ដោយៈ គង់​ហេង / កំពង់ចាមៈ ផ្លូវ​បេតុង​ចំនួន ពីរ​ខ្សែ ស្ថិតក្នុង​ភូមិ​បឹង​កុក​ទី​២ សង្កាត់​បឹង​កុក ក្រុង​កំពង់ចាម ដែល​បាន​ប្រើប្រាស់​កញ្ចប់​ថវិកា របស់​រដ្ឋបាលខេត្ត អនុវត្ត​គម្រោង ដោយ​ខាង​មន្ទីរ​សាធារណការ និង​ដឹក​ជ​ញ្ជួ​ន ខេត្តកំពង់ចាម បច្ចុប្បន្ន សម្រេច​ស្ថាបនា​បាន ប្រមាណ​ពី ៣០ ទៅ ៤០ ភាគរយ​ហើយ​។​

​លោក ខ្ច​ង អូន ជា​ចៅសង្កាត់​បឹង​កុក ដែល​បាន​អមដំណើរ​ប្រតិភូ ចុះ​ពិនិត្យ​ការដ្ឋាន​សាងសង់​ផ្លូវ​ខាងលើ ដែល​ដឹកនាំ​ដោយ​លោក អ៊ុន ចាន់​ដា ជា​អភិបាល​ខេត្តកំពង់ចាម នៅ​ព្រឹក​ថ្ងៃទី ៥ សីហា នេះ បានឱ្យដឹងថាៈ ខណៈ​នេះ ខាង​ក្រុម​សាងសង់ បាន​ចំនួន ពីរ សប្តាហ៍​ហើយ គឺ​កំពុង​ចាក់​ក្រាល​ថ្ម លើ​បាត​ផ្លូវ​បេតុង ពីរ​ខ្សែ ប្រវែង​ជាង ១.០០០ ម៉ែត្រ នោះ និង​បាន​ចង​ដែក សម្រាល​បេតុង​ផ្លូវ ប៉ុន្តែ​លោក​មិនអាច​វាយតម្លៃ​ភាគរយ នៃ​ការសាងសង់ ផ្លូវ​នេះ​បានទេ​។​

​លោក​ចៅសង្កាត់​បឹង​កុក បាន​បន្តថាៈ ក្រៅពី​ចុះ​ពិនិត្យ​ការស្ថាបនា​ផ្លូវ និង​ផលប៉ះពាល់ គឺ​លោក អ៊ុន ចាន់​ដា អភិបាលខេត្ត បានសម្រេច​ផ្តល់ កំណាត់​ផ្លូវ​បេតុង​ខ្លីៗ ដែល​ត​ភ្ជាប់​មក​ផ្លូវធំ ច្រើន​កន្លែង​បន្ថែមទៀត សរុប​ប្រហែល ២.០០០ ម៉ែត្រ ដែល​ពីមុន​ផ្លូវ​ទាំងអស់ សុទ្ធ​ជា​ផ្លូវលំ និង​មាន​ហានិភ័យ​ខ្ពស់ នៅ​រដូវភ្លៀង​ធ្លាក់​មកដល់​។​

​លោក ប្រាក់ ទិ​ត្យ ជា​នាយក​ទីចាត់ការ​ផែនការ និង​វិនិយោគ សាលាខេត្ត​កំពង់ចាម បានឱ្យដឹង​ដែរ​ថាៈ ផ្លូវ​ទាំងពីរ​ខ្សែ ខាងលើ ជា​គម្រោង​ថវិកា ចំណាយ​របស់​រដ្ឋបាល​ខេត្ត និង​អនុវត្ត​គម្រោង​សាងសង់ ដោយ​ខាង​មន្ទីរ​សាធារណការ និង​ដឹក​ជ​ញ្ជួ​ន ខេត្តកំពង់ចាម​។ បច្ចុប្បន្ន សាងសង់​សម្រេចបាន​ពី ៣០ ទៅ ៤០ ភាគរយ​។​

​លោក​បាន​បន្តថាៈ តាម​គម្រោង ផ្លូវ​ទាំង ពីរ​ខ្សែ​នេះ មាន​ប្រវែង​សរុប ១.៥៧៥ ម៉ែត្រ ដែល​ខ្សែ​ទី​១ មាន​ប្រវែង ១.៣៥០ ម៉ែត្រ មាន​ទទឹងផ្លូវ ៦ ម៉ែត្រ កម្រាស់​ផ្លូវ ០,១៥០ ម៉ែត្រ សរុប​ចំនួន ៨.១០០ ម៉ែត្រការ៉េ និង​មួយ​ខ្សែ​ទៀត ប្រវែង ២២៥ ម៉ែត្រ ទទឹងផ្លូវ ៥ ម៉ែត្រ កម្រាស់​ផ្លូវ ០,១៥០ ម៉ែត្រ សរុប​ចំនួន ១.១២៥ ម៉ែត្រការ៉េ​៕/V​