ដោយ៖រ៉ាម៉ន/ភ្នំពេញ៖ អនុគណៈកម្មការស្រាវជ្រាវជំងឺកូវីដ-១៩ បានសហការជាមួយគណៈកម្មការផ្សារបឹងកេងកងធ្វើការធ្វើតេស្តរហ័សយកសំណាក អាជីវករលក់ដូរនៅផ្សារបឹងកេងកងចំនួនជាង៤០០នាក់ ហើយជាលទ្ធផល មានវិជ្ជមានកូវីដចំនួន២នាក់ ប៉ុន្តែទោះបីជាយ៉ាងក្តីទីផ្សារទាំងមូលនៅបើកដំណើរការជាប្រក្រតី។
លោក ឯក និមល ប្រធានគណៈកម្មការផ្សារបឹងកេងកង បានឲ្យដឹងនៅរសៀលថ្ងៃទី៥ ខែសីហានេះថា អាជីវករលក់ដូរនៅផ្សារបឹងកេងកងចំនួន ៤២១នាក់ ត្រូវបានក្រុមគ្រូពេទ្យចុះយកសំណាក ហើយជាលទ្ធផលរកឃើញ វិជ្ជមានកូវីដ-១៩ចំនួន២នាក់ប៉ុណ្ណោះ។
លោកបញ្ជាក់ថា ៖អាជីវករទាំង២នាក់ដែលមានវិជ្ជមានកូវីដ-១៩ពីរនេះ ពួកគាត់ជាពលរដ្ឋរស់នៅបឹងសាឡាងខណ្ឌទួលគោក ដែលអាជ្ញាធររាជធានីភ្នំពេញបានបិទខ្ទប់ភូមិដ្ឋានពួកគាត់រួចហើយ ។
លោកក៏បានបញ្ជាក់បន្ថែមផងដែរថា ៖ចំពោះទីផ្សារបឹងកេងកងទាំងមូលមិនមានការបិទទេ គឺនៅបើកដំណើរការជាប្រក្រតី ព្រោះថា បងប្អូនអាជីវករទាំង២នាក់នេះលក់ដូរនៅក្រោយគេឯង មិនសូវមានមនុស្សចេញចូលទេ ទើបលោកឃួង ស្រេង អភិបាលរាជធានីភ្នំពេញឱ្យនៅរក្សាផ្សារលក់ដូរជាប្រក្រតី។
ដោយឡែក លោក ហ៊ត វ៉ាន់ធី ប្រធានផ្សារអូរឫស្សី វិញ បានប្រាប់ឱ្យដឹងនៅរសៀលថ្ងៃទី០៥សីហាឆ្នាំ២០២១ នេះដែរថា អាជីវករផ្សារអូឬស្សីទាំងអស់ មិនមានការពិនិត្យយកសំណាកនោះទេ នៅថ្ងៃនេះ ហើយអ្នកដែលយកសំណាក៥នាក់នោះ មិនពាក់ព័ន្ធអ្វីដែលត្រូវអោយអាជីវករផ្សារអូឬស្សីទាំងអស់យកសំណាកនោះទេ បើទោះបី ក្នុងចំនួនអ្នកទាំង៥នាក់នោះមានអាជីវករផ្សារអូឬស្សីក៏ដោយ ហើយក្នុងចំនួន៥នាក់នោះ ក្រោយការពិនិត្យទទួលលទ្ធផលអវិជ្ជាមកូវីដ-១៩ទាំងអស់គ្នា៕
