺ cerebral beriberi (​កង្វះ​វីតាមីន B1 ធ្ងន់ធ្ងរ ប៉ះពាល់​ដល់ ខួរក្បាល​)​។​

​ទន្ទឹមនឹង​ការស្លាប់​ទារិកា ប៊ិន យូ​ជិន អាយុ ២​ខែ​នោះ រដ្ឋបាលខេត្ត​ព្រះវិហារ ក៏បាន​បន្ត​រកឃើញ​អ្នក​ឆ្លង​ជំងឺ កូ​វីដ​-១៩​ថ្មី ៤ នាក់​បន្ថែមទៀត នៅក្នុង​ភូមិសាស្ត្រ​ខេត្ត យោងតាម​លទ្ធផល នៃ​ការធ្វើ​តេស្ត​រហ័ស (Rapid Test) នៅ​ថ្ងៃទី​២ ខែសីហា ឆ្នាំ​២០២១​។​

​គិត​ត្រឹម​ល្ងាច​ថ្ងៃ​ដដែល​នេះ ខេត្តព្រះវិហារ បាន​រកឃើញ​អ្នក​ឆ្លង​កូ​វីដ​-១៩ សរុប ៦៣០ នាក់ ស្រី ២៨៨​នាក់ កុមារី ២២​នាក់ ជាសះស្បើយ ៣៤៦ នាក់ ស្រី ១៥៨ នាក់ កុមារី ១៣ នាក់ និង​ស្លាប់ ២ នាក់ អ្នក​កំពុង​សម្រាក ព្យាបាល​ជំងឺ​កូ​វីដ​-១៩ មាន​ចំនួន ២៨២ នាក់ ស្រី ១២៩ នាក់ និង​កុមារី ៩ នាក់​៕/V​-PC