ប្រែសម្រួល : កញ្ញាដាលីស (ស្ត្រេតថែមស៍) ៖ ប្រេស៊ីល ដែលជាម្ចាស់ជើងឯកបាល់ទាត់អូឡាំពិកវិញ្ញាសាបុរស បានឡើងទៅវគ្គផ្តាច់ព្រ័ត្រ ខណៈពួកគេបានផ្តួលម៉ិកស៊ិក ៤-១ ដោយបាល់ប៉េណាល់ទីកាលពីថ្ងៃអង្គារទី ៣ ខែសីហាបន្ទាប់ពីការប្រកួតចប់១២០នាទីដោយគ្មានគ្រាប់បាល់នៅទីក្រុងកាស៊ីម៉ា។
អ្នកចាំទីប្រេស៊ីលសាន់តូសបានជួយសង្គ្រោះពីការស៊ុតរបស់កីឡាករអេឌូអាដូ អាគ្វីរ៉េ ក្នុងការស៊ុតបាល់ប៉េណាល់ទី មុនពេលកីឡាករចូហាន វ៉ាកេស ស៊ុតចំបង្គោលទីជាមួយការប៉ុនប៉ងស៊ុតបាល់ប៉េណាល់ទីទីពីររបស់ម៉ិកស៊ិក។
ដានី អាល់វេស, ហ្គាព្រីល ម៉ាទីនែលលី, ព្រូណូ គ្វីម៉ារ៉េស និងរៃនៀ បានស៊ុតចូលទីគ្រប់គ្នាសម្រាប់ប្រេស៊ីល ដែលនឹងត្រូវជួបអេស្ប៉ាញនៅវគ្គផ្តាច់ព្រ័ត្រនៅថ្ងៃសៅរ៍ខាងមុខនៅទីក្រុងយ៉ូកូហាម៉ា។
ម៉ិកស៊ិក ដែលជាម្ចាស់មេដាយមាសឆ្នាំ ២០១២ បានស៊ុតបញ្ចូលទី ១៤ គ្រាប់ក្នុងការប្រកួតចំនួន ៤ លើកនៅឆ្នាំនេះរួមទាំង ៦ គ្រាប់ក្នុងជ័យជម្នះវគ្គ ៨ ក្រុមចុងក្រោយរបស់ពួកគេលើកូរ៉េខាងត្បូង។
អេស្ប៉ាញបានឈ្នះម្ចាស់ផ្ទះជប៉ុន១-០នៅវគ្គថែមម៉ោង១៥នាទីពីរដង ដោយការស៊ុតរបស់កីឡាករ ម៉ាកូ អាសិនស៊ីអូ នៅនាទី១១៥។
ក្នុងការប្រកួតនេះជប៉ុនមានប្រៀបជាងអេស្ប៉ាញបន្តិចបន្តួច និងលេងយ៉ាងរស់រវើកនៅលើទីលាន ហើយសល់តែ៥នាទីទៀតប៉ុណ្ណោះនឹងយកការប្រកួតនេះទៅវគ្គប៉េណាល់ទី តែពុំមានសំណាង៕
កីឡាករប្រេស៊ីលអបអរក្រោយឈ្នះម៉ិកស៊ិកដោយបាល់ប៉េណាល់ទីកាត់សេចក្តី