​ដោយ​៖ សៅ​វ៉ាន់ឌី / ព្រះវិហារ​៖ អនុប្រធាន​មន្ទីរ​បរិស្ថាន ខេត្តព្រះវិហារ លោក មាស ញឹម ក្រោយ​ទទួលបាន ការអនុញ្ញាត​ពី ប្រធាន​មន្ទីរ​បរិស្ថាន​ខេត្ត លោក សុង ច័ន្ទ​សុជាតិ បាន​ដឹកនាំ​មន្ត្រី​ឧ​ទ្យា​នុ​រក្ស ជាច្រើន​នាក់ ចុះបង្ក្រាប​រថយន្ត​សាំង​យ៉ុង ១​គ្រឿង ផ្ទុក​ឈើ​ជ្រុង រាប់សិប​កំណាត់ ដែល​កំពុង​ធ្វើ​សកម្មភាព ដឹកជញ្ជូន​ឈើ​ល្មើសច្បាប់ នៅលើ​ដែនដី ខេត្តព្រះវិហារ​។​

​ការបង្ក្រាប​រថយន្ត​ដឹកឈើ ១​គ្រឿង​នេះ បានធ្វើ​ឡើង នៅវេលា​ម៉ោង ១១ និង​៥៥​នាទី​យប់ ថ្ងៃទី​២ ខែសីហា ឆ្នាំ​២០២១ នៅលើ​ដងផ្លូវ​ក្រាល​ក្រួស​ក្រហម ១ ខ្សែ ត្រង់ចំណុច ផ្លូវបំបែក​ភូមិ​តា​សែង ឃុំ​រណសិរ្ស ស្រុក​សង្គម​ថ្មី ខេត្តព្រះវិហារ ជាប់​ព្រំប្រទល់ ភូមិ​អណ្តូង​តា​ម៉ែង ឃុំ​សាលា​វិស័យ ស្រុក​ប្រាសាទ​បា​ល្ល័​ង្គ ខេត្តកំពង់ធំ​។​
​លោក មាស ញឹម បាន​ប្រាប់​ឲ្យ​ដឹងថាៈ ការចុះ​បង្ក្រាប​សកម្មភាព រថយន្ត​ដឹកឈើ​នោះ បន្ទាប់ពី​មានការ​អនុញ្ញាត​ពី ព្រះរាជអាជ្ញា នៃ​អយ្យការ​អម​សាលាដំបូង ខេត្តព្រះវិហារ លោក ទី សុ​វិន្ទ​ថា​ល់ និង​ប្រធាន​មន្ទីរ​បរិស្ថាន​ខេត្ត លោក សុង ច័ន្ទ​សុជាតិ នោះមក ហើយ​កម្លាំង​បរិស្ថាន​ខេត្ត បាន​ចុះទៅ​កាន់​ភូមិ​តា​សែង ឃុំ​រណសិរ្ស ក៏បាន​ប្រទះឃើញ និង​ប្រដេញ​ស្ទាក់ចាប់​រថយន្ត ១​គ្រឿង ដែល​ដឹកជញ្ជូន​ឈើ ចេញពី​ភូមិ​តា​សែង ពេល​ដេញ​មកដល់​ចំណុច​ផ្លូវបំបែក ឃុំ​រណសិរ្ស ស្រុក​សង្គម​ថ្មី ខេត្តព្រះវិហារ និង​ឃុំ​សាលា​វិស័យ ស្រុក​ប្រាសាទ​ប​ល្ល័​ង្គ ខេត្តកំពង់ធំ ក៏បាន​ប្រទះឃើញ រថយន្ត​សាំង​យ៉ុង ១​គ្រឿង​ផ្សេងទៀត ផ្ទុក​ឈើ​ពេញប្រៀប ដែល​កំពុង​ធ្វើ​ចរាចរណ៍ នៅលើ​ដងផ្លូវ​ក្រាល​ក្រួស​ក្រហម ១​ខ្សែ​នោះ និង​បាន​ឃាត់​រថយន្ត​នេះ​ទុក នៅក្នុង​វេលាយប់​ជ្រៅ​នោះ​។​

​លោក មាស ញឹម បាន​បន្តថាៈ រថយន្ត​សាំង​យ៉ុង ១​គ្រឿង ដែល​រង​ការបង្ក្រាប នា​យប់នោះ ពាក់​ស្លាក​លេខ ភ្នំពេញ 2N-០០86 ពណ៌​ខៀវ បាន​ដឹកឈើ​សុ​ក្រំ ពេញ​ណែន រីឯ​តៃកុង​រថយន្ត​នេះ បាន​ប្រាប់​ក្រុមមន្ត្រី​បរិស្ថាន​ខេត្ត​ថាៈ ឈើ​ទាំងនេះ គេ​បាន​ដឹក​ចេញពី​ភូមិ​បុស្ស ជាប់​ភូមិ​តា​សែង ឃុំ​រណសិរ្ស ស្រុក​សង្គម​ថ្មី គឺ​ដឹក​យកទៅ​ឲ្យ ចែ អូន និង ពូ រ៉​យ នៅក្នុង​ខេត្តកំពង់ធំ​។​

​លោក មាស ញឹម បានបញ្ជាក់​ថាៈ នៅ​គ្រានោះ សមត្ថកិច្ច បាន​រឹបអូស​យក​វត្ថុតាង​បទល្មើស មាន​រថយន្ត សាំង​យ៉ុង ១​គ្រឿង និង​ឈើរា​ប់​កំណាត់ នាំយកមក​រក្សាទុក នៅ​ស្នាក់ការ​បរិស្ថាន​បឹង​ពែ ស្ថិតក្នុង​ស្រុក​រវៀង ខេត្តព្រះវិហារ នា​ម៉ោង ២ រំលងអធ្រាត្រ ឈានចូល​ថ្ងៃទី​៣ ខែសីហា ឆ្នាំ​២០២១​។​

​អនុប្រធាន​មន្ទីរ​បរិស្ថាន ខេត្តព្រះវិហារ បានបញ្ជាក់​ទៀតថាៈ នៅពេល​កំពុង​បញ្ជូន​រថយន្ត​សាំង​យ៉ុង ដែល​បង្ក្រាបបាន​នេះ មកកាន់​ស្នាក់​ការបឹង​ពែ ស្រាប់​តែមាន​រថយន្ត​តួ​រី​ស ៤ គ្រឿង​ផ្សេងទៀត ដឹកជញ្ជូន​ឈើ​កែច្នៃ ពាក់កណ្តាល​លទ្ធផល​សម្រេច គ្រោង​នឹង​ដឹក​ឆ្ពោះ​ចូលទៅ​ខេត្តកំពង់ធំ​។ ប៉ុន្តែ រថយន្ត​ទាំង ៤ គ្រឿង​នោះ ពេល​បើក​មកដល់​ចំណុច​ស្វាយ​ប៉ាត ក៏បាន​បើក​ត្រឡប់ក្រោយ​វិញ ក្រោយ​ទទួលដំណឹង​ថា មាន​កម្លាំង​បរិស្ថាន ចាំ​ចាប់​រថយន្ត​ដឹកឈើ នៅលើ​កំណាត់​ផ្លូវជាតិ លេខ​៦២ នា​យប់នោះ​រួចមក​។​

​ដោយឡែក រថយន្ត​ស៊េរី​ទំនើប ជាច្រើន​គ្រឿង​ទៀត ក្រោម​សេចក្តីរាយការណ៍​ថា បាន​ចូលទៅ​ដឹកជញ្ជូន​ឈើ នៅក្នុង​ភូមិសាស្ត្រ ភូមិ​សុច និង​ភូមិ​តា​សែង ឃុំ​រណសិរ្ស ជា​រៀងរាល់​យប់​ថ្ងៃនោះ កម្លាំង​មន្ទីរ​បរិស្ថាន​ខេត្ត បានប្រកាស​ចាត់ការ​បង្ក្រាប ឲ្យ​ខាងតែបាន ទោះបី​ជួប​ការលំបាក នៅក្នុង​ការបង្ក្រាប​នោះ​យ៉ាង​ក៏ដោយ​៕/V​