ដោយៈ​អូរ​ស្មាច់​/​ឧ​ត្ត​រ​មាន​ជ័​យៈ​នៅ​ថ្ងៃទី​៣ ខែសីហា នេះ​លោក អ៊ុន សុ​ភ័​ក្រ អភិបាលក្រុង​សំរោង និង​ក្រុមការងារ បាន​ចុះ​បិទ​ខ្ទប់​ភូមិ​ចំនួន​ប្រាំមួយ​នៅ ជាប់​ព្រំដែន កម្ពុជា ថៃ ស្ថិតក្នុង​សង្កាត់​អូរ​ស្មាច់ ក្រុង​សំរោង បន្ទាប់ពី​ភូមិ​ទាំងនោះ​មាន​ករណី​ផ្ទុះ​ការឆ្លង​រីក​រាលដាល​ជំងឺឆ្លង​កូ​វីដ​-១៩ ច្រើន​។​

ភូមិ​ដែល​ត្រូវបានធ្វើ​ការបិទ​ខ្ទប់​ទាំង​ចំនួន​ប្រាំមួយ​ភូមិ​នោះអាជ្ញាធរ​បានកំណត់​ជា​(​តំបន់​ក្រហម​)​ដែលមាន​ការឆ្លង​រីក​រាលដាល​ជំងឺ​កូ​វីដ​១៩ ក្នុង​សហគមន៍​ច្រើន រួមមាន ភូមិ​អូរ​ស្មាច់​,​ភូមិ​រួត​ចំប៉ី ភូមិ​អភិវឌ្ឍន៍​,​ភូមិ​គី​រី​មង្គល​,​ភូមិ​ដើម​ជ្រៃ និង​ភូមិ​ចំការចេក​។​

ការអនុវត្ត​វិធាន​ការបិទ​ខ្ទប់​នេះ រួមមាន ហាមឃាត់​សកម្មភាព​អាជីវកម្ម មុខរបរ និង​ទីតាំង​ដែល​មិន​រៀបរយ​នាំឱ្យ​ឈាន ដល់​ការឆ្លង​រាលដាល​ក្នុង​សហគមន៍​,​ហាម​ការជួបជុំ​លក្ខណ​:​ឯកជន​,​ភោជនីយដ្ឋាន​-​អាហា​រដ្ឋា​ន បិទ​ការ​បម្រើសេវា​ក្នុង​ទីតាំង តែ​អាច វេច​ខ្ចប់​បាន​(​លើកលែង​ទីតាំង​ដែល​គោរព​តាម​វិធាន​សុខាភិបាល​)​។​

រំលឹកថា​ខេត្តឧត្ដរមានជ័យ គិត​ត្រឹម​ថ្ងៃទី​២ ខែសីហា ឆ្នាំ​២០២១ ករណី​ឆ្លង​កូ​វីដ​-១៩ បាន​កើនឡើង​សរុប​ចំនួន​៤.៩២៥ ករណី ខណៈ​រកឃើញ​ថ្មី​៧៩ ករណី​(៧២​ករណី សហគមន៍ និង​៧ ករណី​នាំចូល​ពី​ប្រទេស​ថៃ​)​និង​ជាសះស្បើយ​ចំនួន​៥៥ នាក់​បន្ថែមទៀត​៕​សរន​