ប្រែ​សម្រួល : កញ្ញា​ដា​លី​ស (​ឆា​នែ​ល​ញូ​វ​អេ​ស៊ា​) ៖ អត្ត​ពលិក​អូឡាំពិក​បេឡា​រូ​ស នាង គ្រីស្ទី​ណា ធី​ម៉ាណូ​វស្កា​យ៉ា បាន​ចាកចេញ​ពី​ជប៉ុន​តាម​ជើងហោះហើរ​ឆ្ពោះ​ទៅ​ទីក្រុង​វី​យែន​នៅ​ថ្ងៃ​ពុធ​ទី​៤​សីហា​នេះ ហើយ​រំពឹង​ធ្វើដំណើរ​ទៅកាន់​ប្រទេស​ប៉ូឡូញ កន្លែង​ដែល​នាង​ត្រូវបាន​ផ្តល់​ទិដ្ឋាការ​មនុស្សធម៌​។​

​មន្ត្រី​អាកាសយានដ្ឋាន​ម្នាក់​បាន​ប្រាប់​អ្នកយកព័ត៌មាន​ថា កីឡាការិនី​វ័យ ២៤ ឆ្នាំ​រូប​នេះ​រំពឹង​ឡើង​យន្តហោះ​ទៅ​កាន់​ទីក្រុង​វ៉ា​សូវី​តែម្តង ប៉ុន្តែ​បាន​ប្តូរ​ជើងហោះហើរ​វិញ​នៅ​នាទីចុងក្រោយ​។​

​នាង​បាន​ឡើង​យន្តហោះ​នៅ​អាកាសយានដ្ឋាន​ណា​រីតា​នៅក្រៅ​ទីក្រុង​តូ​ក្យូ​បន្ទាប់ពី​ធ្វើ​ដំណើរ​ពី​ស្ថានទូត​ប៉ូឡូញ ទី​ដែល​នាង​បាន​ចំណាយ​ពេល​ស្នាក់នៅ​ពីរ​យប់​កន្លង​មក​បន្ទាប់ពី​មាន​ការ​អះ​​អាង​ថា​ក្រុម​ជម្រើសជាតិ​របស់​នាង​បាន​ព្យាយាម​បង្ខំ​នាង​ឱ្យ​ត្រឡប់​ទៅ​ស្រុក​វិញ បន្ទាប់ពី​នាង​បាន​រិះគន់​គ្រូបង្វឹក​របស់​នា​ង​។​

​អ្នក​រត់ប្រណាំង​រូបនេះ​បាន​បដិសេធ​មិន​និយាយ​ជាមួយ​ប្រព័ន្ធ​ផ្សព្វផ្សាយ​នៅ​អាកាសយានដ្ឋាន​ហើយ​ជើងហោះហើរ​របស់​នាង​បាន​ចេញ​ដំណើរ​ភ្លាមៗ​បន្ទាប់​ពី​ម៉ោង ១១ ព្រឹក​ម៉ោង​ក្នុងស្រុក​។​

​នាង​ធី​ម៉ាណូ​វស្កា​យ៉ាបា​ន​ស្វែងរក​ការការពារ​ពី​មន្ត្រី​អូឡាំពិក​ក្រុង​តូ​ក្យូ ២០២០ កាលពី​ថ្ងៃអាទិត្យ ដោយ​អះអាង​ថា​នាង​ត្រូវ​គេ​បង្ខំ​ឱ្យ​វិលត្រឡប់​ទៅ​បេឡា​រូស​ដែល​រង​ការ​អង្រួន​ដោយ​ចលាចល​​នយោបាយ​និង​ការបង្ក្រាប​លើ​អ្នកប្រឆាំង បន្ទាប់ពី​ការបោះឆ្នោត​ពោរពេញ​ដោយ​ជម្លោះ ដែល​ធ្វើឱ្យ​បុរស​ខ្លាំង អា​ឡិច​សាន់ឌ័​រ លូ​កា​សិន​កូ វិល​មក​បន្ត​កាន់​អំណាច​កាលពី​ឆ្នាំមុន​។​

​អ្នក​រត់ប្រណាំង​រូបនេះ​គឺ​ស្ថិត​ក្នុងចំណោម​អត្ត​ពលិក​បេឡា​រូ​សជាង ២.០០០ នាក់​ដែល​បាន​ចុះហត្ថលេខា​លើ​លិខិត​ចំហ​មួយ​អំពាវនាវ​ឱ្យមាន​ការបោះឆ្នោត​សា​ថ្មី​និង​ដោះលែង​អ្នកទោសនយោបាយ​។​

​ឥឡូវនេះ​ស្វាមី​របស់​នាង​បាន​ភៀសខ្លួន​ទៅ​អ៊ុយ​ក្រែ​នហើយ​អ្នក​ទាំង​ពីរ​រំពឹង​ជួប​គ្នា​នៅ​ប៉ូឡូញ ជា​ប្រទេស​មួយ​ដែល​រិះគន់​យ៉ាង​ចាស់ដៃ​ចំពោះ​របប​របស់​លោក​លូ​កា​សិន​កូ ហើយ​បាន​ក្លាយជា​លំនៅ​ថ្មី​របស់​ជន​ប្រឆាំង​ច្រើនឡើងៗ​៕

​នាង​ធី​ម៉ាណូ​វស្កា​យ៉ា​ជិះ​យន្តហោះ​ទៅ​ទីក្រុង​វី​យែន​នៅ​ព្រឹក​ថ្ងៃ​ពុធ​នេះ​ពី​អាកាសយានដ្ឋាន​ណា​រីតា