ដោយៈមុនីរ័ត្ន/ភ្នំពេញៈមនុស្សចំនួន២១នាក់នៅរាជធានីភ្នំពេញប្រឈមនឹងការបញ្ជូនទៅតុលាការដោយសារតែល្មើសបម្រាមគោចរកាលពីយប់ថ្ងៃទី៣ខែសីហា។ខណៈនេះសមត្ថកិច្ចកំពុងតែរង់ចាំបទបញ្ជារបស់លោកឧត្តមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ និងអភិបាលរាជធានីភ្នំពេញ។
អ្នកនាំពាក្យស្នងការដ្ឋាននគរបាលរាជធានីភ្នំពេញលោក សាន សុខសីហា បានបញ្ជាក់នៅព្រឹកថ្ងៃទី៤ ខែសីហានេះថា អត់មានទេការអប់រំណែនាំ គឺមានតែការផាកពិន័យ ហើយបើធ្ងន់ធ្ងរនឹងរៀបចំចំណុំរឿងបញ្ជូនទៅតុលាការ។
អ្នកនាំពាក្យបានសង្កត់ធ្ងន់ថា លែងមានការអប់រំ ណែនាំ ទៀតហើយចំពោះអ្នកដែលល្មើសបម្រាមគោចរ គឺចាប់ពីយប់ថ្ងៃទី៣ ខែសីហា នេះតទៅ អ្នកដែលល្មើសបម្រាម ជួបជុំផឹកស៊ី និងម្ចាស់ហាងបើកហាងផឹកស៊ីគឺនឹងត្រូវចាប់វ៉ៃខ្នោះតែម្តងដោយ មិនមានការលើកលែងនោះទេ។
ការដាក់នៅវិធានការតឹងរ៉ឹងនេះ គឺដើម្បីចូលរួមបង្ការ និងទប់ស្កាត់ការឆ្លងរាលដាលនៃវីរុសកូវីដ១៩ប្រភេទថ្មី ដែលតា ( Delta ) ដែលកំពុងតែមានវត្តមាននៅកម្ពុជា និងកំពុងឆ្លងរាលដាល ហេតុនេះសូមប្រជាពលរដ្ឋ ចូលរួមអនុវត្តតាមការណែនាំរបស់រដ្ឋបាលរាជធានីភ្នំពេញ ជាពិសេសចូលរួមអនុវត្តបម្រាមគោចរចាប់ពីថ្ងៃទី២៩ កក្កដា រហូតដល់ថ្ងៃទី១២ ខែសីហា ឆ្នាំ២០២១។
អ្នកនាំពាក្យស្នងការដ្ឋាននគរបាលលរាជធានីភ្នំពេញ លោកសាន សុខសីហា បានបញ្ជាក់ថា “អនុវត្តតាមការណែនាំរបស់ឯកឧត្តមឯកឧត្តមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ ចាប់ពីយប់ថ្ងៃទី៣ ខែសីហា នេះតទៅ អត់មានវិធានការណែនាំអប់រំទៀតទេ គឺអ្នកដែលល្មើស ហាងដែលល្មើស និងអ្នកដែលលល្មើសបម្រាមគោចរ អ្នកដែលជួបជុំផឹកស៊ី បើកហាងផ្សេងៗ ត្រូវវ៉ៃខ្នោះគឺត្រូវវ៉ៃខ្នោះតែម្តង និងត្រូវចាប់ខ្លួនយកមកតែម្តង អត់មានការអប់រំណែនាំទៀតទេ និងត្រូវធ្វើឲ្យតឹងរ៉ឹងបំផុត”។
លោកសាន សុខសីហា បានមានប្រសាសន៍បន្តថា ទាក់ទងការអនុវត្តបម្រាមគមោលចរនៅក្នុងរាជធានីភ្នំពេញចាប់ពីថ្ងៃទី២៩ ខែកក្កដា មកដល់ត្រឹកថ្ងៃទី៣ ខែសីហាសមត្ថកិច្ចបានឃាត់ខ្លួនមនុស្សចំនួន ២១នាក់ ។
ឃាត់យានយន្តល្មើសចំនួន ១.២០៥គ្រឿង ក្នុងនោះរថយន្តចំនួន ៣៤៥គ្រឿង និងម៉ូតូចំនួន ៨៨០គ្រឿង ។ ផាកពិន័យរថយន្តចំនួន ៨៣គ្រឿង និងម៉ូតូចំនួន ២២៨គ្រឿង។ ចំពោះការអប់រំណែនាំមានចំនួន ១៤០៩នាក់ (ស្រី ២៨០នាក់) ។ ចំណែករថយន្តដែលយកទៅរក្សាទុកចំនួន ៥៧គ្រឿង និងម៉ូតូចំនួន ២២៩គ្រឿង៕សរន
