​ប្រែ​សម្រួល : កញ្ញា​ដា​លី​ស (​ដេលី​មែ​ល​) ៖ ខ្សែបម្រើ​ហ្វា​ប៊ី​ញ៉ូ​របស់​ក្រុម​ហង្ស​ក្រហម Liverpool បាន​ចុះហត្ថលេខា​លើ​កិច្ចសន្យា​រយៈពេល​វែង​ថ្មី​ជាមួយ​ក្លិប​នៅ​ក្របខ័ណ្ឌ Premier League មួយ​នេះ​។​

​កីឡាករ​អន្តរជាតិ​ប្រេ​ស៊ីល​រូបនេះ​គឺជា​សមាជិក​សំខាន់​ទី ២ នៃ​ក្រុម​របស់​លោក​ជួ​ហ្គិន ក្លប់ ក្នុង​ការប្តេជ្ញា​អនាគត​របស់​គេ​ចំពោះ​ក្រុម​ហង្ស​ក្រហម​បន្ទាប់ពី​កីឡាករ​ត្រេន អា​ឡិច​សាន់ឌ័​រ អា​ណុល បាន​ចុះកិច្ចសន្យា​ថ្មី​កាលពី​ខែ​មុន​។​

​ហ្វា​ប៊ី​ញ៉ូ​បាន​ប្រាប់​វេបសាយ liverpoolfc.com ថា “​ខ្ញុំ​មានក្តី​សោមនស្ស​រីករាយ​ដែល​បាន​ចុះ​កុងត្រា​ថ្មី​ជាមួយ​ក្លិប​” ដោយ​កិច្ចព្រមព្រៀង​នេះ​នឹង​បន្ត​រហូត​ដល់​រដូវក្តៅ​ឆ្នាំ ២០២៦​។​

​រូប​គេ​និយាយថា “​តាំងពី​ការចាប់ផ្តើម​នៃ​ការសន្ទនា ខ្ញុំ​ពិតជា​មាន​ភាព​វិជ្ជមាន​អំពី​វា ព្រោះ​វា​ជា​អ្វី​ដែល​ខ្ញុំ​ចង់បាន គឺ​បន្ត​ស្នាក់​នៅ​ក្លិប​នេះ​និង​បន្ត​លេង​ឱ្យ Liverpool ។ ឥឡូវ វា​ក្លាយជា​ផ្លូវការ ហើយ​ខ្ញុំ​ពិតជា​សប្បាយចិត្ត​ណាស់​”​។​

​លក្ខខណ្ឌ​មុន​របស់​ហ្វា​ប៊ី​ញ៉ូ​នឹង​ត្រូវ​ផុតកំណត់​នៅ​រដូវក្តៅ​ឆ្នាំ ២០២៣ ហើយ​ការ​បន្ត​នៅ​របស់​គេ​គឺ​ជា​ផ្នែក​មួយ​នៃ​ផែនការ​របស់ Liverpool ក្នុង​ការផ្សារភ្ជាប់​អនាគត​កីឡាករ​ដែល​មាន​បទពិសោធន៍​ជាច្រើន​រូប​ក្នុង​រយៈពេល​ប៉ុន្មាន​ខែ​ខាងមុខ​៕

​ហ្វា​ប៊ី​ញ៉ូ​នឹង​បន្ត​នៅ​ជាមួយ Liverpool រហូតដល់​ឆ្នាំ​២០២៦