ដោយៈមុនីរ័ត្ន/​ភ្នំពេញៈ​លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និង សហប្រតិបត្តិការ​អន្តរជាតិ​នៃ​ព្រះរាជាណាចក្រ​កម្ពុជា នឹង​អញ្ជើញ​ចូលរួម​ក្នុង​កិច្ចប្រជុំ​រដ្ឋមន្ត្រីការបរទេស​មេគង្គ​-​ជប៉ុន លើក​ទី​១៤ ដែល​នឹង​ប្រព្រឹត្តទៅ​នៅ​ថ្ងៃទី​៦ ខែសីហា ខាងមុខ​តាម​ប្រព័ន្ធ​វីដេអូ​។​វត្តមានរបស់លោករដ្ឋមន្រ្តី តប​តាម​ការអញ្ជើញ​របស់​លោក ម៉ូ​តេ​ហ្គី តូ​ស៊ី​មី​សឺ (MOTEGI Toshimitsu) រដ្ឋមន្ត្រីការបរទេសនៃ​ប្រទេស​ជប៉ុន ។ប្រទេស​ជប៉ុន នឹង​ធ្វើជា​ប្រធាន​ដឹកនាំ​កិច្ចប្រជុំ​នេះ ហើយ​ រដ្ឋមន្ត្រីការបរទេស​នៃ​ប្រទេស មេគង្គ​ដទៃទៀត រួមមាន ឡាវ មី​យ៉ាន់​ម៉ា ថៃ និង វៀតណាម ក៏​នឹង​អញ្ជើញ​ចូលរួម​ក្នុង​កិច្ចប្រជុំ​នេះ ផងដែរ​។​

​យោងតាម​សេចក្តីប្រកាស​ព័ត៌មាន​របស់​ក្រសួង​ការ​បេ​ទេស​បាន​បញ្ជាក់ថា កិច្ចប្រជុំ​នេះ​រដ្ឋមន្ត្រីការបរទេស​មេគង្គ​-​ជប៉ុន នឹង​ពិនិត្យមើល​វឌ្ឍនភាពនៃ​កិច្ចសហប្រតិបត្តិការ​មេគង្គ​-​ជប៉ុន នៅក្នុង​វិស័យ​ផ្សេងៗ កំណត់​ទិសដៅ​អនាគត​នៃកិច្ចសហប្រតិបត្តិ ការ​នេះ ដើម្បី​ជំរុញ​ការអភិវឌ្ឍ ប្រកបដោយ​ចីរភាព លើកកម្ពស់​ការតភ្ជាប់​ផ្នែក​សង្គម សេដ្ឋកិច្ច និង​វប្បធម៌​ក្នុងចំណោមប្រទេស​មេគង្គ និង​ប្រទេស​ជប៉ុន និង​ដើម្បី​ធានាបាន​នូវ​អនុតំបន់​មេគង្គ ដែល​កាន់តែ​រស់​រវើកដោយគិតគូរ ពិចារណា ទៅលើ​ជំងឺ​កូ​វីដ​-១៩ និង​ការ​ប្រឈម​នានា ដែល​កំពុង​កើតមានឡើង​។ រដ្ឋមន្ត្រីទាំងអស់​ក៏នឹងផ្លាស់ប្តូរទស្សនៈ​គ្នា​ផងដែរលើបញ្ហា​តំបន់ និង​អន្តរជាតិដែលជាចំណាប់អារម្មណ៍ និង​ការបារម្ភ​រួមគ្នា ៕​សរន