ប្រែសម្រួលៈវាសនា/បាងកក៖ថៃជួបការឆ្លងនិងអ្នកជំងឺកូវីដ១៩ស្លាប់ខ្ពស់បំផុតគួរអោយរន្ធត់ ដោយក្រសួងសុខាភិបាលបានបញ្ជាក់នៅព្រឹកថ្ងៃពុធនេះថា អ្នកជំងឺកូវីដ១៩ចំនួន១៨៨នាក់ទៀតបានបាត់បង់ជីវិត និងមនុស្សដល់ទៅ២០.២០០បានឆ្លងជំងឺនេះថែមតែអ្នកជំងឺ១៧.៩៧៥បានជាសះស្បើយចេញពីមន្ទីរពេទ្យនៅ២៤ម៉ោងកន្លងទៅ។
សូមបញ្ជាក់ថា ចាប់តាំងពីថ្ងៃ១មេសា ពេលកូវីដ១៩រលកទី៣វាយប្រហារព្រះរាជាណាចក្រនេះ មានអ្នកកើតកូវីដ១៩សរុប៦៤៣.៥២២នាក់ ក្នុងនេះ៥.៤០៩នាក់បានស្លាប់។
ចំនួនឆ្លងប្រចាំថ្ងៃច្រើនបំផុតពីមុននៅថៃ គឺ១៨.៩១២នាក់ដែលត្រូវបានប្រកាសកាលពីថ្ងៃសៅរ៍មុន ពេលចំនួនស្លាប់ប្រចាំថ្ងៃក៏ខ្ពស់បំផុតដែរគឺ ១៧៨នាក់។
នៅពេលការឆ្លងកូវីដក្នុងកំរិតប្រកាសអាសន្នជាមធ្យម១៨ពាន់នាក់ក្នុងមួយថ្ងៃបែបនេះ ផលប៉ះពាល់របស់វាលើមុខជំនួញនិងប្រជាជនកាន់តែអាក្រក់ទៅនៅពេលរដ្ឋាភិបាលព្យាយាមចាក់វ៉ាក់សាំងអោយមានច្រើន។
មានការព្រួយបារម្ភផងដែរអំពីការរីករាលដាលវីរុសទៅកាន់រោងចក្រដែលវានឹងរារាំងដល់វិស័យផលិតកម្មឧស្សាហកម្មនិងការនាំចេញ ដែលជាវិស័យសំខាន់២របស់ថៃសំរាប់ទប់សេដ្ឋកិច្ចដែលរងគ្រោះខ្លាំងពីកូវីដ១៩។
ត្រឹមថ្ងៃ២៩កក្កដា ក្រសួងឧស្សាហកម្មថៃបានរាយការណ៍ថា វីរុសបានរីករាលដាលទៅកាន់រោងចក្រចំនួន៥១៨ និងកម្មករ៣៦.៨៦១នាក់បានឆ្លងជំងឺនេះ។វិស័យវផលិតកម្មឧស្សាហកម្មរងគ្រោះបំផុត៥ រួមមានអាហារ(៩៩រោងចក្រ) រោងចក្រអេឡិចត្រូនិច(៧៤) រោងចក្រសម្លៀកបំពាក់(៤២) រោងចក្រការងារលោហៈ(៤២)និងរោងចក្រផ្លាស្ទិចចំនួន៣៦៕